ຕອນເຊົ້າ ເວລາ 09: 00 ໂມງ ຂອງວັນທີ 13 ກໍລະກົດ 2021 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ ທ່ານ ປອ ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບ ຂອງ ທ່ານ ສົມໝາຍ ຟ້າມິ່ງ, ຊຶ່ງດຳລົງຕຳແໜ່ງເປັນຜູ້ຕາງໜ້າ ອົງການ UNIDO ປະຈຳ ສປປ ລາວ, ໂດຍມີຈຸດປະສົງສະແດງຄວາມຍິນດີ ຕໍ່ທ່ານ ປອ ຄຳແພງ ໄຊສົມແພງ ໄດ້ຮັບໜ້າທີ່ເປັນລັດຖະມົນຕີກະຊວງ ອຄ ຜູ້ໃໝ່ ແລະ ແລກປ່ຽນວຽກງານການຮ່ວມມື ລະຫວ່າງກະຊວງ ອຄ ແລະ ອົງການ UNIDO; ການເຂົ້າຢ້ຽມຂໍ່ານັບຄັ້ງນີ້ ມີຜູ້ຕາງໜ້າທັງສອງຝ່າຍເຂົ້າຮ່ວມ 12 ທ່ານ.
ໂອກາດນີ້ ທ່ານ ປອ ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍ້ອງຍໍຊົມເຊີຍຕໍ່ ທ່ານ ສົມໝາຍ ຟ້າມິ່ງ, ໄດ້ມາພົບປະແລກປ່ຽນບົດຮຽນ ແລະ ມາລາຍງານຕໍ່ທ່ານຊາບກ່ຽວກັບວຽກງານພົວພັນຮ່ວມມື ລະຫວ່າງ ສປປ ລາວ – UNIDO ທີ່ມີການພົວພັນກັນໃນໄລຍະຜ່ານມາ, UNIDO ເປັນສ່ວນໜຶ່ງຂອງ ອົງການສະຫະປະຊາຊາດ ຊຶ່ງມີສຳນັກງານຕັ້ງຢູ່ບາງກອກ ປະເທດໄທ ມີກຸ່ມສະມາຊິກທົ່ວໂລກ 170 ປະເທດ ມີ 7 ປະເທດປະຈຳຢູ່ສຳນັກງານໃຫຍ່ ເປັນອົງການໜຶ່ງທີ່ເຮັດໜ້າທີ່ ແກ້ໄຂຄວາມທຸກຍາກຂອງປະຊາຊົນ ແລະ ອົງການນີ້ເປັນສ່ວນໜຶ່ງທີ່ສະໜັບສະໜູນດ້ານການພັດທະນາຊັບພະຍາກອນມະນຸດ ດ້ານໜຶ່ງການແບ່ງປັນຄວາມຮຸ່ງເຮືອງ, ປົກປັກຮັກສາສະພາບແວດລ້ອມ, ການວິເຄາະວິໄຈ, ອຳນວຍຄວາມສະດວກດ້ານສາກົນ ຄວາມອາດສາມາດໃນວຽກງານຕ່າງໆ, ປັບປຸງວຽກງານໃຫ້ມີຄຸນນະພາບຢ່າງຕໍ່ເນື່ອງ ສິ່ງທີ່ເປັນເປົ້າໝາຍຄື:
- ການປັງປຸງສົ່ງເສີມ ວຽກງານມາດຕະຖານ ດ້ານອຸດສາຫະກຳ
- ການປັງປຸງສົ່ງເສີມ ວຽກງານມາດຕະຖານ ການຜະລິດ
- ການປັບປຸງສົ່ງເສີມ ວຽກງານມາດຕະຖານ ການປຸງແຕ່ງ
- ການປັບປຸງສົ່ງເສີມ ວຽກງານມາດຕະຖານ ທາງສິ່ງແວດລ້ອມ.
ມີຈຸດປະສົງເພື່ອຮ່ວມມືດ້ານການພັດທະນາ, ຊ່ວຍເຫຼືອຍົກລະດັບຄຸນນະພາບດ້ານວຽກງານຕ່າງໆຫັນເຂົ້າສູ່ສາກົນ ບົນພື້ນຖານໃຫ້ມີຜົນປະໂຫຍດ ແກ່ ສປປ ລາວ, ນອກນັ້ນຍັງເປັນຄູ່ຮ່ວມມືທີ່ດີ, ທັງສອງຝ່າຍໃຫ້ຄໍາໝັ້ນສັນຍາຕໍ່ກັນວ່າ: ຈະສືບຕໍ່ຜັນຂະຫຍາຍການຮ່ວມມື ຢ່າງຕໍ່ເນື່ອງ ແລະ ວຽກງານອື່ນໃນຕໍ່ໜ້າ.
ຕອນທ້າຍ ທ່ານ ລັດຖະມົນຕີ ກະຊວງ ອຄ ສະແດງຄວາມຂອບໃຈຕໍ່ທ່ານ ສົມໝາຍ ຟ້າມິ່ງ ຜູ້ຕາງ ອົງການ UNIDO ໄດ້ມາລາຍງານສະພາບວຽກງານໃຫ້ຮັບຊາບ ແລະ ແນະນໍາທາງອອກທີ່ດີ ເພື່ອພັດທະນາປະເທດຊາດ ໃຫ້ແກ່ ສປປ ລາວ ໃນຕໍ່ໜ້າ.
ພາບ-ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ, ກະຊວງ ອຄ.
