ວັນທີ 8 ມິຖຸນາ 2022, ພະແນກຄຸ້ມຄອງສິນຄ້າ ແລະ ລາຄາ ກົມການຄ້າພາຍໃນ, ກະຊວງອຸດສາຫະກໍາ ແລະ ການຄ້າ ໄດ້ອອກບົດຄວາມເພື່ອຊີ້ແຈງຕໍ່ສັງຄົມ ໃນການປັບລາຄານໍ້າມັນເຊື້ອໄຟໃນແຕ່ລະໄລຍະພາຍໃນປະເທດ ໂດຍອີງຕາມລາຄາຕະຫຼາດນໍ້າມັນໂລກ ເຊິ່ງມີການຜັນຜວນໃນປະຈຸບັນ ໂດຍມີເນື້ອໃນດັ່ງນີ້:     

       ປະຈຸບັນ, ລາຄານໍ້າມັນເຊື້ອໄຟໃນຕະຫຼາດໂລກ ເວົ້າລວມ, ເວົ້າສະເພາະ ລາຄານໍ້າມັນເຊື້ອໄຟສໍາເລັດຮູບຕະຫຼາດສິງກະໂປ ຍັງມີການປັບຂຶ້ນສູງ ໂດຍການຕິດຕາມລາຄາສະເລ່ຍແຕ່ວັນທີ 31 ພຶດສະພາ – 03 ມິຖຸນາ 2022 ເຫັນວ່າ ລາຄາສະເລ່ຍນໍ້າມັນແອັດຊັງພິເສດແມ່ນ 153,12 ໂດລາສະຫະລັດ/ບາເຣວ (1,0380 ໂດລາ/ລິດ), ນໍ້າມັນແອັດຊັງທໍາມະດາ ແມ່ນ 147,64 ໂດລາສະຫະລັດ/ບາເຣວ (0.9986 ໂດລາ/ລິດ) ແລະ ກາຊວນແມ່ນ 168,16 ໂດລາສະຫະລັດ/ບາເຣວ (1,0576 ໂດລາ/ລິດ) ນອກຈາກນັ້ນ ຍັງເຫັນວ່າ ລາຄານໍ້າມັນກາຊວນ ສູງກວ່າລາຄານໍ້າມັນແອັດຊັງທໍາມະດາ ຫຼາຍສົມຄວນ ແລະ ເມື່ອສົມທຽບກັບລາຄາທີ່ຈັດຕັ້ງປະຕິບັດຄັ້ງວັນທີ 01 ມິຖຸນາ 2022 ຜ່ານມາ ເຫັນວ່າ:

-      ລາຄານໍ້າມັນແອັດຊັງພິເສດ ປັບຂຶ້ນ 1.700 ກີບ/ລິດ ຫຼື 6,06 % (ຈາກ 28.070 ກີບ/ລິດ ປັບຂຶ້ນເປັນ 29.770 ກີບ/ລິດ)

-      ລາຄານໍ້າມັນແອັດຊັງທໍາມະດາ ປັບຂຶ້ນ 1.630 ກີບ/ລິດ ຫຼື 7,45 % (ຈາກ 21.890 ກີບ/ລິດ ປັບຂຶ້ນເປັນ 23.520 ກີບ/ລິດ)

-      ລາຄານໍ້າມັນກາຊວນ ປັບຂຶ້ນ 2.820 ກີບ/ລິດ ຫຼື 13,86 % (ຈາກ 20.340 ກີບ/ລິດ ປັບຂຶ້ນເປັນ 23.160 ກີບ/ລິດ)    

      ດັ່ງນັ້ນ, ໃນກອງປະຊຸມຄະນະປະຈໍາສະພາແຫ່ງຊາດ ຄັ້ງວັນທີ 06 ມິຖຸນາ 2022 ໄດ້ມີທິດຊີ້ນໍາເຫັນດີ ໃຫ້ລັດຖະບານ ປັບຫຼຸດອາກອນຊົມໃຊ້ນໍ້າມັນແອັດຊັງທໍາມະດາ ແລະ ອາກອນຊົມໃຊ້ນໍ້າມັນກາຊວນລົງ.  ນອກຈາກນັ້ນ, ລັດຖະບານ ຍັງມີທິດຊີ້ນໍາໃຫ້ປັບຫຼຸດອັດຕາຄວາມສ່ຽງຄືນໃໝ່ ເພື່ອບໍ່ໃຫ້ລາຄາຂາຍຍ່ອຍສູງເກີນໄປ ເຊີ່ງຈະສົ່ງຜົນກະທົບຕໍ່ພື້ນຖານເສດຖະກິດ ກໍຄືກະທົບຕໍ່ພໍ່ແມ່ປະຊາຊົນ ໂດຍສະເພາະໄລຍະນີ້ ແມ່ນເປັນລະດູການປູກຝັງ ຈຶ່ງເຮັດໃຫ້ລາຄາຂາຍຍ່ອຍທີ່ຈັດຕັ້ງປະບັດຄັ້ງວັນທີ 08 ມິຖຸນາ 2022 ນີ້ ປັບລົງຄື:

