ເນື່ອງໃນໂອກາດວັນເດັກນ້ອຍສາກົນ, ວັນປູກຕົ້ນໄມ້ແຫ່ງຊາດ 1 ມິຖຸນາ 2022 ແລະ ວັນສາກົນຢຸດຕິການໃຊ້ແຮງງານເດັກ 12 ມິຖຸນາ 2022 ທີ່ວຽນມາເຖິງນີ້. ທົ່ວປວງຊົນທັງຊາດໄດ້ຖືເປັນວັນສໍາຄັນອີກວັນໜຶ່ງຈິ່ງໄດ້ພ້ອມກັນສ້າງຂະບວນການສະເຫຼີມສະຫຼອງວັນດັ່ງກ່າວຂຶ້ນໃນຂອບເຂດທົ່ວປະເທດຕາມສະພາບເງື່ອນໄຂຕົວຈິງ ແລະ ສະພາບການລະບາດຂອງພະຍາດ ໂຄຣວິດ-19.

ດັ່ງທີ່ທ່ານຮູ້ນໍາກັນແລ້ວວ່າ: ວັນເດັກນ້ອຍສາກົນ 1ມິຖຸນາ 2022 ແມ່ນ ຄົບຮອບ 98ປີ (1 ມິຖຸນາ1925- ວັນ1 ມິຖຸນາ 2022)  ແລະ ປູກຕົ້ນໄມ້ແຫ່ງຊາດ ວັນທີ 01 ມິຖຸນາ 2022 ແມ່ນ ຄົບຮອບ 42ປີ (ວັນທີ 01ມິຖຸນາ1980-01 ມິຖຸນາ 2022)  ຍ້ອນ ພັກ ແລະ ລັດຖະບານເຫັນວ່າ ໃນ 2 ວັນດັ່ງກ່າວແມ່ນມີຄວາມໝາຍສໍາຄັນຄືກັນ,  ເພື່ອຮັບປະກັນໃຫ້ແກ່ການປົກປ້ອງສິດ ແລະ ຜົນປະໂຫຍດຂອງເດັກນັບມື້ໃຫ້ໄດ້ຮັບຜົນສູງຂຶ້ນ

    ຄະນະພັກກະຊວງອຸດສາຫະກໍາ ແລະ ການຄ້າ ກໍ່ຄືຄະນະກໍາມາທິການສົ່ງເສີມຄວາມກ້າວໜ້າແມ່ຍິງ ແລະ ແມ່-ເດັກ ແລະ ອົງການຈັດຕັ້ງພາຍໃນກະຊວງໄດ້ສ້າງຂະບວນການ ເພື່ອເປັນການສະໜັບສະໜູນວັນສຳຄັນດັ່ງກ່າວ ໃນຕອນເຊົ້າຂອງ ວັນທີ 01 ມີຖຸນາ 2022, ທີ່ກະຊວງອຸດສາຫະກຳ ແລະ ການຄ້າ ດ້ວຍຮູບແບບກະທັດຮັດ  ແລະ ປະຕິບັດຕາມມາດຕະການສະກັດກັ້ນ, ຄວບຄຸມພະຍາດໂຄວິດ-19 ທີ່ຄະນະສະເພາະກິດໄດ້ວາງອອກຢ່າງເຂັ້ມງວດ;

            ສະນັ້ນຈຶ່ງໄດ້ຈັດພິທີມອບຂອງຂວັນວັນເດັກນ້ອຍສາກົນ ຊຶ່ງໃຫ້ກຽດມອບໂດຍ ທ່ານ ບຸນເຖິງ ດວງສະຫວັນ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ໃນນາມຕາງໜ້າໃຫ້ຄະນະພັກ, ຄະນະນຳ ກະຊວງ ອຄ ພ້ອມດ້ວຍ  ຮອງປະທານຄະນະກໍາມາທິການສົ່ງເສີມຄວາມກ້າວໜ້າແມ່ຍິງ ແລະ ແມ່-ເດັກ, ປະທານຄະນະບໍລິຫານງານສະຫະພັນແມ່ຍິງກະຊວງ ອຄ, ໄດ້ມອບຂອງຂວັນໃຫ້ຜູ້ຕາງໜ້າຈາກຫ້ອງການ, ບັນດາກົມ, ສະຖາບັນອຸດສາຫະກຳ ແລະ ການຄ້າ ເພື່ອນຳເອົາໄປແຈກຢາຍໃຫ້ລູກຫຼານຂອງພະນັກງານລັດຖະກອນກະຊວງອຸດສາຫະກຳ ແລະ ການຄ້າ ຢ່າງທົ່ວເຖີງຈຳນວນ 680 ຫໍ່, ພ້ອມດຽວກັນນີ້ ທ່ານ ບຸນເຖິງດວງສະຫວັນ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ​ໄດ້​ປຸກລະດົມ​ໃຫ້​ພະນັກງານທົ່ວກະຊວງ ພ້ອມ​ກັນ​ສ້າງ​ຂະ​ບວນການ​ປູກ​ຕົ້ນ​ໄມ້​ຢູ່​ບໍລິ​ເວນບ້ານເຮືອນ ແລະ ໄຮ່ນາຮົ້ວສວນຂອງຕົນເອງ ຕາມຄວາມສາມາດ ແລະ ສອດຄ່ອງກັບຂະບວນການລວມເຕັມໄປດ້ວຍເນື້ອໃນ ແລະ ບັນຍາກາດຂອງຂະວນການປູກຕົ້ນໄມ້ແຫ່ງຊາດ ໃນສະພາບການແຜ່ລະບາດພະຍາດໂຄວິດ-19.

ແຫຼ່ງຂ່າວ: ຫ້ອງການ ກະຊວງ ອຄ.

ຮຽບຮຽງ: ໄພຄໍາອີ  ສູນສະຖິຕິ ແລະ ຂໍ້ມູນຂ່າວສານ