ໃນວັນທີ 09 ພຶດສະພາ 2022 ກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມສໍາມະນາເປີດໂຕໂຄງການຍົກລະດັບການແຂ່ງຂັນຂອງຂະແໜງທຸລະກິດກະສິກໍາ ໂດຍຜ່ານການຢັ້ງຢືນການຜະລິດທີ່ດີ, ລະບົບວິເຄາະ ແລະ ຄວບຄຸມຈຸດວິກິດ (Enhancing Competitiveness of Agri-Business Sector Through Certification of GMP and HACCP) ແລະ ຄັດເລືອກບໍລິສັດ/ໂຮງງານ ເພື່ອມາເປັນຕົວແບບດ້ານ GMP /HACCP ໃຫ້ໄດ້ຮັບການຢັ້ງຢືນ. ກອງປະຊຸມໃນຄັ້ງນີ້ໄດ້ຮັບກຽດການເປັນປະທານຂອງ ທ່ານ ບຸນເຖິງ ດວງສະຫວັນ, ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ ພ້ອມດ້ວຍທ່ານ ພູທົງ ຄໍາມະນີວົງ ຮອງເຈົ້າແຂວງໆສາລະວັນ. ນອກຈາກນີ້ຍັງມີຜູ້ຕາງໜ້າຈາກຂະແໜງການ ທີ່ກ່ຽວຂ້ອງຂອງແຂວງ ແລະ ແຂກທີ່ຖຶກເຊີນຈໍານວນໜຶ່ງເຂົ້າຮ່ວມພິທີດັ່ງກ່າວ.

      ການຈັດຕັ້ງປະຕິບັດໂຄງການດັ່ງກ່າວໂດຍ ແມ່ນກົມສົ່ງເສີມວິສາຫະກິດຂະໜາດນ້ອຍ ແລະ ກາງ ສົມທົບກັບພະແນກອຸດສາຫະກໍາ ແລະ ການຄ້າແຂວງ ແລະ ຜູ້ປະກອບກິດຈະການ ຊຶ່ງໂຄງການດັ່ງກ່າວແມ່ນຈະຈັດຕັ້ງປະຕິບັດຢູ່ໃນ 03 ແຂວງຄື: ແຂວງສາລະວັນ, ແຂວງຈໍາປະສັກ ແລະ ແຂວງຫຼວງນໍ້າທາ.

      ຈຸດປະສົງຫຼັກຂອງໂຄງການດັ່ງກ່າວແມ່ນ ການສ້າງບຸກຄະລາກອນ ຂອງແຂວງໃຫ້ເປັນຊ່ຽວຊານດ້ານທີ່ປຶກສາ GMP /HACCP; ການສ້າງຄວາມເຂັ້ມແຂງໃຫ້ຜູ້ປະກອບກິດຈະການ ຂອງແຂວງໂດຍສະເພາະຫົວໜ່ວຍ SME ໃຫ້ໄດ້ຮັບການປັບປຸງທາງດ້ານຜະລິດຕະພາບ (Productivity) ແລະ ການຍົກລະດັບມາດຕະຖານຜະລິດຕະພາບໃຫ້ໄດ້ຮັບການຢັ້ງຢືນການຜະລິດທີ່ດີ ແລະ ລະບົບວິເຄາະ ແລະ ຄວບຄຸມຈຸດວິກິດ (GMP /HACCP); ລະບົບການຢັ້ງຢືນດັ່ງກ່າວນັ້ນຍັງຊ່ວຍຫຼຸດຜ່ອນຕົ້ນທຶນການຜະລິດ  ແລະ ສ້າງມູນຄ່າເພີ່ມໃຫ້ແກ່ຜະລິດສິນຄ້າ ເພື່ອສະໜອງຄວາມຕ້ອງການຂອງຕະຫຼາດທັງພາຍໃນແຂວງ ແລະ ສົ່ງເສີມການສົ່ງອອກໃນຕໍ່ໜ້າ.

       ໂຄງການດັ່ງກ່າວໄດ້ຮັບການສະໜັບສະໜູນໂດຍ ກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ ໂດຍຜ່ານກົມເສດຖະກິດ, ກະຊວງການຕ່າງປະເທດ, ມູນຄ່າໂຄງການທັງໝົດແມ່ນ 138.000 ໂດລາສະຫະລັດ.

ແຫລ່ງຂ່າວ: ກົມສົ່ງເສີມວິສາຫະກິດຂະໜາດນ້ອຍ ແລະ ກາງ

ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