ຕອນບ່າຍ ວັນທີ 30 ພຶດສະພາ 2022, ທີ່ຫ້ອງປະຊຸມທາງໄກຊັ້ນ 3 ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ, ໄດ້ຈັດກອງປະຊຸມການຄ້າສິນຄ້າ ລາວ-ຫວຽດນາມຂຶ້ນ ໂດຍການເປັນປະທານ ທ່ານ ໂດ໊ ກວ໊ກ ຫຶງ, ຮອງຫົວໜ້າກົມຕະຫຼາດອາຊີ-ອາຟຣິກາ, ກະຊວງ ອຸດສາຫະກຳ ແລະ ການຄ້າ ສສ ຫວຽດນາມ ແລະ ປະທານຮ່ວມ ທ່ານ ຈິດຕະພົງ ອັກຄະວົງ, ຮອງຫົວໜ້າກົມແຜນການ ແລະ ການຮ່ວມມື, ກະຊວງອຸດສາຫະກຳ ແລະ ການຄ້າ ສປປ ລາວ ມີຜູ້ຕາງໜ້າຈາກບັນດາກົມກ່ຽວຂ້ອງ, ທີ່ປຶກສາຝ່າຍເສດຖະກິດການຄ້າ, ສະມາຄົມນັກທຸລະກິດໜຸ່ມ, ບັນດາທຸລະກິດນໍາເຂົ້າ-ສົ່ງອອກ ຂອງສອງປະເທດເຂົ້າຮ່ວມປະມານ 50 ທ່ານ.
ກອງປະຊຸມຄັ້ງນີ້ ແມ່ນເພື່ອເປັນການຈັດຕັ້ງຜັນຂະຫຍາຍເນື້ອໃນຈິດໃຈ ຂອງສອງນາຍົກລັດຖະມົນຕີ ແຫ່ງ ສປປ ລາວ ແລະ ສສຫວຽດນາມ ທີ່ໄດ້ມອບໝາຍໃຫ້ສອງກະຊວງ ອຸດສາຫະກຳ ແລະ ການຄ້າ ລາວ ແລະ ຫວຽດນາມ ຮ່ວມກັນປຶກສາຫາລື ກ່ຽວກັບ ບັນດາສິນຄ້າທີ່ລາວ ແລະ ຫວຽດນາມ ຈະສາມາດສະໜອງໃຫ້ກັນ ເພື່ອເພີ່ມມູນຄ່າການຄ້າສອງຝ່າຍ ໃຫ້ເພີ່ມຂຶ້ນ 10% ຕໍ່ປີ.
ທ່ານ ຈິດຕະພົງ ອັກຄະວົງ ໄດ້ນໍາສະເໜີບົດໂດຍຫຍໍ້ ກ່ຽວກັບ ທ່າແຮງ ແລະ ກາລະໂອກາດ ໃນການຮ່ວມມືດ້ານການຄ້າ ລະຫວ່າງ ລາວ ແລະ ຫວຽດນາມ,ໂດຍອີງໃສ່ສະຖານະພາບ ແລະ ຄວາມເປັນຈິງຂອງປະເທດ ເພື່ອແນໃສ່ບັນລຸເປົ້າໝາຍໃນການສົ່ງເສີມການຄ້າດັ່ງກ່າວ, ລັດຖະບານແຫ່ງ ສປປ ລາວ ໄດ້ສ້າງນະໂຍບາຍ ແລະ ກົນໄກການສົ່ງເສີມ ແລະ ອໍານວຍຄວາມສະດວກຕ່າງໆ ເປັນຕົ້ນແມ່ນ ນະໂຍບາຍແຫ່ງການເຊື່ອມຈອດ ໂດຍການຫັນປະເທດຈາກ “ປະເທດທີ່ບໍ່ມີທາງອອກສູ່ທະເລ” ມາເປັນ “ປະເທດເຊື່ອມຕໍ່”, ການເພີ່ມທະວີການຮ່ວມມືລະຫວ່າງປະເທດ, ປະເທດບ້ານໃກ້ເຮືອນຄຽງ, ກັບບັນດາປະເທດຮ່ວມຍຸດທະສາດ.
