ໃນວັນທີ 22 ກຸມພາ 2023 ວ່າງບໍ່ດົນຜ່ານມາ, ທີ່ຫ້ອງປະຊຸມຂອງ ພະແນກກະສິກໍາ ແລະ ປ່າໄມ້ ແຂວງຫຼວງພະບາງ, ກົມຊັບສິນທາງປັນຍາ, ກະຊວງອຸດສາຫະກໍາ ແລະ ການຄ້າ (ອຄ) ຮ່ວມກັບ ພະແນກອຸດສາຫະກໍາ ແລະ ການຄ້າ ແຂວງຫຼວງພະບາງ, ຈັດກອງປະຊຸມ ເຜີຍແຜ່ ຈຸດປະສົງຂອງໂຄງການ ນຳໃຊ້ຊັບສິນທາງປັນຍາ ເຂົ້າສູ່ຂະບວນການຜະລິດ ແລະ ກັບກຳຂໍ້ມູນ ກ່ຽວກັບຜູ້ຜະລິດ ໜຶ່ງເມືອງ ໜຶ່ງຜະລິດຕະພັນ (ODOP), ໂດຍໃຫ້ກຽດເປັນປະທານກອງປະຊຸມຂອງ ທ່ານ ນ. ຈັນສຸກ ແສງພະຈັນ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ຜູ້ເຂົ້າຮ່ວມມີ ທ່ານ ສັນຕິສຸກ ພູມສະຫວັດ, ຫົວໜ້າກົມຊັບສິນທາງປັນຍາ ອຄ, ມີທ່ານ ບຸນສົມ ຄຸນມະນີ, ຫົວໜ້າ ພະແນກ ອຄ ແຂວງຫຼວງພະບາງ, ມີບັນດາທ່ານຮອງພະແນກ ອຄ, ຜູ້ຕາງໜ້າຈາກ ພະແນກການອ້ອມຂ້າງ ແຂວງຫຼວງພະບາງ, ພະນັກງານທີ່ກ່ຽວຂ້ອງຈາກສູນກາງ ແລະ ທ້ອງຖິ່ນ ແລະ ມີບັນດາຜູ້ຜະລິດ ສິນຄ້າໜຶ່ງເມືອງ ໜຶ່ງຜະລິດຕະພັນ (ODOP) ທັງໝົດ 80 ທ່ານ

ໃນໂອກາດນີ້ ທ່ານ ນ. ຈັນສຸກ ແສງພະຈັນ, ຮອງລັດຖະມົນຕີ ກະຊວງ ອຄ ກໍໄດ້ໃຫ້ກຽດກ່າວເປີດກອງປະຊຸມວ່າ: ກອງປະຊຸມໃນຄັ້ງນີ້ ເປັນກິດຈະກຳໜຶ່ງທີ່ນອນຢູ່ໃນໂຄງການນຳໃຊ້ຊັບສິນທາງປັນຍາ ເຂົ້າສູ່ຂະບວນການຜະລິດ ກ່ຽວກັບຜູ້ຜະລິດໜຶ່ງເມືອງ-ໜຶ່ງຜະລິດຕະພັນ (ODOP) ໂດຍການສ້າງເຄື່ອງໝາຍການຄ້າ ແລະ ເຄື່ອງໝາຍລວມໝູ່ ເພື່ອສ້າງເປັນຍີ່ຫໍ້ສິນຄ້າຂອງລາວ ແລະ ສ້າງມູນຄ່າເພີ່ມໃຫ້ກັບຜະລິດຕະພັນ ຜ່ານແຜນງານ “ໜຶ່ງຜະລິດຕະພັນ-ໜຶ່ງຊັບສິນທາງປັນຍາ” ແລະ ເທື່ອນີ້ ກໍເປັນການເປີດກວ້າງໃຫ້ບັນດາທ່ານ ໄດ້ສາມາດເຂົ້າໃຈຕື່ມ ກ່ຽວກັບວຽກງານຊັບສິນທາງປັນຍາ ໂດຍສະເພາະ ກໍແມ່ນການສ້າງເຄື່ອງໝາຍການຄ້າ ຊຶ່ງເປັນສ່ວນສຳຄັນທີ່ຈະເຮັດໃຫ້ກິດຈະການຂອງທ່ານ ມີຊື່ສຽງ ແລະ ເປັນທີ່ຮັບຮູ້ໃນທົ່ວສັງຄົມ ແລະ ເປັນການສ້າງມູນຄ່າເພີ່ມໃຫ້ແກ່ວິສາຫະກິດ

