ໃນຕອນເຊົ້າຂອງວັນທີ 26 ມັງກອນ 2023, ທີ່ກະຊວງອຸດສາຫະກໍາ ແລະ ການຄ້າ (ອຄ) ໄດ້ຈັດກອງປະຊຸມຄົບຄະນະສະໄໝສາມັນ ຄະນະບໍລິຫານງານພັກກະຊວງ ອຄ ຄັ້ງທີ 4 ສະໄໝທີ V ແລະ ບັ້ນດໍາເນີນຊີວິດການເມືອງ ຂອງຄະນະບໍລິຫານງານພັກ ກະຊວງ ອຄ ປະຈໍາປີ 2022 ໃຫ້ກຽດເປັນປະທານ ຂອງສະຫາຍ ມະໄລທອງ ກົມມະສິດ ກຳມະການສໍາຮອງສູນກາງພັກ, ເລຂາຄະນະບໍລິຫານງານພັກ ກະຊວງ ອຄ ຜູ້ເຂົ້າຮ່ວມມີສະຫາຍຮອງເລຂາ, ບັນດາສະຫາຍຄະນະປະຈໍາພັກ, ກໍາມະການພັກກະຊວງ, ບັນດາສະຫາຍເລຂາໜ່ວຍພັກ, ຫົວໜ້າກົມ ແລະ ຫົວໜ້າສະຖາບັນ ທັງໝົດ ຈໍານວນ 18 ສະຫາຍ.
ປະທານກອງປະຊຸມໄດ້ກ່າວວ່າ: ເພືອປະຕິບັດຕາມ ກົດລະບຽບພັກປະຊາຊົນປະຕິວັດລາວ ສະໄໝທີ XI, ມະຕິຕົກລົງ ຂອງຄະນະພັກກະຊວງ ອຄ ສະບັບເລກທີ 0356/ຄບພ.ອຄ, ລົງວັນທີ 01 ທັນວາ 2022 ວ່າດ້ວຍລະບອບແບບແຜນວິທີເຮັດວຽກ ຂອງຄະນະບໍລິຫານງານພັກກະຊວງອຸດສາຫະກຳ ແລະ ການຄ້າ ສະໄໝທີ V, ແຜນດຳເນີນງານຂອງຄະນະບໍລິຫານງານພັກກະຊວງ ສະໄໝທີ V ສະບັບເລກທີ 0270/ຄບພ.ອຄ, ລົງວັນທີ 31 ສິງຫາ 2022 ແລະ ມະຕິຕົກລົງ ຂອງຄະນະບໍລິຫານງານພັກ ກະຊວງ ອຄ ສະບັບເລກທີ 010/ຄບພ.ອຄ, ລົງວັນທີ 23 ມັງກອນ 2023 ວ່າດ້ວຍການອະນຸມັດເປີດກອງປະຊຸມຄົບຄະນະສະໄໝສາມັນ ຄະນະບໍລິຫານງານພັກກະຊວງ ອຄ ຄັ້ງທີ 4 ສະໄໝທີ V. ກອງປະຊຸມໄຂຂຶ້ນໃນທ່າມກາງບັນຍາກາດທີ່ທົ່ວພັກ, ທົ່ວກອງທັບ ແລະ ທົ່ວປວງຊົນລາວທັງຊາດ ພວມອອກແຮງແຂ່ງຂັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ວຽກງານຕົວຈິງ, ຕິດພັນກັບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ອຄ ຢ່າງຕັ້ງໜ້າ. ໃນໄລຍະ 1 ປີທີ່ຜ່ານມາ ສະພາບການຂອງສາກົນ, ພາກພື້ນ ແລະ ພາຍໃນປະເທດ ໄດ້ມີການຜັນແປຢ່າງສັບສົນ ເປັນຕົ້ນ ການແຜ່ລະບາດຂອງພະຍາດໂຄວິດ-19 ຮອບໃໝ່, ການປັບຕົວຂຶ້ນສູງຂອງລາຄານໍ້າມັນ, ລາຄາຄໍາ ແລະ ລາຄາສິນຄ້າອຸປະໂພກ-ບໍລິໂພກ, ຄວາມຫຍຸ້ງຍາກທາງດ້ານການເງິນ, ອັດຕາເງິນເຟີ້, ຄວາມຂັດແຍ່ງທາງດ້ານການຄ້າ ຂອງສອງປະເທດມະຫາອຳນາດ, ການປ່ຽນແປງສະພາບດິນຟ້າອາກາດ ແລະ ໄພພິບັດທຳມະຊາດຕ່າງໆ; ຈາກສະພາບການດັ່ງກ່າວຂ້າງເທິງ ຊຶ່ງໄດ້ສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນ, ພະນັກງານ ແລະ ສະມາຊິກພັກ.
