ວັນທີ 15 ກັນຍາ 2021 ນີ້ ຢູ່ທີ່ຫ້ອງປະຊຸມພະແນກອຸດສາຫະກໍາ ແລະ ການຄ້າ ສະຫາຍ ອູ່ແສງ ເພັດຊະວົງ ຮອງປະທານຄະນະກວດກາພັກແຂວງອຸດົມໄຊ, ໄດ້ລົງຕິດຕາມ, ຊຸກຍູ້ ການນຳພາ-ຊີ້ນຳ ຂອງໜ່ວຍພັກຮາກຖານ ພະແນກອຸດສາຫະກຳ ແລະ ການຄ້າແຂວງ. ເປັນກຽດເຂົ້າຮ່ວມມີ ສະຫາຍ  ສອນທະນູ ສິງດາລາ ເລຂາໜ່ວຍພັກຮາກຖານ, ຫົວໜ້າພະແນກອຸດສາຫະກຳ ແລະ ການຄ້າ ພ້ອມດ້ວຍຄະນະພັກ ແລະ ຫົວໜ້າຈຸພັກເຂົ້າຮ່ວມ.

      ກອງປະຊຸມ ສະຫາຍ ນ ໄມພອນ ສີລິວົງ ປະທານກວດກາໜ່ວຍພັກ ຮອງຫົວໜ້າພະແນກອຸດສາຫະກຳ ແລະ ການຄ້າ ກໍ່ໄດ້ລາຍງານເຖິງຜົນສຳເລັດສະພາບການນຳພາ, ຊີ້ນຳ ຂອງໜ່ວຍພັກໃນໄລຍະຜ່ານມາ ໂດຍຍົກໃຫ້ເຫັນ ຜົນງານໃນແຕ່ລະດ້ານ ເຊັ່ນ: ດ້ານການເມືອງນຳພາແນວຄິດ, ດ້ານແບບແຜນນຳພາ ແລະ ວິທີແກ້ໄຂ, ດ້ານນຳພາວຽກງານກໍ່ສ້າງພັກ, ກໍ່ສ້າງພະນັກງານ, ວຽກງານກວດກາພັກ, ວຽກງານອົງການຈັດຕັ້ງມະຫາຊົນ, ວຽກງານນຳພາຈັດຕັ້ງເຄື່ອນໄຫວວິຊາສະເພາະ, ວຽກງານ ປກຊ-ປກສ ແລະ ດ້ານການພົວພັນຮ່ວມມືກັບຕ່າງປະເທດ. ຂະນະດຽວກັນກໍ່ໄດ້ຍົກໃຫ້ເຫັນດ້ານອ່ອນ, ຂໍ້ຄົງຄ້າງ ແລະ  ຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານຜ່ານມາທີ່ເປັນສາເຫດເຮັດໃຫ້ບາງວຽກງານບໍ່ໄດ້ຮັບຜົນສຳເລັດຕາມລະດັບຄາດຫມາຍ. ໂອກາດດຽວກັນຄະນະໜ່ວຍພັກ ແລະ ຫົວໜ້າຈຸພັກກໍ່ໄດ້ພ້ອມກັນປະກອບຄໍາຄິດເຫັນ ແລະ ແລກປ່ຽນບົດຮຽນຢ່າງເປັນຂະບວນຟົດຟື້ນ.   

ພາບ-ຂ່າວ: ໂພໄຊ ໄຊຍະວົງ ພະແນກອຄ ແຂວງອຸດົມໄຊ

ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