ພ້ອມດຽວກັນນັ້ນ ທ່ານ ຍັງໄດ້ເນັ້ນໜັກໃຫ້ເຫັນກ່ຽວກັບຊັບສິນທາງປັນຍາ ໃນບາງດ້ານ ວ່າ: ໃນສະພາບເງື່ອນໄຂແຫ່ງການສ້າງສາພັດທະນາປະເທດຊາດໃນໄລຍະໃໝ່ນີ້, ແມ່ນມີຄວາມຮຽກຮ້ອງຕ້ອງການໃຫ້ມີການສ້າງເສດຖະກິດ ໃຫ້ມີປະສິດທິພາບ ແລະ ປະສິດທິຜົນ, ສ້າງຂີດຄວາມສາມາດໃນການແຂ່ງຂັນກັບພາກພື້ນ ແລະ ສາກົນ ຊຶ່ງເຄື່ອງມືທີ່ສໍາຄັນອັນໜຶ່ງກໍແມ່ນຊັບສິນທາງປັນຍາ ໂດຍສະເພາະການສ້າງມູນຄ່າເພີ່ມໃຫ້ແກ່ສິນຄ້າ, ການສ້າງຄວາມເຊື່ອຖືເຊື່ອໝັ້ນ ໃຫ້ແກ່ສິນຄ້າຜ່ານເຄື່ອງໝາຍການຄ້າ. ໃນໄລຍະຜ່ານມາຢູ່ ສປປ ລາວເຮົາ ກໍມີການພັດທະນາໄປເທື່ອລະກ້າວ ແລະ ກໍມີຫຼາຍຜະລິດຕະພັນທີ່ຜະລິດອອກມາ ເພື່ອຮັບໃຊ້ສັງຄົມ ໂດຍສະເພາະ ຜະລິດຕະພັນໂອດອບ, ແຕ່ການປົກປ້ອງສິດ ຫຼື ຜະລິດຕະພັນຂອງຕົນເອງສ້າງຂຶ້ນນັ້ນ ເປັນເລື່ອງທີ່ສຳຄັນ ໂດຍສະເພາະ ເຄື່ອງໝາຍການຄ້າຂອງຜະລິດຕະພັນ ຍັງເປັນແບບປະຖົມປະຖານ, ຂາດຄວາມເປັນເອກະລັກສະເພາະ ແລະ ຫຼາຍກາໝາຍ ກໍບໍ່ສາມາດຈົດເປັນເຄື່ອງໝາຍການຄ້າໄດ້; ສຳລັບແຂວງຫຼວງພະບາງ ມີພຽງ 13 ຫົວໜ່ວຍການຜະລິດ ໃນນັ້ນມີ 55 ລາຍການຜະລິດຕະພັນ ທີ່ເປັນໂອດອບ ຊຶ່ງເຫັນວ່າ ຍັງມີຫຼາຍກາໝາຍ ທີ່ຈະຕ້ອງໄດ້ປັບປຸງໃຫ້ມີລັກສະນະມືອາຊີບ ເພື່ອເຮັດໃຫ້ສາມາດເພີ່ມມູນຄ່າຂອງຜະລິດຕະພັນຂຶ້ນ ແລະ ໄດ້ຮັບການປົກປ້ອງສິດຊັບສິນທາງປັນຍາ.

