ກະຊວງອຸດສາຫະກຳ ແລະ ການຄ້າ(ອຄ) ສົມທົບກັບພະແນກ ອຸດສາຫະກຳ ແລະ ການຄ້ານະຄອນຫຼວງວຽງຈັນ(ອຄ.ນວ) ລົງຕິດຕາມ ແລະ ຊຸກຍູ້ວຽກງານ ອຄ ພາຍໃນນະຄອນຫຼວງວຽງຈັນ ໂດຍເນັ້ນໃຫ້ເຈົ້າໜ້າທີ່ ການຄ້າເອົາໃຈໃສ່ເພີ່ມທະວີການກວດກາການຄ້າ ບໍ່ໃຫ້ມີການສວຍໂອກາດຂຶ້ນລາຄາສິນຄ້າ, ຜູ້ປະກອບການຊາວຄ້າຂາຍ ມີມາດຕະການທີ່ດີໃນການປ້ອງກັນໂຄວິດ-19, ສ່ວນໂຮງງານ ອຸດສາຫະກຳໃຫ້ເຂັ້ມງວດມາດຕະການປ້ອງກັນໂຄວິດ-19.
ຕອນເຊົ້າເວລາ 9: 00 ໂມງ ຂອງວັນທີ 6 ຕຸລາ 2021 ທ່ານ ຄໍາແພງ ໄຊສົມແພງ ລັດຖະມົນຕີກະຊວງ ອຄ ພ້ອມຄະນະລົງເຮັດວຽກຢູ່ພະແນກ ອຄ.ນວ, ໂຮງງານຕັດຫຍິບ ໄຮ -ເທັກ ລາວ ແອບພາເຣວ ຈໍາກັດ ແລະ ຕະຫຼາດ ໂນນຄໍ້ ເພື່ອຕິດຕາມ ແລະ ຊຸກຍູ້ໃນການຄຸ້ມຄອງລາຄາສິນຄ້າ, ມາດຕະການປ້ອງກັນພະຍາດໂຄວິດ-19 ພາຍໃນຕະຫຼາດ ແລະ ໂຮງງານອຸດສາຫະກຳຕັດຫຍິບ.

ໂອກາດດັ່ງກ່າວ ທ່ານ ນາງ ວັນມະນີ ພິມມະສານ ຫົວນ້າພະແນກ ອຄ.ນວ ໄດ້ລາຍງານສະພາບການຄຸ້ມຄອງ ແລະ ຕິດຕາມລາຄາສິນຄ້າໃນໄລຍະຜ່ານມາໃຫ້ຮູ້ວ່າ: ວຽກງານການຄຸ້ມຄອງ ຕິດຕາມຂົງເຂດຫົວນ່ວຍທຸລະກິດ ໃນໄລຍະປ້ອງກັນການແຜ່ລະບາດຂອງພະຍາດໂຄວິດ-19 ໂດຍໄດ້ແຕ່ງເຈົ້າໜ້າທີ່ເປັນ 3 ຈຸລົງກວດກາແຕ່ລະວັນ, ການປະເມີນການປະຕິບັດໄລຍະວັນທີ 15-30 ກັນຍາ 2021 ເຈົ້າຂອງທຸລະກິດສ່ວນໃຫຍ່ໃຫ້ການຮ່ວມມືໃນການປິດ – ເປີດກິດຈະການ, ມີສ່ວນໜ້ອຍທີ່ຍັງບໍ່ທັນເຂົ້າໃຈ ຍັງເປີດຮ້ານປົກະຕິ ຄະນະສະເພາະກິດໄດ້ເຮັດບົດບັນທຶກ ໃຫ້ປິດກິດຈະການຊົ່ວຄາວ ຈໍານວນ 19 ຫົວນ່ວຍ ພ້ອມທັງປັບໃໝ. ສ່ວນສະພາບການຊື້ຂາຍໂດຍລວມເຫັນວ່າປະຕິບັດຕາມລາຄາທີ່ລັດກໍານົດ ແຕ່ມີສ່ວນໜຶ່ງມີການສວຍໂອກາດຂຶ້ນລາຄາສິນຄ້າ ເປັນຕົ້ນຊິ້ນໝູຂາຍເກີນລາຄາ ເຊິ່ງເຈົ້າໜ້າທີ່ໄດ້ເຮັດບົດບັນທຶກກ່າວເຕືອນ ສຶກສາອົບຮົມ ແລະ ປັບໃໝ(ການຂາຍເກີນລາຄາສ່ວນຫຼາຍແມ່ນຕະຫຼາດຂະໜາດນ້ອຍ ຊື່ຍ່ອຍຈາກລູກຂຽງຕະຫຼາດໃຫຍ່) . ສ່ວນການຊື້ຂາຍທຽບໃສ່ໄລຍະປົກະຕິຫຼຸດລົງ35-40% ເຫັນວ່າຕະຫຼາດ ແລະ ຊາວຄ້າຂາຍໃຫ້ການຮ່ວມມືຕາມແຈ້ງການແນະນໍາ ໄດ້ປິດບໍລິການຊົ່ວຄາວ ເພື່ອຫຼຸດຜ່ອນຄວາມແອອັດ. ສ່ວນການສະໜອງສິນຄ້າເຫັນວ່າພຽງພໍກັບຄວາມຕ້ອງການໂດຍສະເພາະສິນຄ້າສະບຽງອາຫານ ທີ່ນອນໃນບັນຊີຄວບຄຸມ ມີປະເພດຊິ້ນໝູທີ່ຂາຍຫຼຸດຈາກລາຄາກໍານົດ ຊີ້ນໝູປະເພດ 1 ລາຄາ 48 ພັນກີບຕໍ່ກີໂລ ຂາຍໃນຕະຫຼາດ 45 ພັນກີບຕໍ່ກີໂລ. ສໍາລັບລາຄາສິນຄ້າພຶດຜັກ ແມ່ມີການເໜັງຕີງຂຶ້ນລົງຕາມລະດູການເປັນບາງວັນ ສະເລ່ຍມີ 3 ລາຍການເໜັງຕີງສູງ ຄື ຜັກຫອມປ້ອມ, ຫອມບົ່ວ, ຫອມລາບ ປະມານ 50%.