ສອງປະເທດ ລາວ ແລະ ຫວຽດນາມ ມີຊາຍແດນຕິດຈອດກັນ ຍາວແຕ່ເໜືອຮອດໃຕ້ ແລະ ການຜະລິດສິນຄ້າຂອງສອງປະເທດກໍ່ນັບມື້ນັບເພີ່ມທະວີ, ຫຼາກຫຼາຍ, ມີລັກສະນະສະເພາະ ແລະ ໄດ້ຮັບການປັບປຸງຄຸນນະພາບເປັນກ້າວໆ ຊຶ່ງເຮັດໃຫ້ໄດ້ຮັບຄວາມສົນໃຈຂອງປະຊາຊົນສອງປະເທດ. ໃນດ້ານການພົວພັນການຄ້າ ຂອງສອງປະເທດ, ສ່ວນໃຫ່ຍແມ່ນປະຕິບັດພາຍໃຕ້ຂອບສັນຍາການຄ້າ ວ່າດ້ວຍຜະລິດຕະພັນ ATIGA, ສັນຍາການຄ້າສອງຝ່າຍ ລາວ-ຫວຽດນາມ ຊຶ່ງປະຈຸບັນແມ່ນສະບັບປີ 2015 (ກໍາລັງປັບປຸງໃຫ້ສອດຄ່ອງກັບສະພາບຕົວຈິງຕື່ມ ແລະ ຈະໄດ້ເຊັນທ້າຍປີ 2022 ນີ້) ແລະ ການຊື້-ຂາຍ ຂອງປະຊາຊົນທີ່ອາໄສ ຢູ່ຕາມຊາຍແດນ.
ພາຍໃຕ້ສັນຍາການຄ້າສອງຝ່າຍນັ້ນ, ການສົ່ງອອກສິນຄ້າ ຈາກ ສປປ ລາວ ໄປ ສສ ຫວຽດນາມ ແມ່ນຈະໄດ້ຮັບການຍົກເວັ້ນພາສີນໍາເຂົ້າ, ຖ້າປະລິມານການສົ່ງອອກບໍ່ເກີນໂກຕ້ານໍາເຂົ້າລວມ ຂອງຫວຽດນາມ. ສ່ວນໃນຂອບການຮ່ວມມື ATIGA ແລະ BTA ສອງຝ່າຍ ໄດ້ນຳເອົາລາຍການສິນຄ້າມາຫຼຸດອັດຕາພາສີຂາເຂົ້າຢ່າງຫຼວງຫຼາຍ. ທຸກລາຍການສິນຄ້າ ທີ່ມີແຫຼ່ງກຳເນີດຈາກ ສປປ ລາວ ຈະໄດ້ຮັບການຍົກເວັ້ນພາສີນຳເຂົ້າ ຈາກຫວຽດນາມ. ນອກຈາກລາຍການສິ
ນຄ້າ ທີ່ນອນໃນບັນຊີສິນຄ້າອ່ອນໄຫວ (SL) ແມ່ນໄດ້ຮັບການຫຼຸດຜ່ອນອັດຕາພາສີນໍາເຂົ້າ 50% ຈາກອັດຕາພາສີ ທີ່ຫວຽດນາມ ກຳນົດໃນຂອບການ
ຄ້າເສລີອາຊຽນ ຊື່ງມີທັງໝົດ 27 ລາຍການ. ນອກຈາກນັ້ນ ສປປ ລາວ ຍັງໄດ້ຮັບສິດທິພິເສດ ດ້ານປະລິມານໂກຕ້ານຳເຂົ້າ ໄປຫວຽດນາມ ສຳລັບສິນຄ້າກະທົບໄວ ເປັນຕົ້ນ ເຂົ້າ, ໃບຢາສູບ.
