ນະຄອນຫຼວງວຽງຈັນ, ວັນທີ 12 ກໍລະກົດ 2022. ພາກລັດ, ພາກທຸລະກິດ ແລະ ບັນດາຄູ່ຮ່ວມພັດທະນາ ໄດ້ຮ່ວມກັນປຶກສາຫາລື ຜົນການຄົ້ນຄວ້າ ແລະ ຂໍ້ສະເໜີແນະ ຈາກບົດສຶກສາດ້ານບົດບາດຍິງ-ຊາຍ ເພື່ອຈໍາແນກຂໍ້ຈໍາກັດຕົ້ນຕໍ ທີ່ກະທົບຕໍ່ວິສາຫະກິດ ທີ່ນັກທຸລະກິດຍິງເປັນເຈົ້າຂອງ ແລະ ບໍລິຫານ ໃນ ສປປ ລາວ.
ກອງປະຊຸມດັ່ງກ່າວຈັດຂຶ້ນເປັນເວລາເຄິ່ງມື້ ໂດຍກະຊວງ ອຸດສາຫະກຳ ແລະ ການຄ້າ ແລະ ມີຜູ້ເຂົ້າຮ່ວມຫລາຍກວ່າ 80 ທ່ານ ຈາກພາກລັດຖະບານ, ອົງການຈັດຕັ້ງມະຫາຊົນ, ພາກທຸລະກິດ ແລະ ບັນດາຄູ່ຮວມພັດທະນາ.
ໃນກອງປະຊຸມ, ທ່ານ ມະໄລທອງ ກົມມະສິດ, ລັດຖະມົນຕີ ກະຊວງ ອຸດສາຫະກຳ ແລະ ການຄ້າ, ປະທານກອງປະຊຸມ ໄດ້ກ່າວເຖິງຄວາມຈຳເປັນທາງດ້ານເສດຖະກິດ ແລະ ສັງຄົມ ເພື່ອສົ່ງເສີມຄວາມເຂັ້ມແຂງໃຫ້ກັບເສດຖະກິດຂອງແມ່ຍິງ ເນື່ອງຈາກການມີສິດສະເໝີພາບລະຫວ່າງຍິງ-ຊາຍ ຈະຊ່ວຍສົ່ງເສີມໃຫ້ມີການຂະຫຍາຍຕົວຂອງເສດຖະກິດ ແລະ ນຳໄປສູ່ຜົນຂອງການພັດທະນາທີ່ດີກ່ວາເກົ່າ. ທ່ານ ລັດຖະມົນຕີ, ໄດ້ກ່າວຕໍ່ວ່າ “ໃນຕົວຈິງ, ອີງຕາມການສຶກສາຂອງສາກົນ ທີ່ກ່ຽວຂ້ອງກັບແມ່ຍິງ ແລະ ການພັດທະນາ ສະແດງໃຫ້ເຫັນວ່າ ການລົງທຶນໃສ່ ເພດຍິງ ແມ່ນໄດ້ຮັບຜົນຕອບແທນ ທີ່ສູງກວ່າ ການລົງທຶນໃສ່ເພດຊາຍ; ໂດຍລວມແລ້ວ, ເພດຍິງ ມີຄວາມສົນໃຈໃນການແບ່ງໝາກຜົນ ທາງດ້ານການສຶກສາ, ສາທາລະນະສຸກ ແລະ ດ້ານອື່ນໆ ໃຫ້ບຸກຄົນອ້ອມຂ້າງ ບໍ່ວ່າຈະແມ່ນສະມາຊິກຄອບຄົວ ກໍ່ຄື ຊຸມຊົນໂດຍລວມ ແລະ ປະສົບການຖອດຖອນ ຈາກຂະແໜງການເງິນຈຸລະພາກ ໄດ້ຢັ້ງຢືນໃຫ້ເຫັນວ່າ ເພດຍິງຈະເປັນຜູ້ແບ່ງປັນ ຜົນໄດ້ຮັບທາງດ້ານເສດຖະກິດໃຫ້ຜູ້ຄົນອ້ອມຂ້າງຫຼາຍກວ່າ”.