  ວຽກງານຄຸ້ມຄອງ ແລະ ຕິດຕາມໂຮງງານອຸດສາຫະກຳ ຢູ່ນວ ມີໂຮງງານອຸດສາຫະກຳ 3.330 ໂຮງງານ ມູນຄ່າການລົງທຶນ 5.410.000.285.000.000 ກີບ ແຮງງານທັງໝົດ 66.572 ຄົນ ເປັນຍິງ 35.568 ຄົນ.
ໂອກາດດັ່ງກ່າວ ທ່ານລັດຖະມົນຕີ ກະຊວງ ອຄ ພ້ອມຄະນະໄດ້ລົງຕິດຕາມ ແລະ ຊຸກຍູ້ມາດຕະການຄຸ້ມຄອງ ແລະ ປ້ອງກັນພະຍາດໂຄວິດ-19 ຢູ່ໂຮງງານ ໄຮ – ເທັກ ລາວ ແອບພາເຣວ ຈໍາກັດ ບ້ານໂພນປ່າເປົ້າ ເມືອງ ສີສັດຕະນາດ ແລະ ລົງຕິດຕາມສະພາບການປ້ອງກັນໂຄວິດ -19 ແລະ ການຊື້ຂາຍໃນຕະຫຼາດໂນນຄໍ້ ເມືອງໄຊເສດຖາ ນະຄອນຫຼວງວຽງຈັນ.

       ໂອກາດດັ່ງກ່າວ ທ່ານ ຄໍາແພງ ໄຊສົມແພງ ກໍ່ໄດ້ສະແດງຄວາມຊົມເຊີຍເຈົ້າໜ້າທີ່ກວດກາການຄ້າ ທີ່ເອົາໃຈໃສ່ຕິດຕາມ ແລະ ກວດກາການຄ້າໃນທ້ອງຕະຫຼາດ ໃນໄລຍະທີ່ມີການລະບາດຂອງໂຄວິດ-19 ພ້ອມເນັ້ນໃຫ້ຈັດສັນຄວາມເປັນລະບຽບຂອງການຄ້າຂາຍ, ເອົາໃຈໃສ່ເພີ່ມທະວີໃນການຕິດຕາມ ແລະ ຄຸ້ມຄອງລາຄາສິນຄ້າ ວາງມາດຕະການເຂັ້ມ ໃຫ້ແມ່ຄ້າໃນຕະຫຼາດ ແລະ ມາດຕະການຕໍ່ຜູ້ເຂົ້າມາໃຊ້ຕະຫຼາດ ເພື່ອບໍ່ໃຫ້ມີການລະບາດໃນ ຕະຫຼາດ, ພ້ອມນັ້ນກໍ່ເນັ້ນ ໃຫ້ເຈົ້າໜ້າທີ່ຂະແໜງອຸດສາຫະກຳ ແລະ ຫັດຖະກໍາ ເອົາໃຈໃສ່ລົງຕິດຕາມ ແລະ ຊີນໍາບັນດາໂຮງຈັກໂຮງງານອຸດສາຫະກຳ ເພື່ອພ້ອມກັນມີມາດຕະການທີເໝາະສົມ ເດັດຂາດ ແນໃສ່ສະກັດກັ້ນການແຜ່ລະບາດໃນໂຮງງານອຸດສາຫະກຳ.

ແຫຼ່ງຂ່າວ-ພາບ: ໄດ້ມາຈາກຫ້ອງການ ກະຊວງ ອຄ.

ຮຽບຮຽງໂດຍ: ໄພຄໍາອີ ສູນສະຖິຕິ ແລະ ຂໍ້ມູນຂ່າວສານ ກຜຮ/ ກະຊວງ ອຄ.