ເພື່ອຈັດຕັງປະຕິບັດຄໍາສັ່ງ ຂອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ເລກທີ 2501/ອຄ.ຄພນ, ລົງວັນທີ 16 ທັນວາ 2015 ກ່ຽວກັບການຕິດສະຫຼາກສິນຄ້າເປັນພາສາລາວ ໃຫ້ມີປະສິດທິຜົນ. ໃນວັນທີ 07 ມີນາ 2022, ທ່ານ ພູວຽງ ພົງສາ ຮັກສາການຫົວໜ້າກົມການຄ້າພາຍໃນ, ກະຊວງອຸດສາຫະກຳ ແລະ ການຄ້າ ແລະ ພະແນກອຸດສາຫະກຳການຄ້າ ນະຄອນຫຼວງວຽງຈັນ ພ້ອມດ້ວຍຄະນະໄດ້ລົງຕິດຕາມ ແລະ ເຮັດວຽກນຳບັນດາຫົວໜ່ວຍທຸລະກິດທີ່ນຳເຂົ້້າສິນຄ້າອຸປະໂພກ ແລະ ບໍລິໂພກ ມາຈຳໜ່າຍໃນ ສປປ ລາວ.
ຈຸດປະສົງການລົງໄປຄັ້ງນີ້ແມ່ນເພື່ອລົງຕິດຕາມການຈັດຕັ້ງປະຕິບັດການຕິດສະຫຼາກສິນຄ້າເປັນພາສາລາ, ຂອງສອງບໍລິສັດຄື: ບໍລິສັດ ສົມບູນການຄ້າ ຂາອອກ-ຂາເຂົ້າ ຈຳກັດຜູ້ດຽວ ແລະ ບໍລິສັດ ຊີໄອການຄ້າ ຂາອອກ-ຂາເຂົ້າ ຈຳກັດຜູ້ດຽວ ເພື່ອຮັບປະກັນຜົນປະໂຫຍດ, ຄວາມປອດໄພຂອງຜູ້ຊົມໃຊ້ຈາກຜົນກະທົບທາງລົບທີ່ເນື່ອງມາຈາກຊົມໃຊ້ສິນຄ້າ ແລະ ການບໍລິການ, ສົ່ງເສີມການຜະລິດພາຍໃນ, ການນໍາເຂົ້າ, ການຈໍາໜ່າຍສິນຄ້າ ແລະ ການບໍລິການໃຫ້ມີຄຸນນະພາບ, ໄດ້ມາດຕະຖານ, ຖືກຕ້ອງ ແລະ ສອດຄ່ອງກັບລະບຽບກົດໝາຍ ຊຶ່ງເຫັນວ່າທັງສອງບໍລິສັດດັ່ງກ່າວສາມາດປະຕິບັດຕາມຄຳສັ່ງ 2501 ໄດ້ດີພ້ອມນີ້ກໍຍັງຮັບຟັງການລາຍງານຂໍ້ສະດວກ, ຂໍ້ຫຍຸ້ງຍາກ ຂອງບັນດາຫົວໜ່ວຍທຸລະກິດກ່ຽວກັບການຈັດຕັ້ງປະຕິບັດໃນໄລຍະຜ່ານມາ ເຫັນວ່າຍັງມີຫຼາຍບໍລິສັດທີ່ຍັງປະຕິ ບັດບໍ່ທັນໄດ້ດີເທົ່າທີ່ຄວນ ຍັງມີສິນຄ້າທີ່ບໍ່ທັນໄດ້ຕິດສະຫຼາກສິນຄ້າເປັນພາສາລາວຢູ່ຕາມຫ້າງຮ້ານ, ຊຸບເປີມາເກັດ, ມິນິມາກ.
ກ່ຽວກັບບັນຫານີ້ ກະຊວງອຸດສາຫະກໍາ ແລະ ການຄ້າ ກໍຄືກົມການຄ້າພາຍໃນຈະເອົາໃຈໃສ່ສົມທົບກັບພາກສວ່ນກ່ຽວຂ້ອງລົງຕິດຕາມຊຸກຍູ້ການຕິດສະຫຼາກສິນຄ້າເປັນພາສາລາວໃຫ້ໄດ້ຮັບປະສິດທິຜົນ.
ພາບ-ຂ່າວ: ກົມການຄ້າພາຍໃນ ກະຊວງ ອຄ.
ຮຽບຮຽງ: ໂດຍ ໄພຄໍາອີ
