ຕອນເຊົ້າ ເວລາ 09: 00 ໂມງ ຂອງວັນທີ 16 ມີຖຸນາ 2021 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້ ທ່ານ ປອ ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບ ຂອງ ທ່ານ Pratito Soeharyo, ເອກອັກຄະລັດຖະທູດຜູ້ມີອໍານາດເຕັມ ແຫ່ງ ປະເທດ ອິນໂດເນເຊຍ ຊຶ່ງມີສໍານັກງານສະຖານທູດທີ່ຕັ້ງຢູ່ ສປປ ລາວ, ເນື່ອງໃນໂອກາດພົບປະ ທ່ານ ລັດຖະມົນຕີໄດ້ຮັບໜ້າທີ່ໃໝ່ ແລະ ແລກປ່ຽນດ້ານວຽກງານການທູດ ປະຈໍາຢູ່ ສປປ ລາວ; ການເຂົ້າຢ້ຽມຂໍ່ານັບຄັ້ງນີ້ມີຜູ້ຕາງໜ້າທັງສອງຝ່າຍເຂົ້າຮ່ວມ 15 ທ່ານ.
ໂອກາດນີ້ ທ່ານ ປອ ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍ້ອງຍໍຊົມເຊີຍຕໍ່ ທ່ານ Pratito Soeharyo, ໄດ້ມີສາຍພົວພັນການເສີມສ້າງຮ່ວມມືທີ່ດີ ລະຫວ່າງສອງປະເທດ ລາວ-ອິນໂດເນເຊຍ ທັງເປັນສະມາຊິກອາຊຽນດ້ວຍກັນຊຶ່ງພາຍໃນອາຊຽນໄດ້ມີສັນຍາໃນການເປີດຕະຫຼາດການຄ້າ ແລະ ການລົງທຶນຮ່ວມກັນ ສ່ວນໃຫຍ່ແມ່ນປະຕິບັດຕາມສັນຍາວ່າດ້ວຍການຄ້າດ້ານຜະລິດຕະພັນເພື່ອການນຳເຂົ້າ ແລະ ສົ່ງອອກ ແລະ ໄດ້ຕີລາຄາສູງຕໍ່ວຽກງານການຄ້າ ແລະ ການລົງທຶນໃນໄລຍະຜ່ານມາ ເພື່ອເປັນການຊຸກຍູ້ທ່າແຮງລະຫວ່າງສອງປະເທດ ລາວ-ອິນໂດເນເຊຍ ເປັນວຽກງານສະມາຄົມເຄື່ອຂ່າຍການຜະລິດອຸດສາຫະກຳປຸງແຕ່ງໄມ້ ແລະ ສະມາຄົມອຸດສາຫະກຳເຟີນີເຈີ ແລະ ຫັດຖະກຳ ອິນໂດເນເຊຍ, ໂດຍມີຈຸດປະສົງຮ່ວມມືດ້ານທຸລະກິດເພື່ອຊ່ວຍເຫຼືອການປັບປຸງຄຸນນະພາບຜະລິດຕະພັນໄມ້ລາວໃຫ້ສາມາດເຂົ້າສູ່ຕະຫຼາດພາກພື້ນ ແລະ ສາກົນ ບົນພື້ນຖານໃຫ້ມີຜົນປະໂຫຍດສອງຝ່າຍ, ນອກນັ້ນ ຍັງເປັນຄູ່ຮ່ວມມືທີ່ດີ, ທັງສອງຝ່າຍໃຫ້ຄໍາໝັ້ນສັນຍາຕໍ່ກັນວ່າ: ຈະສືບຕໍ່ຜັນຂະຫຍາຍການຮ່ວມມື ແລະ ວຽກງານອື່ນໃນຕໍ່ໜ້າ.
ທ່ານ Pratito Soeharyo, ໄດ້ກ່າວວ່າ: ຂ້າພະເຈົ້າຮູ້ສຶກພາກພູມໃຈທີ່ໄດ້ດໍາລົງຕໍາແໜ່ງເປັນເອກອັກຄະລັດຖະທູດຜູ້ມີອໍານາດເຕັມ ແຫ່ງ ອິນໂດເນເຊຍ ປະຈໍາຢູ່ ສປປ ລາວ ແລະ ກໍ່ສະແດງຄວາມຍິນດີ ທີ່ທ່ານ ລັດຖະມົນຕີມາຮັບວຽກໃຫມ່ ຫວັງວ່າ ທ່ານຈະອໍານວຍຄວາມສະດວກໃຫ້ແກ່ຂ້າພະເຈົ້າໃນວຽກງານຕໍ່ໜ້າ.
ຕອນທ້າຍ ທ່ານ ລັດຖະມົນຕີ ກະຊວງ ອຄ. ໄດ້ອວຍພອນໃຫ້ ທ່ານPratito Soeharyo, ໃຫ້ມີສາຍພົວພັນ ແລະ ການຮ່ວມມື ລະຫວ່າງ ສອງປະເທດໃຫ້ດີຂຶ້ນເລື້ອຍໆ.
ພາບ-ຂ່າວ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