ທ່ານ ມະໄລທອງ ກົມມະສິດ, ລັດຖະມົນຕີ ກະຊວງອຸດສາຫະກຳ, ຍັງໄດ້ເນັ້ນຕື່ມອີກວ່າ “ພວກເຮົາ ຄວນສຸມ ຄວາມພະຍາຍາມ ໃສ່ບັນດາຂະແໜງການ ທີ່ເພດຍິງມີຄວາມສົນໃຈເປັນພິເສດ. ຕົວຢ່າງ: ຄັດເລຶອກເອົາບັນດາ ຂະແໜງທຸລະກິດເຊັ່ນ: ກະສິກຳ, ການຄ້າ ແລະ ຫັດຖະກຳ ທີ່ເພດຍິງມີສ່ວນຮ່ວມຫຼາຍໃນຖານະເປັນ ແຮງງານ ຫຼື ຜູ້ເປັນເຈົ້າຂອງ ແລະ ບໍລິຫານ ມາເປັນເປົ້າໝາຍຂອງການສົ່ງເສີມ. ສຳລັບຂະແໜງອຸດສາຫະກຳເຄື່ອງນຸ່ງຮົ່ມ ທີ່ມີແຮງງານເພດຍິງເປັນສ່ວນໃຫຍ່, ການຊ່ວຍເຫຼືອຂອງພວກເຮົາຄວນຈະສຸມໃສ່ການປັບປຸງປະສິດທິພາບຂອງແຮງງານ ແລະ ໃນຂະແໜງທຸລະກິດ ທີ່ມີເພດຍິງເປັນເຈົ້າຂອງ ອາດຈະເນັ້ນໜັກໃສ່ ການສົ່ງເສີມນະວັດຕະກຳໃໝ່ ແລະ ການລົງທຶນ ເປັນຕົ້ນ”.
ໃນນາມປະທານຮ່ວມ, ທ່ານ ນາງ ຈັນທະຈອນ ວົງໄຊ, ປະທານສະມາຄົມ ນັກທຸລະກິດຍິງລາວ ໄດ້ກ່າວສະແດງ ຄວາມຊົມເຊີຍຕໍ່ລັດຖະບານ ໂດຍສະເພາະກະຊວງ ອຸດສາຫະກຳ ແລະ ການຄ້າ ທີ່ໄດ້ໃຫ້ການສະໜັບສະໜູນ ຂະບວນການສຶກສາວິໄຈດັ່ງກ່າວ ເພື່ອກຳນົດຂໍ້ຈຳກັດຕົ້ນຕໍ ທີ່ກະທົບຕໍ່ ວິສາຫະກິດ ເຊິ່ງຜູ້ຍິງເປັນເຈົ້າຂອງ ແລະ ບໍລິຫານ ຢູ່ ສປປ ລາວ. ພ້ອມດຽວກັນ, ທ່ານ ນາງ ຈັນທະຈອນ, ຍັງໄດ້ແລກປ່ຽນ ບາງຂໍ້ຄິດເຫັນ ກ່ຽວກັບວິທີການເພື່ອສົ່ງເສີມ ໃຫ້ເພດຍິງສາມາດນຳໃຊ້ທ່າແຮງ ທັງໝົດທີ່ບົ່ມຊ້ອນໄວ້ ເຂົ້າໃນການປະກອບທຸລະກິດ ໂດຍໄດ້ກ່າວວ່າ “ພວກເຮົາຈຳເປັນຕ້ອງມີການປ່ຽນແປງ ໃນສາມຂົງເຂດຕົ້ນຕໍຄື: 1) ປັບປຸງນະໂຍບາຍເສດຖະກິດ, 2) ປັບປຸງລະບຽບ ກົດໝາຍ ແລະ ອົງການຈັດຕັ້ງຕ່າງໆ, ແລະ 3) ປ່ຽນທັດສະນະຄະຕິ ແລະ ວັດທະນະທຳ.
