ໃນຕອນເຊົ້າເວລາ 10:30 ໂມງ ຂອງວັນທີ 27 ກໍລະກົດ 2022 ອົງຄະນະພັກກະຊວງອຸດສາຫະກໍາ ແລະ ການຄ້າ ໄດ້ຈັດພິທີ ມອບ-ຮັບ ໃບຢັ້ງຢືນເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2021 ໂດຍການເຂົ້າຮ່ວມເປັນປະທານ ຂອງ ສະຫາຍ ມະໄລທອງ ກົມມະສິດ ກໍາມະການສໍາຮອງສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີ ກະຊວງອຸດສາຫະກຳ ແລະ ການຄ້າ ມີຄະນະພັກ-ຄະນະນໍາ ກະຊວງ,
ຄະນະໜ່ວຍພັກ ແລະ ສະມາຊິກພັກຫຼັກແຫຼ່ງອ້ອມຂ້າງອົງຄະນະພັກກະຊວງອຸດສາຫະກໍາ ແລະ ການຄ້າ ເຂົ້າຮ່ວມ ຈໍານວນ 200 ທ່ານ.
ໂດຍປະຕິບັດຕາມມະຕິຕົກລົງ ຂອງຄະນະບໍລິຫານງານພັກກະຊວງອຸດສາຫະກໍາ ແລະ ການການຄ້າ ສະບັບເລກທີ 0128/ຄບພ.ອຄ, ລົງວັນທີ 26 ເມສາ 2022 ວ່າດ້ວຍການຮັບຮອງເອົາໜ່ວຍພັກປອດໃສ, ເຂັ້ມແຂງ, ໜັກແໜ້ງ ປະຈໍາປີ 2021.

              ສະຫາຍ ມະໄລທອງ ກົມມະສິດ ກຳມະການສຳຮອງສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີ ກະຊວງອຸດສາຫະກຳ ແລະ ການຄ້າ ໄດ້ມີທິດຊີ້ນໍາວ່າ ຈໍານວນ 24 ໜ່ວຍພັກ ທີ່ຂື້ນກັບອົງຄະນະພັກກະຊວງອຸດສາຫະກໍາ ແລະ ການຄ້າ ໄດ້ຮັບເປັນໜ່ວຍພັກປອດໃສ, ເຂັ້ມແຂງ, ໜັກແໜ້ງ ປະຈໍາປີ 2021 ແມ່ນຜົນສໍາເລັດທີ່ເອກອ້າງທະນົງໃຈຂອງຄະນະບໍລິຫານງານພັກ ກະຊວງອຸດສາຫະກໍາ ແລະ ການຄ້າ ແມ່ນການຊີ້ນໍານໍາພາຢ່າງໃກ້ຊິດຂອງຄະນະພັກ, ຄະນະນໍາກະຊວງ ໂດຍສະເພາະການຈັດຕັ້ງປະຕິບັດຕາມພາລະບົດບາດຂອງບັນດາໜ່ວຍພັກ ເປັນຜົນສໍາເລັດອັນສໍາຄັນຢ່າງຍິ່ງ ຊຶ່ງປະຕິບັດໄດ້ 100 ສ່ວນຮ້ອຍຂອງແຜນການ.

ທ່ານຍັງໄດ້ເນັ້ນຕື່ມວ່າ ໃຫ້ບັນດາໜ່ວຍພັກ ຮັກສາໄດ້ມູນເຊື້ອອັນດີງາມຂອງຕົນໄວ້ ແລະ ໃຫ້ຈັດຕັ້ງປະຕິບັດ ຕາມແຜນການສ້າງ ປອດໃສ, ເຂັ້ມແຂງ, ໜັກແໜ້ນ ປະຈໍາປີ 2022 ຢ່າງເລິກເຊິ່ງພາວະວິໃສສ່ອງແສງເຖິງຄວາມເປັນຈິງຂອງການນໍາພາ-ຊີ້ນໍາ ແຜນການ ວຽກງານໂດຍປະຕິບັດຕາມ 5 ທິດນໍາ ຂອງລະບຽບພັກ ຄື: 1. ດ້ານຄຸນທາດການເມືອງ, ຄຸນສົມບັດສະນທໍາປະຕິວັດ, 2. ດ້ານແນວຄິດ, 3. ດ້ານສະຕິຕໍ່ການຈັດຕັ້ງ ແລະ ລະບຽບວິໄມຂອງພັກ, 4. ເສີມຂະຫຍາຍບົດບາດການນໍາພາ ແລະ ວິທີເຮັດວຽກ ແລະ 5. ຄວາມຮັບຜິດຊອບໜ້າທີການເມືອງ.
ຕອນທ້າຍ ທ່ານໄດ້ກ່າວຕື່ມວ່າ ການປະເມີນຜົນປະຕິບັດແຜນການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຍັງບໍ່ສົມຄູ່ກັບສະພາບຕົວຈິງ ຍັງເປັນຮູບການ ສະນັ້ນ ໃຫ້ຄະນະດັ່ງກ່າວຫັນເປັນຄຸນນະພາບດີກ່ວາເກົ່າ.

ຂ່າວ-ພາບ ໂດຍ: ໄພວັນ ໂຄວັນທາ

ລົງຂ່າວໂດຍ: ນ. ເພັດປະກາຍ ສີສົມບູນ

ສູນສະຖິຕິ ແລະ ຂໍ້ມູນຂ່າວສານ/ກຜຮ/ກະຊວງ ອຄ