ໃນຕອນເຊົ້າຂອງວັນທີ 19 ກໍລະກົດ 2021 ໄດ້ມີພິທີເປີດຊຸດຝຶກອົບຮົມໃນຫົວຂໍ້ ສ້າງຄວາມເຂັ້ມແຂງໃນການຮ່ວມກຸ່ມທຸລະກິດລ້ຽງໝູ ຢູ່ທີ່ສະພາການຄ້າ ແລະ ອຸດສາຫະກຳ ແຂວງສະຫວັນນະເຂດ ໂດຍການເປັນປະທານຮ່ວມຂອງ ທ່ານ ສາ ສີລິພົງ ຮອງຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ທ່ານ ໄຊຍະເດດ ຜຸຍຍະວົງ ຮອງຫົວໜ້າພະແນກອຸດສາຫະກໍາ ແລະ ການຄ້າ ແຂວງສະຫວັນນະເຂດ ແລະ ທ່ານ ອາທິດ ລາຕີສະຫວັນຄຳ ຮອງປະທານສະພາການຄ້າ ແລະ ອຸດສາຫະກຳ ແຂວງສະຫວັນນະເຂດ ຊຶ່ງມີຜູ້ເຂົ້າຮ່ວມມາຈາກພາກລັດ: ພະແນກອຸດສາຫະກຳ ແລະ ການຄ້າ ແຂວງ, ພະແນກກະສິກໍາ ແລະ ປ່າໄມ້ແຂວງ; ຕາງໜ້າພາກທຸລະກິດ: ສະພາການຄ້າ ແລະ ອຸດສາຫະກໍາແຂວງ, ຜູ້ປະກອບກິດຈະການໂຮງງານຂ້າສັດ, ຜູ້ປະກອບກິດຈະການນໍາເຂົ້າສັດ ແລະ ຊີ້ນສັດ, ຜູ້ປະກອບກິດຈະການຂາຍອາຫານສັດ, ຜູ້ປະກອບກິດຈະການຟາມລ້ຽງໝູ, ຜູ້ຊື້ຂາຍຊີ້ນໝູຈາກນະຄອນໄກສອນ ແລະ ເມືອງໃກ້ຄຽງ ແລະ ມີຜູ້ບັນຍາຍຈາກພາກສ່ວນຕ່າງໆຈາກສູນກາງ ແລະ ທ້ອງຖິ່ນ ລວມທັງໝົດ 35 ທ່ານ.

ຈຸດປະສົງ ເພື່ອສືບຕໍ່ການຮ່ວມທຸລະກິດລ້ຽງໝູ່ຂອງແຂວງສະຫວັນນະເຂດໃຫ້ມີຄວາມເຂັ້ມແຂງ ແລະ ສາມາດຮັບປະກັນໄດ້ເຖິງການສະໜອງຜະລິດຕະພັນຊີ້ນໝູທີ່ມີຄຸນນະພາບ ແລະ ໄດ້ມາດຕະຖານໃຫ້ແກ່ ຜູ້ບໍລິໂພກໂດຍສະເພາະ ນະຄອນໄກສອນ  ແລະ ບັນດາເມຶອງອອ້ມຂ້າງໃຫ້ພຽງພໍ ການຈັດຊຸດຝຶກອົບຮົມດັ່ງກ່າວນີ້ແມ່ນສືບຕໍ່ມາຈາກກອງປະຊຸມສຳມະນາ ການສ້າງການຮ່ວມກຸ່ມທຸລະກິດລ້ຽງໝູ ພາຍໃຕ້ໂຄງການສົ່ງເສີມຜະລິດເປັນສິນຄ້າ ແລະ ຄ້ຳສະບຽງອາຫານ ໃນລະຫວ່າງວັນ 05-09 ກໍລະກົດ 2021 ທີ່ແຂວງສະຫວັນນະເຂດ ທີ່ໄດ້ຈັດໄປແລ້ວນັ້ນ.

ໂດຍເນື້ອໃນການຝຶກອົບຮົມໃນຄັ້ງນີ້ແມ່ນເນັ້ນໃສ່ ການໃຫ້ຄວາມຮູ້ແກ່ຜູ້ປະກອບກິດຈະການ ໂດຍສະເພາະການສ້າງ ແຜນຍຸດທະສາດ ແລະ ການວາງແຜນພັດທະນາກຸ່ມທຸລະກິດ, ການໃຫ້ຄວາມສຳຄັນຂອງວຽກງານຜະລິດຕະພາບຕໍ່ກັບ ວນກ, ວິທີການລ້ຽງໝູທີ່ຖືກຕ້ອງຕາມເຕັກນິກຫຼັກວິຊາການ, ການບໍລິຫານຈັດການທຸລະກິດໝູຂະໜາດນ້ອຍ ແລະ ການເຂົ້າຫາແຫຼ່ງທຶນຂອງ ວນກ.

ສຳລັບການຝຶກອົບຮົມດັ່ງກ່າວກໍ່ເປັນໜື່ງໃນການຈັດຕັ້ງປະຕິບັດ ການຊຸກຍູ້ສົ່ງເສີມ ວິສາຫະກິດຂະໜາດນ້ອຍ ແລະ ກາງ ທີ່ມີບົດບາດຕໍ່ການພັດທະນາເສດຖະກິດສັງຄົມ ໂດຍສະເພາະ ການຜະລິດສິນຄ້າ, ການຄ້າ ແລະ ການບໍລິການ ເຊິ່ງເປັນສ່ວນໜື່ງເຂົ້າໃນການປະກອບເຂົ້າໃນໂຄງສ້າງເສດຖະກິດຂອງຊາດໃຫ້ມີການຂະຫຍາຍຕົວຢ່າງຕໍ່ເນື່ອງ ໂດຍທີ່ຜ່ານມາ ລັດຖະບານກໍ່ໄດ້ອອກນິຕິກຳ ແລະ ບັນດານະໂຍບາຍໃນການສົ່ງເສີມ ວນກ ເຊັ່ນ: ກົດໝາຍວ່າດ້ວຍການສົ່ງເສີມ ວນກ, ດຳລັດວ່າດ້ວຍການແບ່ງຂະໜາດ ວນກ ແລະ ດຳລັດວ່າດ້ວຍກອງທຶນສົ່ງເສີມ ວນກ. ນອກຈາກນີ້ ການສ້າງ ແລະ ການພັດທະນາຜູ້ປະກອບກິດຈະການ ກໍ່ເປັນໜື່ງໃນ 13 ກິດຈະກຳ ການສົ່ງເສີມ ວນກ ເຊິ່ງນອນໃນແຜນພັດທະນາ ວນກ 2016-2020 ເພື່ອໃຫ້ຫົວໜ່ວຍທຸລະກິດຂະໜາດນ້ອຍ ແລະ ກາງສາມາດປັບຕົວຕາມສະພາບໂລກາພິວັດ ທີ່ໄດ້ຮັບຜົນສະທ້ອນຈາກການລະບາດຂອງພະຍາກໂຄວິດ-19.

ແຫຼ່ງຂ່າວ: ກົມສົ່ງເສີມວິສາຫະກິດຂະໜາດນ້ອຍ ແລະ ກາງ

ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