ວັນ​ທີ 1 ກໍລະກົດ​ຜ່ານ​ມາ, ກະຊວງອຸດສາຫະກຳ ແລະ ການຄ້າ ເຜີຍແຜ່ຂໍ້ຕົກລົງ ວ່າດ້ວຍການຄຸ້ມຄອງ, ຕິດຕາມໄມ້ສົ້ນເຂົ້າ ແລະ ໄມ້ສົ້ນອອກ ສະບັບເລກທີ 0777/ອຄ ລົງວັນທີ 25 ສິງຫາ 2020 ຊຶ່ງຈັດຂຶ້ນ ທີ່ພະແນກອຸດສາຫະກຳ ແລະ ການຄ້າແຂວງຈຳປາສັກ; ໃຫ້ກຽດເປັນປະທານໂດຍ ທ່ານ ປອ. ຄຳແພງ ໄຊສົມແພງ ລັດຖະມົນຕີກະຊວງອຸດສາຫະກຳ ແລະ ການຄ້າ, ປະທານຮ່ວມທ່ານ ສົມບູນ ເຮືອງວົງສາ ຮອງເຈົ້າແຂວງໆຈຳປາສັກ ແລະ ພາກສ່ວນກ່ຽວຂ້ອງທີ່ຂຶ້ນກັບພະແນກອຸດສາຫະກຳ ແລະ ການຄ້າ 4 ແຂວງພາກໃຕ້ (ຈຳປາສັກ, ສາລະວັນ, ເຊກອງ ແລະ ອັດຕະປື) ພ້ອມທັງພາກທຸລະກິດ ພາຍໃນແຂວງຈຳປາສັກ ເຂົ້າຮ່ວມ.

     ທ່ານ ປອ. ຄໍາແພງ ໄຊສົມແພງ ໄດ້ມີຄຳເຫັນກ່າວເປີດກອງປະຊຸມວ່າ: ການ​ປະຊຸມ​ຄັ້ງນີ້ຈະເປັນກອງປະຊຸມຊຸກຍູ້ ແລະ ເນັ້ນໜັກຕື່ມໃນການຈັດຕັ້ງປະຕິບັດ ວຽກງານດັ່ງກ່າວນີ້ ຫຼາຍກວ່າ ເນື່ອງຈາກຂໍ້ຕົກລົງ ວ່າດ້ວຍການຄຸ້ມຄອງ ແລະ ຕິດຕາມໄມ້ ກໍໄດ້ສົ່ງໃຫ້ບັນດາຂະແໜງການ, ບັນດາທ່ານແລ້ວ ແຕ່ເດືອນສິງຫາ ປີຜ່ານມາ; ໃນປີ 2006 ຂະແໜງອຸດສາຫະກຳ ແລະ ການຄ້າ ໄດ້ຮັບມອບໂອນໂຮງງານປຸງແຕ່ງໄມ້ ຈາກຂະແໜງກະສິກຳ ແລະ ປ່າໄມ້ໃນຈຳນວນ ທັງໝົດ 2.103 ແຫ່ງ ແລະ ນັບແຕ່ນັ້ນເປັນຕົ້ນມາ ຈົນຮອດເດືອນພຶດສະພາ ປີ 2020, ກະຊວງອຸດສາຫະກຳ ແລະ ການຄ້າໄດ້ປັບປຸງ, ດັດສົມ ແລະ ໄດ້ຍຸບເລີກໂຮງງານປຸງແຕ່ງໄມ້ ຊຶ່ງຍັງເຫຼືອ 1.090 ແຫ່ງ, ໃນນັ້ນ ມີໂຮງເລື່ອຍ 6 ແຫ່ງ, ໂຮງງານປຸງແຕ່ງໄມ້ ສຳເລັດຮູບ 364 ແຫ່ງ, ໂຮງງານເຟີນີເຈີ້ມີ 599 ແຫ່ງ ແລະ ການປຸງແຕ່ງໄມ້ ແບບຄອບຄົວມີ 121 ແຫ່ງ, ໃນນີ້ມີໂຮງງານທີ່ນຳໃຊ້ໄມ້ປູກມີ 78 ແຫ່ງ; ຈຳນວນໂຮງງານປຸງແຕ່ງໄມ້ 969 ແຫ່ງ (ບໍ່ລວມການປຸງແຕ່ງໄມ້ແບບຄອບຄົວ) ມີໄມ້ຄ້າງໂຮງງານ ທີ່ສັງລວມໄດ້ທັງໝົດ 257.779,52 ແມັດກ້ອນ. ໃນນີ້ມີ ບໍລິມາດໄມ້ຄ້າງໂຮງງານຂອງ 4 ແຂວງ ພາກໃຕ້ ຈຳນວນ 69.540,61 ແມັດກ້ອນ ຫຼື ກວມເອົາ 26,97% ຂອງໄມ້ຄ້າງທັງໝົດທົ່ວປະເທດ.

