ກະຊວງອຸດສາຫະກຳ ແລະ ການຄ້າ ໄດ້ຈັດພິທີມອບ-ຮັບໜ້າທີ່ ເລຂາຄະນະບໍລິຫານງານພັກ, ລັດຖະມົນຕີກະຊວງ ອຸດສາຫະກຳ ແລະ ການຄ້າ ຜູ້ເກົ່າ ແລະ ຜູ້ໃໝ່ລະຫວ່າງ ທ່ານ ປອ. ຄຳແພງ ໄຊສົມແພງກຳມະການສູນກາງພັກ ເລຂາຄະນະບໍລິຫານງານພັກ, ລັດຖະມົນຕີກະຊວງ ອຸດສາຫະກຳ ແລະ ການຄ້າ ຜູ້ເກົ່າ ແລະ ທ່ານ ມະໄລທອງ ກົມມະສິດ ກຳມະການສຳຮອງ ສູນກາງພັກ, ລັດຖະມົນຕີ ກະຊວງອຸດສາຫະກຳ ແລະ ການຄ້າ ຜູ້ໃໝ່ ໄດ້ຈັດຂຶ້ນໃນວັນທີ 23 ມິຖຸນາ 2022 ທີ່ຫ້ອງປະຊຸມໃຫຍ່ ກະຊວງອຸດສາຫະກຳ ແລະ ການຄ້າ, ເປັນກຽດເຂົ້າຮ່ວມ ຂອງ ທ່ານ ສຈ.ປອ. ກິແກ້ວ ໄຂຄຳພິທູນ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ພ້ອມດ້ວຍແຂກຖືກເຊີນ, ພະນັກງານຫຼັກແຫຼ່ງກ່ຽວຂ້ອງເຂົ້າຮ່ວມ.
ທ່ານ ນາງ ບຸດສະດີ ທະນະເມືອງ ກຳມະການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ ໄດ້ຂຶ້ນຜ່ານເອກະສານ ລັດຖະດຳລັດ ຂອງ ປະທານປະເທດ ສະບັບເລກທີ 062/ປປທ, ລົງວັນທີ 22 ມິຖຸນາ 2022 ວ່າດ້ວຍການຍົກຍ້າຍພະນັກງານການນຳຂັ້ນສູງໄປຮັບໜ້າທີ່ໃໝ່.
ອີງຕາມມະຕິຕົກລົງຂອງກົມການເມືອງສູນກາງພັກ ສະບັບເລກທີ 10/ກມສພ, ລົງວັນທີ 21 ມິຖຸນາ 2022 ວ່າດ້ວຍການແຕ່ງຕັ້ງເລຂາຄະນະພັກກະຊວງອຸດສາຫະກຳ ແລະ ການຄ້າ. ອີງຕາມ ກອງປະຊຸມ ສະໄໝສາມັນ ເທື່ອທີ 3 ຂອງ ສະພາແຫ່ງຊາດ ຊຸດທີ IX ແລະ ລັດຖະດຳລັດ ຂອງ ປະທານປະເທດ ສະບັບເລກທີ 064/ປປທ, ລົງວັນທີ 22 ມີຖຸນາ 2022 ກົມການເມືອງສູນກາງພັກອອກຄຳສັ່ງຍົກຍ້າຍສະຫາຍ ຄຳແພງ ໄຊສົມແພງ ກຳມະການສູນກາງພັກ ເລຂາຄະນະພັກ, ລັດຖະມົນຕີກະຊວງ ອຸດສາຫະກຳ ແລະ ການຄ້າ ໄປຮັບໜ້າທີ່ໃໝ່ ຢູ່ຫ້ອງວ່າການສຳນັກງານນາຍົກ, ຈາກນັ້ນ ຈຶ່ງໄດ້ຕົກລົງແຕ່ງຕັ້ງ ສະຫາຍ ມະໄລທອງ ກົມມະສິດ ກຳມະການສຳຮອງ ສູນກາງພັກ, ເປັນເລຂາຄະນະບໍລິຫານງານພັກ ກະຊວງອຸດສາຫະກຳ ແລະ ການຄ້າ ເປັນລັດຖະມົນຕີ ກະຊວງອຸດສາຫະກຳ ແລະ ການຄ້າ.
ໃນພິທີ ທ່ານ ສຈ.ປອ. ກິແກ້ວ ໄຂຄຳພິທູນ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ໄດ້ມີຄຳເຫັນບາງຕອນວ່າ: ການຈັດພິທີມອບ-ຮັບໜ້າທີ່ ຄັ້ງນີ້ ມີຄວາມໝາຍສຳຄັນທີ່ສຸດເພື່ອເປັນການຊັບຊ້ອນພະນັກງານການນຳຂັ້ນສູງໄປຮັບໜ້າທີ່ໃໝ່ ເພື່ອໃຫ້ເໝາະສົມກັບສະພາບໃນປັດຈຸບັນ ເພື່ອເປັນການບັນຊາວຽກໃຫ້ມີໝາກຜົນດີກວ່າເກົ່າ. ດັ່ງນັ້ນ, ຂ້າພະເຈົ້າເຊື່ອໝັ້ນວ່າ ການຮັບໜ້າທີ່ໃໝ່ ຂອງ ທ່ານ ມະໄລທອງ ກົມມະສິດ ກຳມະການສຳຮອງ ສູນກາງພັກ ມີຄວາມເໝາະສົມເພື່ອເສີມຂະຫຍາຍບົດຮຽນໃນການບັນຊາວຽກງານໃນກະຊວງອຸດສາຫະກຳ ແລະ ການຄ້າ ໃຫ້ມີຜົນສຳເລັດ, ເຫັນວ່າ ເປັນພະນັກງານທີ່ໜຸ່ມແໜ້ນ ເປັນຜູ້ທີ່ມີຄວາມຮູ້-ຄວາມສາມາດ, ກຳໄດ້ຍຸດທະສາດ ແລະ ມີປະສົບການ ເຊື່ອໝັ້ນວ່າ ມີຄວາມເໝາະສົມໃນການເສີມຂະຫຍາຍວຽກງານໃຫ້ມີຜົນສຳເລັດ ແລະ ຮຽກຮ້ອງໃຫ້ຍົກສູງຄວາມສາມັກຄີ, ມີຄວາມເປັນເອກະພາບ ລວມສູນ ແລະ ມີການຕິດຕາມກວດກາເປັນແຕ່ລະໄລຍະ.
ຂ່າວ: ທິລາວັນ ວົງວິຈິດ
ພາບ: ໄພວັນ ໂຄດວັນທາ
