ກົມແຜນການ ແລະ ການຮ່ວມມື, ກະຊວງອຸດສາຫະກຳ ແລະ ການຄ້າ ຮ່ວມກັບສູນການຄ້າສາກົນ ປະຈຳ ປະເທດສະວິດເຊີແລນ ໄດ້ຈັດຝຶກອົບຮົມກ່ຽວກັບ ການປຸງແຕ່ງ-ວິໄຈຂໍ້ມູນສະຖິຕິໂດຍນຳໃຊ້ໂປຣແກຼມ Structured Query Language (SQL), MS Access, ໃນວັນທີ 4-8 ກໍລະກົດ 2022 ທີ່ ກະຊວງອຸດສາຫະກຳ ແລະ ການຄ້າ.
ຈຸດປະສົງຂອງການຝຶກອົບຮົມເພື່ອສ້າງຄວາມອາດສາມາດດ້ານການປຸງແຕ່ງ ແລະ ວິເຄາະ ຊຸດຂໍ້ມູນທີ່ມີຂະໜາດໃຫຍ່ໃນ Microsoft Office ໃຫ້ແກ່ບັນດາພະນັກງານທີ່ຮັບຜິດຊອບວຽກງານສະຖິຕິ ຈາກພາກສ່ວນທີ່ກ່ຽວຂ້ອງຂອງພາກລັດ. ຜູ້ເຂົ້າຮ່ວມຝຶກອົບຮົມຄັ້ງນີ້ລວມທັງຫມົດ ມີ 21 ທ່ານ ຈາກບັນດາກົມກອງອ້ອມຂ້າງກະຊວງອຸດສາຫະກຳ ແລະ ການຄ້າ, ກະຊວງການເງິນ, ທະນາຄານແຫ່ງ ສປປ ລາວ, ກະຊວງພະລັງງານ ແລະ ບໍ່ແຮ່ ແລະ ສູນສະຖິຕິແຫ່ງຊາດ.
ການຝຶກອົບຮົມໃນຄັ້ງນີ້ ແມ່ນກິດຈະກຳໜຶ່ງພາຍໃຕ້ໂຄງການຊ່ວຍເຫຼືອວຽກງານການຄ້າ ສປປ ລາວ ຂອງ ສະຫະພາບເອີຣົບ ທີ່ມີໄລຍະ 4 ປີ (2019-2022) ໂດຍຜ່ານສຸນການຄ້າສາກົນ ເປັນຜູ້ຈັດຕັ້ງປະຕິບັດ ຮ່ວມກັບ ກະຊວງອຸດສາຫະກຳ ແລະ ການຄ້າ.
ການຝຶກອົບຮົມວຽກງານສະຖິຕິຄັ້ງນີ້ ແມ່ນຈັດເປັນຄັ້ງທີ 3 ຕໍ່ເນື່ອງກັນ, ຄັ້ງທີ 1 ໃນປີ 2019 ແລະ ຄັ້ງທີ 2 ໃນປີ 2021 ເພື່ອເສີມສ້າງຄວາມອາດສາມາດໃນການເກັບກຳຂໍ້ມູນ ທີ່ຕິດພັນກັບການຄ້າໃນລະບົບທີ່ແຕກຕ່າງກັນທີ່ນິຍົມນຳໃຊ້ໃນສາກົນ ເພື່ອສາມາດປຸງແຕ່ງ ແລະ ວິໄຈຂໍ້ມູນ ໄດ້ຖືກຕ້ອງ ແລະ ວ່ອງໄວ. ການຝຶກອົບຮົມ ຈະດຳເນີນໄປເປັນເວລາ 5 ວັນ ໂດຍສິດສອນບັນຍາຍຂອງ ຊ່ຽວຊານຈາກສູນການຄ້າສາກົນ.
ແຫຼ່ງຂ່າວ: ພະແນກຄຸ້ມຄອງຈັດຕັ້ງໂຄງການຊ່ວຍເຫຼືອຕ່າງປະເທດ(NIU)
ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