ທ່ານປະທານ ກ່າວຕື່ມອີກວ່າ: ການນຳໃຊ້ເຄື່ອງມືທີ່ຖືກຕ້ອງ ເພື່ອຂັບເຄື່ອນທຸລະກິດ ຈຶ່ງເປັນບັນຫາທີ່ສຳຄັນທີ່ຈະຕ້ອງໄດ້ຮັບຄວາມຮັບເອົາໃຈໃສ່ເປັນຢ່າງຍິ່ງ; ຈາກນະໂຍບາຍໜຶ່ງເມືອງໜຶ່ງຜະລິດຕະພັນ ໃນຕໍ່ໜ້ານີ້ ຈະເນັ້ນໃສ່ວຽກງານ ໂດຍສະເພາະການຜັນຂະຫຍາຍຕໍ່ຍອດໃຫ້ກາຍເປັນ “ໜຶ່ງຜະລິດຕະພັນ-ໜຶ່ງຊັບສິນທາງປັນຍາ” ເພື່ອເຮັດໃຫ້ຊັບສິນທາງປັນຍາ ເປັນຕົວຊ່ວຍເຂົ້າໃນການຂັບເຄື່ອນ ແລະ ສ້າງມູນຄ່າເພີ່ມໃຫ້ກັບທຸລະກິດຂອງລາວ. ໃນຫຼາຍປັດໄຈຂອງການເລີ່ມເຮັດທຸລະກິດຂະໜາດນ້ອຍ ຫຼື ກາງ, ການໃຫ້ຄວາມສໍາຄັນກັບຊັບສິນທາງປັນຍາ ເພື່ອສ້າງມູນຄ່າເພີ່ມໃຫ້ແກ່ວິສາຫະກິດຂອງຕົນ ເປັນສິ່ງສໍາຄັນ ໂດຍສະເພາະ ການສ້າງເຄື່ອງໝາຍການຄ້າ ຊຶ່ງປັດຈຸບັນຖືວ່າຍັງຢູ່ໃນລະດັບຈໍານວນທີ່ໜ້ອຍຫຼາຍ. ສະນັ້ນ, ການນຳໃຊ້ຊັບສິນທາງປັນຍາ ຄືກຸນແຈສຳຄັນຂອງການຂັບເຄື່ອນສ້າງມູນຄ່າເພີ່ມ ແລະ ຄວາມໜ້າເຊື່ອຖືໃຫ້ແກ່ວິສາຫະກິດ; ຍິ່່ງໄປກວ່ານັ້ນ, ການປົກປ້ອງຊັບສິນທາງປັນຍາທີ່ເຂັ້ມແຂງ ຍັງຈະເປັນປັດໄຈສຳຄັນຂອງການເຮັດໃຫ້ເກີດການລົງທຶນ ແລະ ກິດຈະກຳທາງການຄ້າ ຈາກຕ່າງປະເທດ ອີກດ້ວຍ

ໃນກອງປະຊຸມຄັ້ງນີ້ ຜູ້ເຂົ້າຮ່ວມໄດ້ຮັບຝັງການບັນຍາຍ ໃນຫົວຂໍ້ຕ່າງໆ ເຊັ່ນ: ຄວາມສໍາຄັນຂອງວຽກງານຊັບສິນທາງປັນຍາ; ສໍາລັບທຸລະກິດຍຸດທະສາດໃນການສ້າງ ແລະ ຈົດທະບຽນເຄື່ອງໝາຍການຄ້າ; ແນະນຳຂັ້ນຕອນ ແລະ ການປະກອບເອກະສານຍື່ນຄຳຮ້ອງຂໍຈົດທະບຽນເຄື່ອງໝາຍການຄ້າ, ພ້ອມນັ້ນ ໃນກອງປະຊຸມກໍໄດ້ມີການສົນທະນາ ແລະ ແລກປ່ຽນຄໍາຄິດເຫັນ, ເພື່ອໃຫ້ຜູ້ເຂົ້າຮ່ວມສາມາດເຂົ້າໃຈໄດ້ເຖິງບັນດາປະເພດຂອງຊັບສິນທາງປັນຍາ, ເພື່ອຊ່ວຍໃຫ້ເຂົ້າໃຈເຖິງຜົນປະໂຫຍດ ຈາກການນຳໃຊ້ຊັບສິນທາງປັນຍາ, ການນຳໃຊ້ສິດປົກປ້ອງຊັບສິນທາງປັນຍາ ຂອງຕົນເອງ ແລະ ເຂົ້າໃຈເຖິງຄວາມໝາຍ, ຄວາມສໍາຄັນ ຂອງວຽກງານຊັບສິນທາງປັນຍາ ຕໍ່ກັບຂະບວນການຜະລິດ ເປັນສິນຄ້າຫຼາຍຂຶ້ນ, ສ້າງເຄື່ອງໝາຍການຄ້າເພື່ອສ້າງເປັນຍີ່ຫໍ້ສິນຄ້າລາວ, ແນໃສ່ສ້າງມູນຄ່າເພີ່ມໃຫ້ແກ່ຜະລິດຕະພັນ, ສ້າງຄວາມຈື່ຈຳສິນຄ້າໃຫ້ແກ່ຜູ້ຊົມໃຊ້ ສາມາດຈຳແນກໄດ້ວ່າ ສິນຄ້າໂຕນີ້ແມ່ນຜະລິດຈາກຫຍັງ, ຜະລິດຢູ່ໃສ, ໃຜເປັນເຈົ້າຂອງ, ຊົມໃຊ້ມີຄຸນນະພາບດີຄືແນວໃດ ເພື່ອສ້າງຄວາມເຊື່ອໝັ້ນ ແລະ ຄວາມເຊື່ອຖືຕໍ່ຜະລິດຕະພັນນັ້ນໆ. ຊຶ່ງເວົ້າໄດ້ວ່າ ຊັບສິນທາງປັນຍາ ກໍມີຄວາມສຳຄັນ ແລະ ຈຳເປັນຕໍ່ການພັດທະນາປະເທດຊາດ ເປັນຕົວຄັບເຄື່ອນໃນການຊຸກຍູ້ສ້າງເສດຖະກິດແຫ່ງຊາດໃຫ້ມີປະສິດທິຜົນ ແລະ ມີຄວາມສາມາດໃນການແຂ່ງຂັນກັບພາກພື້ນ ແລະ ສາກົນໄດ້