      ເພື່ອສືບຕໍ່ເຮັດໃຫ້ໂຮງງານປຸງແຕ່ງໄມ້ ໄດ້ຮັບການຍົກລະດັບ ດ້ານມາດຕະຖານສາມາດຄຸ້ມຄອງ ແລະ ຕິດຕາມກວດກາ ການສະໜອງໄມ້ພາຍໃນໂຮງງານປຸງແຕ່ງໄມ້ ແລະ ການຄ້າໄມ້ ຫັນເຂົ້າສູ່ລະບຽບການເທື່ອລະກ້າວ ແລະ ເປັນລະບົບຕ່ອງໂສ້ ທີ່ສາມາດຕິດຕາມທີ່ມາຂອງໄມ້ໄດ້, ພ້ອມດຽວກັນ ເພື່ອສືບຕໍ່ຈັດຕັ້ງຜັນຂະຫຍາຍ ຄຳສັ່ງຂອງທ່ານນາຍົກລັດຖະມົນຕີ ເລກທີ 15/ນຍ, ລົງວັນທີ 13 ພຶດສະພາ 2016 ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ ແລະ ກວດກາການຂຸດຄົ້ນໄມ້, ເຄື່ອນຍ້າຍໄມ້; ສະນັ້ນ, ໃນວັນທີ 25 ສິງຫາ 2020, ກະຊວງອຸດສາຫະກຳ ແລະ ການຄ້າ ຈຶ່ງໄດ້ອອກຂໍ້ຕົກລົງວ່າດ້ວຍການຄຸ້ມຄອງ, ຕິດຕາມໄມ້ສົ້ນເຂົ້າ ແລະ ສົ້ນອອກ, ສະບັບເລກທີ 0777/ອຄ.ກອຫ ເພື່ອເປັນການກຳນົດ ການຈັດຕັ້ງປະຕິບັດໃຫ້ເປັນເອກະພາບກັນໃນຂອບເຂດທົ່ວປະເທດ, ທັງສາມາດອຳນວຍຄວາມສະດວກ ໃຫ້ຜູ້ດຳເນີນທຸລະກິດໄມ້ໄດ້ມີລະບົບບໍລິຫານຈັດການທີ່ດີຂຶ້ນ ເປັນຕົ້ນລະບົບຕິດຕາມ ແລະ ກວດກາ ໄມ້ສົ້ນເຂົ້າ, ສົ້ນອອກ ແລະ ໄມ້ຄ້າງພາຍໃນໂຮງງານປຸງແຕ່ງໄມ້, ລວມທັງລະບົບຄຳນວນອັດຕາການນຳໃຊ້ໄມ້ ຫຼື ອັດຕາການສູນເສຍຂອງໄມ້ ໂດຍຜ່ານລະບົບບັນທຶກ ຫຼື ຂຶ້ນບັນຊີ ການແປຮູບໄມ້ທ່ອນ ເປັນຜະລິດຕະພັນໄມ້ອື່ນໆ.  

    ຈຸດປະສົງ ຂໍ້ຕົກລົງສະບັບນີ້ກຳນົດຫຼັກການ, ລະບຽບການ ແລະ ມາດຕະການກ່ຽວກັບການຄຸ້ມຄອງ, ຕິດຕາມ ແລະ ກວດກາໄມ້ສົ້ນເຂົ້າ ແລະ ສົ້ນອອກ ຂອງຜູ້ດຳເນີນທຸລະກິດໄມ້ເພື່ອຄຸ້ມຄອງການນໍາໃຊ້ໄມ້ຢ່າງມີປະສິດທິຜົນ ແລະ ຖືກຕ້ອງຕາມລະລຽບກົດໝາຍ ແນໃສ່ສົ່ງເສີມການຊົມໃຊ້ຊັບພະຍາກອນປ່າໄມ້ໃຫ້ມີຄວາມຍືນຍົງ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມແຫ່ງຊາດ ຕາມທິດຫັນເປັນອຸດສາຫະກຳທັນສະໄໜ ແລະ ຍືນຍົງ. ຂໍ້ຕົກລົງ ຂອງລັດຖະມົນຕີ ກະຊວງອຸດສາຫະກຳ ແລະ ການຄ້າ ທີ່ນໍາມາເຜີຍແຜ່ໃນຄັ້ງນີ້ ມີທັງໝົດ 8 ໝວດ 32 ມາດຕາ. ນອກຈາກນີ້, ໃຫ້ສືບຕໍ່ ຊຸກຍູ້-ຕິດຕາມບັນດາໂຮງງານປຸງແຕ່ງໄມ້ ໃຫ້ມີການປັບປຸງໂຮງງານໃຫ້ໄດ້ມາດຕະຖານຕາມທີ່ກຳນົດໃນຂໍ້ຕົກລົງ ຂອງກະຊວງອຸດສາຫະກຳ ແລະ ການຄ້າ ເລກທີ 0222/ອຄ.ອຫ ເພື່ອເຮັດ ຜະລິດຕະພັນໄມ້ ມີການປັບປຸງຄຸນນະພາບໃຫ້ດີຂຶ້ນເທື່ອລະກ້າວ ແລະ ມີການສ້າງມູນຄ່າເພີ່ມສູງ.

​ແຫຼ່ງຂ່າວ-ພາບໂດຍ: ກົມ​ອຸດສາຫະກໍາ ​ແລະ ຫັດຖະ​ກໍາ ກະຊວງ ອຄ

ຮຽບຮຽງ​ໂດຍ: ນ ຖື ​ແຫວນ​ວົງ​ສົດ ສູນ​ສະ​ຖິຕິ ​ແລະ ຂໍ້​ມູນ​ຂ່າວສານ ກຜຮ