ຕອນເຊົ້າ ເວລາ 11: 00 ໂມງ ຂອງວັນທີ 09 ພະຈິກ 2021 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ, ທ່ານ ປອ. ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການເຂົ້າຢ້ຽມອໍາລາຂອງ ທ່ານ Katsuichi IWAKAMI, ຫົວໜ້າອົງການສົ່ງເສີມການຄ້າຍີ່ປຸ່ນ (JETRO) ປະຈຳ ສປປ ລາວ ພ້ອມຄະນະ, ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 13 ທ່ານ.
ໂອກາດນີ້ ທ່ານ ປອ. ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ໄດ້ຕີລາສູງຕໍ່ ທ່ານຫົວໜ້າອົງການສົ່ງເສີມການຄ້າຍີ່ປຸ່ນ ປະຈໍາ ສປປ ລາວ ທີ່ເຮັດໃຫ້ ລັດຖະບານສອງປະເທດລາວ-ຍີ່ປຸ່ນ ໄດ້ເສີມຂະຫຍາຍການພົວພັນທີ່ດີ ຊຶ່ງກັນ ແລະ ກັນ, ການຮ່ວມມືປະສານງານກັນໃນບັນດາໂຄງການໄລຍະຜ່ານມາ ເປັນຕົ້ນ ການຮ່ວມມືດ້ານການຄ້າ, ການສ້າງໂອກາດຈັບຄູ່ຄ້ານັກທຸລະກິດລາວ ແລະ ຍີ່ປຸ່ນ (Matching), ການສົ່ງເສີມວຽກງານຫັດຖະກໍາ ແລະ ວຽກງານສົ່ງເສີມ ໜຶ່ງເມືອງໜຶ່ງຜະລິດຕະພັນ(ODOP) ຂອງລາວ, ການຝຶກອົບຮົມການພັດທະນາສິນຄ້າ ແລະ ອື່ນໆ. ໃນນີ້: ທ່ານຫົວໜ້າອົງການ ສົ່ງເສີມການຄ້າຍີ່ປຸ່ນ ຜູ້ເກົ່າໄດ້ສະເໜີ ທ່ານຫົວໜ້າອົງການ ສົ່ງເສີມການຄ້າຍີ່ປຸ່ນ ຜູ້ໃໝ່ຈະສືບຕໍ່ໃຫ້ການຮ່ວມມື, ການປະສານງານວຽກງານຕ່າງໆໃນຕໍ່ໜ້າ ພ້ອມດຽວກັນນີ້ ກໍ່ຂອບໃຈມາຍັງທ່ານລັດຖະມົນຕີກະຊວງ ອຄ ທີ່ໄດ້ໃຫ້ການຕ້ອນຮັບເປັນຢ່າງດີ ແລະ ໃຫ້ຄຳປຶກສາສິ່ງອຳນວຍຄວາມສະດວກໃນວຽກງານຫຼາຍດ້ານແກ່ ຂ້າພະເຈົ້າໃນໄລຍະທີ່ປະຈໍາ ຢູ່ສປປ ລາວ. ທ້າຍນີ້, ທ່ານ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ສະແດງຄວາມຂອບໃຈມາຍັງ ທ່ານ Katsuichi IWAKAMI ທີ່ມີຄວາມຄິດເຫັນຢ່າງຈົບງາມ ໃນໄລຍະການປະຕິບັດໜ້າທີ່ປະຈໍາຢູ່ ສປປ ລາວ ພ້ອມທັງອວຍພອນໄຊໃຫ້ທ່ານຈົ່ງເດີນທາງກັບຄືນປະເທດດ້ວຍຄວາມສະຫວັດດີພາບ ແລະ ສົ່ງເສີມສາຍພົວພັນ ແລະ ການຮ່ວມມື ລະຫວ່າງ ສອງປະເທດໃຫ້ຫຼາຍຂຶ້ນ ດ້ວຍໄມຕີຈິດມິດຕະພາບ.
ພາບ-ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
