ຕອນ​ເຊົ້າເວລາ 10:00 ໂມງ ຂອງວັນທີ 08 ມິຖຸນາ 2022  , ທີ່ຫ້ອງຮັບແຂກໃຫຍ່ຊັ້ນ 04 ກະຊວງອຸດສາຫະກໍາ ແລະ ການຄ້າ, ທ່ານ ປອ. ຄໍາແພງ ໄຊສົມແພງ  ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ Viacheslav KHARINOV, ​​ຜູ້ຕາງໜ້າການຄ້າ ສະຫະພັນ ຣັດເຊຍ ປະຈໍາ ສສ ຫວຽດນາມ ພ້ອມດ້ວຍຄະນະ, ໃນ​ໂອ​ກາດ​ ເຂົ້າພົບປະປຶກສາຫາລືດ້ານການຄ້າ ແລະ ການລົງທຶນຢູ່ ສປປ ລາວ; ມີຫົວໜ້າ-ຮອງຫົວໜ້າກົມ ກ່ຽວຂ້ອງອ້ອມຂ້າງກະຊວງ ເຂົ້າຮ່ວມທັງສອງຝ່າຍ ປະມານ 15 ທ່ານ.

        ໂອກາດນີ້ ທ່ານ  ປອ. ຄໍາແພງ ໄຊສົມແພງ  ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍ້ອງຍໍຊົມເຊີຍຕໍ່ ທ່ານ Viacheslav KHARINOV, ຜູ້ຕາງໜ້າການຄ້າ ສະຫະພັນ ຣັດເຊຍ ປະຈໍາ ສສ ຫວຽດນາມ ໃນໂອກາດເຂົ້າຢ້ຽມຂໍ່ານັບຄັ້ງນີ້ ທ່ານ ຜູ້ຕາງໜ້າການຄ້າ ສະຫະພັນຣັດເຊຍ ປະຈໍາ ສສ ຫວຽດນາມ, ໄດ້ສົນທະນາກ່ຽວກັບວຽກງານການຮ່ວມມືກັນ ລະຫວ່າງ ລາວ-ຣັດເຊຍ ໂດຍສະເພາະການລົງທຶນຢູ່ ສປປ ລາວ ໃນໄລຍະຜ່ານມາ, ມູນຄ່າການຄ້າສອງຝ່າຍ ລະຫວ່າງ ສປປ ລາວ ແລະ ຣັດເຊຍ ແມ່ນມີການຫຼຸດລົງ ແບບຕໍ່ເນື່ອງ, ດ້ານການຄ້າ 3 ເດືອນຕົ້ນປີ 2022 ມີມູນຄ່າລວມທັງໝົດ 4,95 ​ລ້ານໂດ​ລາສະຫະລັດ​, ​​ມູນຄ່າການນໍາເຂົ້າ 4,95 ລ້ານ​ໂດ​ລາສະຫະລັດ​, ສໍາລັບມູນຄ່າການສົ່ງອອກແມ່ນຍັງບໍ່ທັນມີການຈັດຕັ້ງປະຕິບັດ​.

                ສິນຄ້າຫຼັກທີ່ ສປປ ລາວ ນໍາເຂົ້າຈາກຣັດເຊຍໄດ້ແກ່: ເຄື່ອງໄຟຟ້າ ແລະ ອຸປະກອນໄຟຟ້າ, ໄຂມັນ ແລະ ນໍ້າມັນທີ່ໄດ້ຈາກສັດ ແລະ ພືດ, ຜະລິດຕະພັນການຢາ, ເຄື່ອງມື, ເຄື່ອງໃຊ້ຄົວເຮືອນ ຊະນິດມີດຄົມ, ບ່ວງ ແລະ ສ້ອມ. ສປປ ລາວ ສິນຄ້າສົ່ງອອກ 3 ເດືອນຕົ້ນປີ 2022 ໄປຣັດເຊຍ ບໍ່ທັນມີການຈັດຕັ້ງປະຕິບັດ. ດັ່ງນັ້ນ ທັງສອງຝ່າຍໄດ້ປຶກສາຫາລືຮ່ວມກັນໃນຕໍ່ໜ້າ ໃຫ້ມີມູນຄ່າສິນຄ້າ ການນໍາເຂົ້າ-ສົ່ງອອກ ສປປ ລາວ-ຣັດເຊຍ ຫຼາຍຂຶ້ນຕື່ມ; ທັງສອງຝ່າຍເຫັນດີຮ່ວມກັນໃນຕໍ່ໜ້າໃຫ້ມີແຜນຈັດກອງ​ປະຊຸມ​ພົບ​ປະ ນັກທຸລະກິດ​ຂອງ​ສອງ​ປະ​ເທດ ລາວ-ຣັດເຊຍ ເພື່ອດຶງດູດການ​ລົງທຶນ ໃຫ້ນັບມື້ນັບຫຼາຍຂຶ້ນ, ພ້ອມທັງຊອກຫາຊ່ອງທາງ ໃນການສົ່ງອອກສິນຄ້າຂອງລາວໄປຍັງຕະຫຼາດຣັດເຊຍ. ທ່ານ ລັດຖະມົນຕີ ຍັງສະເໜີໃຫ້ຝ່າຍຣັດເຊຍ ຊອກບໍລິສັດໃຫຍ່ທີ່ສົ່ງນໍ້າມັນເຂົ້າມາ ສປປ ລາວ ຈໍານວນ 120 ລ້ານລິດຕໍ່ເດືອນ. ນອກຈາກນີ້, ຍັງມີການແລກປ່ຽນບົດຮຽນ ເພື່ອສຶກສາຄວາມເປັນໄປໄດ້ໃນການຮ່ວມມືພັດທະນາອຸດສາຫະກຳປຸງແຕ່ງສິນຄ້າກະສິກຳ, ອຸດສາຫະກຳ, ICT ​ແລະ ອື່ນໆ.

      ທ່ານ Viacheslav KHARINOV,  ຜູ້ຕາງໜ້າການຄ້າ ສະຫະພັນ ຣັດເຊຍ ປະຈໍາ ສສ ຫວຽດນາມ  ໄດ້ ໃຫ້ຄໍາໝັ້ນວ່າໃນຕໍ່ໜ້າຈະໃຫ້ການຮ່ວມມື ລະຫວ່າງ ລາວ-ຣັດເຊຍ ​ແລະ ​ອຳ​ນວຍ​ຄວາມ​ສະ​ດວກໃນວຽກງານຫຼາຍດ້ານ ເພື່ອໃຫ້ເກີດ ຜົນປະໂຫຍດແກ່ສອງປະເທດເພີ່ມຂຶ້ນ.

ພາບ-ຂ່າວ: ໄພຄໍາອີ ສູນສະຖິຕິ ແລະ ຂໍ້ມູນຂ່າວສານ, ກຜຮ /ກະຊວງ ອຄ.