ພ້ອມດຽວກັນນັ້ນ ໃນວັນທີ 21 ກຸມພາ 2023, ທີ່ ແຂວງຫຼວງພະບາງ, ທ່ານ ສັນຕິສຸກ ພູມສະຫວັດ ຫົວໜ້າກົມຊັບສິນທາງປັນຍາ ອຄ ພ້ອມດ້ວຍຄະນະ ໄດ້ລົງຢ້ຽມຢາມ ແລະ ໃຫ້ຄຳປຶກສາ ແກ່ຜູ້ປະກອບການຕ່າງໆ ເຊັ່ນ: ກຸ່ມຫັດຖະກຳບ້ານຜານົມ, ນາງ ໂຊກທະວີ (ຜ້າໄໝ, ປັກດິ່ງ), ຮ້ານ ປ້າສົມຈິດ (ຜ້າໄໝ, ປັກດິ່ງ), ຮ້ານສົມໝູ ຂອງທ່ານ ທິດໂມະ ແລະ ຮ້ານແກະສະຫຼັກ ທ່ານ ອຸ່ນເຮືອນ, ການລົງຢ້ຽມຢາມ ແລະ ໃຫ້ຄຳປຶກສາໃນຄັ້ງນີ້ ແມ່ນເພື່ອເກັບກໍາຂໍ້ມູນ ແລະ ໃຫ້ຄວາມເຂົ້າໃຈເພີ່ມຕື່ມ ກ່ຽວກັບຊັບສິນຍທາງປັນຍາ ໂດຍສະເພາະ ຜົນຂອງການຈົດທະບຽນເຄື່ອງໝາຍການຄ້າ, ການປົກປ້ອງເຄື່ອງໝາຍການຄ້າ, ພ້ອມທັງແນະນໍາ ກ່ຽວກັບການອອກແບບເຄື່ອງໝາຍການຄ້າ ແລະ ການຫຸ້ມຫໍ່ຜະລິດຕະພັນສິນຄ້າ ເພື່ອເຮັດໃຫ້ສິນຄ້າມີຄວາມໂດດເດັ່ນສວຍງາມ ແລະ ເປັນທີ່ສົນໃຈຂອງຜູ້ບໍລິໂພກ ກໍຄື ສັງຄົມ, ພ້ອມນັ້ນ ຍັງຈະສາມາດຕໍ່ຍອດຜະລິດຕະພັນສິນຄ້າ ໃນການເຂົ້າເຖິງຕະຫຼາດພາຍໃນ ແລະ ຕ່າງປະເທດໄດ້

ຮຽບຮຽງ: ທ ໄພວັນ ໂຄດວັນທາ

ຂ່າວ-ພາບ: ພະກາວັນ ໂພທິຣາຊ