ພ້ອມດຽວກັນນັ້ນ, ພາຍໃຕ້ນະໂຍບາຍການສົ່ງເສີມ ແລະ ການສ້າງສິ່ງອໍານວຍຄວາມສະດວກດັ່ງກ່າວ:
- ບັນດາແຂວງ ໄດ້ເປັນເຈົ້າການໃນການສ້າງກົນໄກການປະສານງານ ລະຫວ່າງ ແຂວງຕໍ່ແຂວງ ແລະ ເປັນເງື່ອນໄຂ ໃຫ້ບັນດາພະແນກອຸດສາຫະກຳ ແລະ ການຄ້າ ຂອງບັນດາຄູ່ແຂວງ ທີ່ມີຊາຍແດນຕິດຈອດກັນ, ສ້າງເງື່ອນໄຂສະດວກ ໃນການແລກປ່ຽນຂໍ້ມູນຂ່າວສານ ແລະ ການປະສານແກ້ໄຂບັັນຫາຮ່ວມກັນໄດ້ດີຂຶ້ນ;
- ເຮັດໃຫ້ແນວໂນ້ມບັນດາຫົວໜ່ວຍທຸລະກິດທັງສອງປະເທດ ຫັນມານໍາໃຊ້ສິດທິພິເສດທາງດ້ານການຄ້າ ນໍາໃຊ້ຟອມ S ແລະ ຟອມ D ເພີ່ມຂຶ້ນ ອັນສະແດງໃຫ້ເຫັນເຖິງຜົນສໍາເລັດໃນການຮ່ວມມື ຂອງຂະແໜງການຄຸ້ມຄອງ ເຮັດໃຫ້ມູນຄ່າການຄ້າສອງຝ່າຍ ນັບມື້ນັບເພີ່ມຂຶ້ນ;
- ການສົ່ງອອກສິນຄ້າ ຂອງປະຊາຊົນ ແລະ ພາກທຸລະກິດ ຢູ່ເມືອງຊາຍແດນຝ່າຍລາວ ແມ່ນໄດ້ຮັບຄວາມສະດວກໂດຍການນໍາໃຊ້ສິດທິພິເສດ ຕາມຂອບສັນຍາການຄ້າຊາຍແດນ ລາວ-ຫວຽດນາມ;
- ການຈັດຕັ້ງປະຕິບັດຂໍ້ຕົກລົງ ການໃຫ້ບູລິມະສິດຫຼຸດຜ່ອນອັດຕາພາສີນໍາເຂົ້າ ລະຫວ່າງ ລາວ – ຫວຽດນາມ ເຮັດໃຫ້ພາກສ່ວນດໍາເນີນທຸລະກິດ ໄດ້ຮັບຄວາມສະດວກຫຼາຍຂຶ້ນ ພາຍຫຼັງທີ່ສອງຝ່າຍ ລາວ-ຫວຽດນາມ ໄດ້ຮ່ວມກັນລົງນາມ ໃນຂໍ້ຕົກລົງຫຼຸດຜ່ອນອັດຕາພາສີ ແລະ ລົບລ້າງອັດຕາພາສີ ໃຫ້ແກ່ສິນຄ້າບາງຊະນິດທີ່ມີແຫຼ່ງກຳເນີດສິນຄ້າຢູ່ ສປປ ລາວ ແລະ ສສ ຫວຽດນາມ;
- ນອກນັ້ນ, ການສ້າງກິດຈະກໍາເຄື່ອນໄຫວພົວພັນ ຈັດຕະຫຼາດນັດ, ງານວາງສະແດງສິນຄ້າຕ່າງໆ ໄດ້ສ້າງເງື່ອນໄຂໃນການນໍາສະເໜີສິນຄ້າ ຂອງແຕ່ລະຝ່າຍສູ່ຕະຫຼາດພາຍໃນ ຂອງກັນ ແລະ ກັນ.
