ຕອນບ່າຍໃນເວລາ 2:30 ໂມງ ຂອງວັນທີ 13 ກັນຍາ 2021, ທີ່ຫ້ອງຮັບແຂກໃຫຍ່ຊັ້ນ 04 ກະຊວງອຸດສາຫະກໍາ ແລະ ການຄ້າ, ທ່ານ ປອ. ຄໍາແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ Dinkar Asthana, ເອກອັກຄະລັດຖະທູດ ແຫ່ງປະເທດ ອົນເດຍ ປະຈຳ ສປປ ລາວ ໃນໂອກາດ ເຂົ້າພົບປະປຶກສາຫາລືດ້ານການຄ້າ ແລະ ການລົງທຶນຢູ່ ສປປ ລາວ ແລະ ທ່ານໄດ້ມາຮັບຕໍາແໜ່ງໃໝ່, ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 18 ທ່ານ.
ໂອກາດນີ້ ທ່ານ ປອ. ຄໍາແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍ້ອງຍໍຊົມເຊີຍຕໍ່ ທ່ານ Dinkar Asthana, ທີ່ໄດ້ມາດຳລົງຕຳແໜ່ງເປັນເອກອັກຄະລັດຖະທູດ ໃຫ້ແກ່ສອງປະເທດ ໃນໂອກາດເຂົ້າຢ້ຽມຂໍ່ານັບຄັ້ງນີ້ ທ່ານ ລັດຖະມົນຕີ ແລະ ເອກອັກຄະລັດຖະທູດ ຍັງໄດ້ສົນທະນາກ່ຽວກັບວຽກງານການຮ່ວມມືກັນ ລະຫວ່າງ ລາວ-ອິນເດຍ ໂດຍສະເພາະໃນໄລຍະ 6 ເດືອນ ຕົ້ນປີ 2021 ຜ່ານມາ, ມູນຄ່າການຄ້າສອງຝ່າຍ ລະຫວ່າງ ສປປ ລາວ ແລະ ອິນເດຍ ແມ່ນມີການຫຼຸດລົງທຽບໃສ່ 6 ເດືອນຕົ້ນປີຜ່ານມາໄປຕາມສະພາບການ ຊຶ່ງມີມູນຄ່າລວມທັງໝົດ 42,971,531 ໂດລາສະຫະລັດ, ໃນນັ້ນ ສປປ ລາວ ສົ່ງອອກແມ່ນ 21,940,982 ໂດລາ ແລະ ນຳເຂົ້າແມ່ນ 21,030,549 ໂດລາ.
ສິນຄ້າຫຼັກທີ່ ສປປ ລາວ ສົ່ງອອກໄດ້ແກ່: ຄຳປະສົມ, ຄຳແທ່ງ, ຢາງພາລາ, ໄມ້ແປຮູບ, ກາເຟ (ຍັງບໍ່ທັນປຸງແຕ່ງ), ຂີ້ຄັ່ງ, ຢາງໄມ້, ຂີ້ຊີ, ໂລຫະທຳມະຊາດ, ເຄື່ອງນຸ່ງຫົ່ມ, ເຄື່ອງເຟີນີເຈີ້ ແລະ ອື່ນໆ, ສະເພາະສິນຄ້າຫຼັກທີ່ ສປປ ລາວ ນຳເຂົ້າໄດ້ແກ່: ຜະລິດຕະພັນການຢາ (ເພສັດຊະກຳ), ພາຫະນະທາງບົກ (ນອກຈາກລົດໄຖນາ ແລະ ລົດຈັກ), ເຄື່ອງໄຟຟ້າ ແລະ ອຸປະກອນໄຟຟ້າ, ອຸປະກອນລົດຈັກ, ຝ້າຍ ແລະ ຜະລິດຕະພັນຈາກຝ້າຍ, ເຄື່ອງນຸ່ງຫົ່ມ ແລະ ອື່ນໆ. ເພື່ອເຮັດໃຫ້ການພົວພັນໃນຂະແໜງອຸດສາຫະກຳ ແລະ ການຄ້າ ລະຫວ່າງ ລາວ - ອິນເດຍ ນັບມື້ນັບຂະຫຍາຍຕົວ ແລະ ເຂົ້າສູ່ລວງເລິກ ສະເໜີໃຫ້ມີການແລກປ່ຽນຂໍ້ມູນ ລະຫວ່າງ ນັກທຸລະກິດ ລາວ-ອິນເດຍ ຢ່າງເປັນປະຈຳຜ່ານສະຖານທູດ ຫຼື ກອງປະຊຸມພົບປະຂອງສອງປະເທດ ເພື່ອດຶງດູດນັກລົງທຶນ ໃຫ້ນັບມື້ນັບຫຼາຍຂຶ້ນ ພ້ອມທັງຊອກຫາຊ່ອງທາງ ໃນການສົ່ງອອກສິນຄ້າຂອງລາວໄປຍັງຕະຫຼາດອິນເດຍອີກ. ນອກຈາກນີ້, ຍັງມີການແລກປ່ຽນບົດຮຽນ ເພື່ອສຶກສາຄວາມເປັນໄປໄດ້ໃນການຮ່ວມມືພັດທະນາອຸດສາຫະກຳປຸງແຕ່ງສິນຄ້າກະສິກຳ, ອຸດສາຫະກຳ, ICT ແລະ ອື່ນໆ.
ທ່ານ Dinkar Asthana, ເອກອັກຄະລັດຖະທູດ ໄດ້ສະເໜີໃນຕໍ່ໜ້າຈະໃຫ້ການຮ່ວມມື, ລາວ-ອິນເດຍແລະ ອຳນວຍຄວາມສະດວກໃນວຽກງານຫຼາຍດ້ານ ເພື່ອໃຫ້ເກີດດອກອອກຜົນປະໂຫຍດ ແກ່ສອງປະເທດ.
ພາບ-ຂ່າວ: ໄພຄໍາອີ
ສູນສະຖິຕິ ແລະ ຂໍ້ມູນຂ່າວສາ ກຜຮ, ອຄ,