-      ລາຄານໍ້າມັນແອັດຊັງພິເສດ ປັບລົງ 150 ກີບ/ລິດ ຫຼື 0,54 % (ຈາກ 28.070 ກີບ/ລິດ ປັບລົງເປັນ 27.920 ກີບ/ລິດ)

-      ລາຄານໍ້າມັນແອັດຊັງທໍາມະດາ ປັບລົງ 2.060 ກີບ/ລິດ ຫຼື 9,41 % (ຈາກ 21.890 ກີບ/ລິດ ປັບລົງເປັນ 2.060 ກີບ/ລິດ)

-      ລາຄານໍ້າມັນກາຊວນ ປັບລົງ 920 ກີບ/ລິດ ຫຼື 4,52 % (ຈາກ 20.340 ກີບ/ລິດ ປັບລົງເປັນ 19.420 ກີບ/ລິດ)      ເຊີ່ງນັບຕັ້ງແຕ່ຕົ້ນເດືອນພຶດສະພາ 2022 ຮອດປະຈຸບັນ ລັດຖະບານໄດ້ຫຼຸດອາກອນຊົມໃຊ້ສະເພາະນໍ້າມັນອັດຊັງທໍາມະດາ ແລະ ນໍ້າມັນກາຊວນ ລົງທັງໝົດ 02 ຄັ້ງ ຄື: ຄັ້ງວັນທີ 10 ພຶດສະພາ 2022 ຫຼຸດອາກອນຊົມໃຊ້ນໍ້າມັນແອັດຊັງທໍາມະດາ ຈາກ 31% ມາເປັນ 16%, ຫຼຸດອາກອນຊົມໃຊ້ນໍ້າມັນກາຊວນ ຈາກ 21% ມາເປັນ 11% ແລະ ຄັ້ງວັນທີ 08 ມິຖຸນາ 2022 ນີ້ ໄດ້ຫຼຸດອາກອນຊົມໃຊ້ນໍ້າມັນແອັດຊັງທໍາມະດາ ຈາກ 16% ມາເປັນ 5%, ຫຼຸດອາກອນຊົມໃຊ້ນໍ້າມັນກາຊວນ ຈາກ 11% ມາເປັນ 0% ທັງນີ້ກໍເພື່ອບໍ່ໃຫ້ລາຄາຂາຍຍ່ອຍນໍ້າມັນເຊື້ອໄຟ ພາຍໃນປະເທດ ສູງເກີນໄປ.      

     ຕໍ່ສະພາບດັ່ງກ່າວ, ຈຶ່ງຮຽກຮ້ອງມາຍັງທະຫານ, ຕໍາຫຼວດ, ພະນັກງານ ແລະ ພໍ່ແມ່ປະຊາຊົນບັນດາເຜົ່າ ຈົ່ງມີສະຕິ, ປະຢັດມັດທະຍັດໃຊ້ຈ່າຍໃນສິ່ງທີ່ຈໍາເປັນ ໂດຍສະເພາະ ແມ່ນການຊົມໃຊ້ຍານພາຫະນະ ຫຼື ຫັນໄປໃຊ້ຍານພາຫະນະທາງເລືອກ; ໃນຂະນະດຽວກັນ ກໍຮຽກຮ້ອງມາຍັງບັນດາຜູ້ປະກອບການທຸລະກິດຕ່າງໆ ຈົ່ງຢ່າໄດ້ສວຍ ໂອກາດຂຶ້ນລາຄາສິນຄ້າຕາມລໍາພັງໃຈ ແລະ ກັກຕຸນສິນຄ້າ ກໍຄືນໍ້າມັນເຊື້ອໄຟ ໃນໄລຍະລາຄານໍ້າມັນເຊື້ອໄຟເໜັງຕີງຂຶ້ນ, ຫາກພົບເຫັນການສວຍໂອກາດຂຶ້ນລາຄາສິນຄ້າ ແມ່ນຈະໄດ້ໃຊ້ມາດຕະການຕາມກົດໝາຍ ແລະ ລະບຽບການ.      

     ຫາກພົບເຫັນ ການສວຍໂອກາດຂຶ້ນລາຄາສິນຄ້າ ທ່ານສາມາດ ໂທແຈ້ງສາຍດ່ວນ 1510 ແລະ ເວັບໄຊ໌ປົກປ້ອງຜູ້ຊົມໃຊ້ WWW.lcp.gov.la ໄດ້.

ແຫລ່ງຂ່າວ: ພະແນກຄຸ້ມຄອງສິນຄ້າ ແລະ ລາຄາ, ກົມການຄ້າພາຍໃນ

ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