ປະເດັນສຳຄັນ ແລະ ຂໍ້ສະຫລຸບ ຈາກບົດສຶກສາດ້ານບົດບາດຍິງ-ຊາຍ ເພື່ອກຳນົດຂໍ້ຈຳກັດຕົ້ນຕໍ ທີ່ກະທົບຕໍ່ ວິສາຫະກິດ ເຊິ່ງຜູ້ຍິງເປັນເຈົ້າຂອງ ແລະ ບໍລິຫານ ຢູ່ ສປປ ລາວ ທີ່ຮັບຮອງໃນຄັ້ງນີ້ ແມ່ນການຮັບຮູ້ເຖິງຄວາມເປັນຈິງກ່ຽວກັບ ຄວາມສຳຄັນຂອງບົດບາດ ຍິງ-ຊາຍ ເຊິ່ງຖ້າບໍ່ມີຄວາມສະເໝີພາບ ແລະຂາດເພດຍິງໃນການມີສ່ວນຮ່ວມທາງເສດຖະກິດ ສາມາດສົ່ງຜົນໃນທາງລົບຕໍ່ການເຕີບໂຕຂອງເສດຖະກິດ ແລະ ຮຽກຮ້ອງໃຫ້ທຸກພາກສ່ວນມີສ່ວນຮ່ວມ ໃນການຊ່ວຍ ແກ້ໄຂບັນດາສິ່ງທ້າທາຍ ແລະ ຂໍ້ຈຳກັດຕົ້ນຕໍ່ ທີ່ສົ່ງຜົນກະທົບຕໍ່ວິສາຫະກິດທີ່ນັກທຸລະກິດຍິງເປັນເຈົ້າຂອງ ແລະ ບໍລິຫານ ໂດຍການສະໜັບສະໜູນ ການຈັດຕັ້ງປະຕິບັດບັນດານະໂຍບາຍ ທີ່ກ່ຽວຂ້ອງ ເພື່ອລົບລ້າງຂໍ້ຈຳກັດດັ່ງກ່າວ ແລະ ຫລຸດຜ່ອນຜົນກະທົບ ທາງລົບທີ່ອາດຈະເພີ່ມຂຶ້ນຈາກ ບັນດາກິດຈະກຳທາງເສດຖະກິດ ຕໍ່ບົດບາດຍິງ-ຊາຍ.
ໃນຕອນທ້າຍຂອງກອງປະຊູມ, ທ່ານ ມະໄລທອງ ກົມມະສິດ, ລັດຖະມົນຕີ ກະຊວງ ອຸດສາຫະກຳ ແລະ ການຄ້າ, ໄດ້ໃຫ້ກຽດກ່າວປິດກອງປະຊຸມ ໂດຍເນັ້ນເຖິງຄວາມຕັ້ງໃຈ ແລະຄຳໝັ້ນສັນຍາ ຂອງລັດຖະບານ ໃນການເຊື່ອມສານ ວຽກງານບົດບາດ ຍິງ-ຊາຍ ເຂົ້າໃນທຸກໂຄງການຊ່ວຍເຫລືອດ້ານວິຊາການ ເພື່ອພັດທະນາ ຂະແໜງການຄ້າ ແລະ ພາກເອກະຊົນ ລວມເຖິງບັນດາໂຄງການລົງທຶນຂອງລັດຖະບານ ແລະ ການຊຸກຍູ້ການຄຸ້ມຄອງ ຕິດຕາມບັນດາຕົວຊີ້ວັດ ທີ່ຕິດພັນກັບວຽກງານບົດບາດ ຍິງ-ຊາຍ ໃນທຸກໆໂຄງການເພື່ອການພັດທະນາ.
ພາບ-ຂ່າວໂດຍ: ນ. ເພັດປະກາຍ ສີສົມບູນ ສູນສະຖິຕິ ແລະ ຂໍ້ມູນຂ່າວສານ