- ໃນຍຸກແຫ່ງການເຊື່ອມໂຍງ ເຮັດໃຫ້ລາວ ແລະ ຫວຽດນາມ ມີໂອກາດ ທີ່ຈະເລືອກຫາຕະຫຼາດໃນການຂາຍສິນຄ້າຂອງຕົນ ເປັນຕົ້ນແມ່ນການເຂົ້າຮ່ວມປະຊາຄົມເສດຖະກິດອາຊຽນ ໄດ້ເຮັດໃຫ້ສອງປະເທດສາມາດຂາຍສິນຄ້າຂອງຕົນ ໄປຍັງປະເທດສະມາຊິກອາຊຽນໄດ້ຢ່າງສະດວກ ແລະ ວ່ອງໄວ;
- ການຮ່ວມມືການຄ້າລາວ-ຫວຽດນາມ ອອກສູ່ຕະຫຼາດຈີນ ຫຼື ປະເທດອາຊຽນ ໂດຍຜ່ານທາງລົດໄຟລາວ-ຈີນ, ລົດໄຟລາວ-ຫວຽດນາມໃນອານະຄົດ ຈະມີຄວາມຟົດຟື້ນພໍສົມຄວນ, ເປັນທາງເລືອກໜຶ່ງໃຫ້ແກ່ທຸລະກິດ ການນຳເຂົ້າ ເພື່ອສົ່ງອອກຕໍ່ ຫຼື ນຳເຂົ້າແປຮູບເປັນຜະລິດຕະພັນ ຫຼື ເຄິ່ງຜະລິດຕະພັນ ແລ້ວສົ່ງອອກຕໍ່ໄປຍັງປະເທດທີສາມ ໂດຍຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນ ເພື່ອກ້າວໄປສູ່ການຮ່ວມຫຸ້ນ ຫຼື ຮ່ວມທຸລະກິດ ລະຫວ່າງ ສອງປະເທດ ລາວ-ຫວຽດນາມ ໄດ້ເປັນຢ່າງດີ.
ເຖິງແມ່ນວ່າຈະມີທ່າແຮງ ແລະ ກາລະໂອກາດທີ່ເຮັດໃຫ້ມູນຄ່າທາງດ້ານການຄ້າຂອງສອງປະເທດໄດ້ມີການຂະຫຍາຍຕົວເປັນກ້າວໆ ແຕ່ເມື່ອທຽບ ຕົວເລກດັ່ງກ່າວໃສ່ກັບປະເທດເພື່ອນບ້ານອື່ນເຊັ່ນ: ປະເທດໄທ ແລ້ວຍັງເຫັນວ່າມູນຄ່າດັ່ງກ່າວຍັງຫຼຸດໂຕນກັນຫຼາຍ ຊຶ່ງກາຍເປັນສິ່ງທ້າທາຍແກ່ພວກເຮົາ. ສາຍເຫດອັນໜຶ່ງສໍາລັບ ສປປ ລາວ ແມ່ນ: ໂຄງປະກອບຂອງສິນຄ້າຂາເຂົ້າ-ອອກຂອງລາວ ຍັງບໍ່ທັນຫຼາກຫຼາຍ ສ່ວນໃຫຍ່ແມ່ນສິນຄ້າ ທີ່ມາຈາກຊັບພະຍາກອນທຳມະຊາດ ແລະ ມີຄວາມອ່ອນໄຫວທາງດ້ານລາຄາໃນຕະຫຼາດໂລກ ເຖິງປະລິມານນຳເຂົ້າ-ສົ່ງອອກ ຈະເພີ່ມຂຶ້ນແຕ່ມູນຄ່າພັດຫຼຸດລົງ ຕົວຢ່າງ: ເຫຼັກ ແລະ ຜະລິດຕະພັນເຫຼັກ, ນໍ້າມັນເຊື້ອໄຟ; ໂຄງປະກອບສິນຄ້າພາຍໃນ ຂອງສປປ ລາວ ບໍ່ມີຄວາມຫຼາກຫຼາຍ ສ່ວນໃຫຍ່ແມ່ນສົ່ງອອກສິນຄ້າ ທີ່ໄດ້ມາຈາກຊັບພະຍາກອນທຳມະຊາດ ແລະ ສິນຄ້າຕາມລະດູການ ຊຶ່ງເຮັດໃຫ້ການສົ່ງອອກ ບໍ່ມີຄວາມຍືນຍົງ ເຊັ່ນ: ແຮ່ທາດ, ໄມ້ ແລະ ເຄື່ອງປ່າຂອງດົງ; ສຳລັບສິນຄ້ານຳເຂົ້າທັງໝົດ 70% ແມ່ນນຳເຂົ້າຈາກປະເທດໄທ ແລະ ນຳເຂົ້າສິນຄ້າອຸປະໂພກ-ບໍລິໂພກ ແລະ ເຄື່ອງໃຊ້ສອຍປະຈຳວັນ 90% ກໍ່ແມ່ນນຳເຂົ້າຈາກປະເທດໄທ ຍ້ອນໄທເປັນປະເທດໃກ້ຄຽງມີຊາຍແດນຕິດກັບປະເທດລາວຍາວກວ່າໝູ່, ວິຖີຊີວິດ ແລະ ພາສາປາກເວົ້າຄ້າຍຄືກັນ ຈຶ່ງເຮັດໃຫ້ວັດທະນາທຳການຊົມໃຊ້ສິນຄ້າ ຂອງລາວມາຈາກໄທເກືອບທັງໝົດ ຈຶ່ງເປັນສິ່ງທ້າທາຍໃຫ້ແກ່ສິນຄ້າຫວຽດນາມ ທີ່ຈະເຂົ້າມາສ້າງຄ່ານິຍົມໃຫ້ແກ່ປະຊາຊົນລາວ. ສຳລັບໄລຍະຍາວສິນຄ້າຫວຽດນາມ ສາມາດແຂ່ງຂັນໃນຕະຫຼາດລາວໄດ້ດ້ວຍຄຸນນະພາບທີ່ເທົ່າທຽມສິນຄ້າໄທ ແລະ ລາຄາຖືກກວ່າສິນຄ້າໄທ ອາດເປັນປັດໄຈໜຶ່ງ ທີ່ປະຊາຊົນລາວ ຈະຫັນມາຊົມໃຊ້ສິນຄ້າຫວຽດນາມຫຼາຍຂຶ້ນ;
ພ້ອມດຽວກັນນີ້, ຜູ້ຕາງໜ້າຈາກວິສາຫະກິດຂອງຝ່າຍລາວ ໄດ້ນໍາສະເໜີຄວາມຕ້ອງການຂອງຕະຫຼາດລາວ ໂດຍສະເພາະສິນຄ້າປະເພດກະສິກໍາ, ເຄື່ອງອຸປະໂພກ-ບໍລິໂພກ, ອາຫານທະເລ; ສໍາລັບຝ່າຍຫວຽດນາມ ຜູ້ຕາງໜ້າຈາກວິສາຫະກິດໄດ້ແນະນໍາກ່ຽວກັບ ທ່າແຮງ ແລະ ຄວາມໄດ້ປຽບຂອງສິນຄ້າຫວຽດນາມ ທີ່ສະໜອງຕະຫຼາດລາວ; ແລະ ຮັບຊົມວິດີໂອ ແນະນໍາໝາກລິ້ນຈີ່ສົດ ຈາກແຂວງບັກຢາງຂອງ ຫວຽດນາມ; ນອກນີ້ ທຸລະກິດທັງສອງຝ່າຍ ຍັງໄດ້ແລກປ່ຽນຄໍາຄິດເຫັນຊຶ່ງກັນ ແລະ ກັນ ພ້ອມທັງຂໍ້ສະເໜີຕໍ່ພາກລັດ ແລະ ພາກທຸລະກິດ ຂອງສອງປະເທດ.
ພາບ-ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກົມແຜນການ ແລະ ການຮ່ວມມື