ກອງປະຊຸມຄັ້ງນີ້ສຸດທີ່ມີຄວາມໝາຍ, ຄວາມສໍາຄັນຢ່າງຍິ່ງ ເພາະຈະໄດ້ຮັບຟັງການລາຍງານ ແລະ ພ້ອມກັນປຶກສາຫາລື, ພິຈາລະນາຮັບຮອງຫຼາຍວຽກງານຢູ່ໃນ 2 ເອກະສານຕົ້ນຕໍ ດັ່ງນີ້: 1). ສະຫຼຸບຕີລາຄາການເຄື່ອນໄຫວນຳພາ-ຊີ້ນຳວຽກງານຮອບດ້ານ ຂອງຄະນະບໍລິຫານງານພັກກະຊວງ ອຄ ປະຈຳປີ 2022 ແລະ ທິດທາງຈຸດສຸມ ປະຈຳປີ 2023 ແລະ 2). ບົດສຳຫຼວດການນຳພາລວມ ຂອງຄະນະບໍລິຫານງານພັກ ກະຊວງອຸດສາຫະກຳ ແລະ ການຄ້າ ສະໄໝທີ V ປະຈໍາປີ 2022.
ປະທານກອງປະຊຸມ ຮຽກຮ້ອງມາຍັງບັນດາສະຫາຍທີ່ເຂົ້າຮ່ວມກອງປະຊຸມໃນຄັ້ງນີ້, ຈົ່ງເຊີດຊູ ແລະ ຍົກສູງຄວາມຮັບຜິດຊອບຂອງຕົນ ພ້ອມກັນສຸມສະຕິປັນຍາ ເຂົ້າໃນການຄົ້ນຄວ້າ ແລະ ປະກອບຄໍາຄິດ, ຄໍາເຫັນຢ່າງກົງໄປກົງມາມີເຫດມີຜົນ ຖືກກັບສະພາບຕົວຈິງການເຄື່ອນໄຫວນຳພາ ຂອງຄະນະບໍລິຫານພັກກະຊວງ ອຄ ໃນ 1 ປີ ຜ່ານມາ, ເພື່ອຊອກໃຫ້ເຫັນດ້ານຕັ້ງໜ້າທີ່ພົ້ນເດັ່ນ ແລະ ຂໍ້ຄົງຄ້າງ ທີ່ພວກເຮົາຕ້ອງໄດ້ຄົ້ນຄວ້າປັບປຸງແກ້ໄຂໃນຕໍ່ໜ້າ; ເພື່ອໃຫ້ໄດ້ຕາມລະດັບຄາດໝາຍດັ່ງກ່າວມານັ້ນ, ບັນດາສະຫາຍທີ່ເຂົ້າຮ່ວມກອງປະຊຸມທັງໝົດ ຈະຕ້ອງພ້ອມກັນຕັດສິນໃຈສູງ, ເຫັນໄດ້ຄວາມຮັບຜິດຊອບການເມືອງຕໍ່ຊາຕາກໍາຂອງປະເທດຊາດຂອງພວກເຮົາ, ສ້າງໃຫ້ພັກມີຄວາມປອດໃສ, ເຂັ້ມແຂງ, ໜັກແໜ້ນ ເພື່ອນໍາພາ-ພາລະກິດປະຕິວັດກ້າວໄປໜ້າຢ່າງບໍ່ຢຸດຢັ້ງ.
ທ່ານປະທານຍັງເນັ້ນຕື່ມວ່າ: ຢາກເຮັດໄດ້ແນວນີ້ ກ່ອນອື່ນໝົດພວກເຮົາສະມາຊິກພັກ, ຄະນະບໍລິຫານງານພັກກະຊວງ ຕ້ອງເປັນເອກະພາບກັນທາງດ້ານທັດສະນະ, ຄວາມຮັບຮູ້ ແລະ ສ້າງການຫັນປ່ຽນໃໝ່ ຕັ້ງໜ້າແກ້ໄຂຂໍ້ຄົງຄ້າງສິ່ງຫຍໍ້ທໍ້ ທີ່ເກີດຂຶ້ນຢູ່ໃນກະຊວງ ກໍ່ຄືຂະແໜງການຂອງພວກເຮົາໃຫ້ໝົດໄປເທື່ອລະກ້າວ, ທັງໝົດນັ້ນ ແມ່ນເພື່ອແນໃສ່ເຮັດໃຫ້ກະຊວງພວກເຮົາ ມີບາດກ້າວບຸກທະລຸໃໝ່ຮອບດ້ານ ແລະ ເຮັດໃຫ້ກອງປະຊຸມປະສົບຜົນສໍາເລັດຕາມຈຸດປະສົງຄາດໝາຍ ທີ່ໄດ້ກໍານົດໄວ້ຢ່າງຈົບງາມ, ຕາມຄຳຂວັນທີ່ວ່າ: “ຍົກສູງຄວາມສາມາດການນຳພາຂອງພັກ ໃນການພັດທະນາອຸດສາຫະກຳປຸງແຕ່ງ ແລະ ການຄ້າ ໃຫ້ທັນສະໄໝ, ກ້າວສູ່ເສດຖະກິດດີຈິຕອນ, ສີຂຽວ ແລະ ຍືນຍົງ”
ຂ່າວ-ພາບ: ທ ໄພວັນ ໂຄດວັນທາ
