ໃນວັນທີ 24 ກຸມພາ 2023 ຜ່ານມາ, ທີ່ຫ້ອງປະຊຸມຂອງພະແນກສຶກສາທິການ ແລະ ກິລາ ແຂວງອຸດົມໄຊ, ກົມຊັບສິນທາງປັນຍາ, ກະຊວງອຸດສາຫະກໍາ ແລະ ການຄ້າ (ອຄ) ຮ່ວມກັບ ພະແນກອຸດສາຫະກໍາ ແລະ ການຄ້າ ແຂວງອຸດົມໄຊ, ຈັດກອງປະຊຸມເຜີຍແຜ່ ຈຸດປະສົງຂອງໂຄງການ ນຳໃຊ້ຊັບສິນທາງປັນຍາ ເຂົ້າສູ່ຂະບວນການຜະລິດ ແລະ ກັບກຳຂໍ້ມູນ ກ່ຽວກັບຜູ້ຜະລິດ ໜຶ່ງເມືອງໜຶ່ງຜະລິດຕະພັນ (ODOP), ໂດຍໃຫ້ກຽດເປັນປະທານກອງປະຊຸມຂອງ ທ່ານ ນ. ຈັນສຸກ ແສງພະຈັນ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ. ຜູ້ເຂົ້າຮ່ວມມີທ່ານ ສັນຕິສຸກ ພູມສະຫວັດ, ຫົວໜ້າກົມຊັບສິນທາງປັນຍາ, ທ່ານ ນ ໄມພອນ ສີລິວົງ, ຫົວໜ້າ ພະແນກ ອຄ ແຂວງອຸດົມໄຊ, ມີບັນດາທ່ານຮອງຫົວໜ້າພະແນກ ອຄ, ຜູ້ຕາງໜ້າຈາກ ພະແນກການອ້ອມຂ້າງ ແຂວງອຸດົມໄຊ, ພະນັກງານທີ່ກ່ຽວຂ້ອງຈາກສູນກາງ ແລະ ທ້ອງຖິ່ນ ແລະ ມີບັນດາຜູ້ຜະລິດ ສິນຄ້າໜຶ່ງເມືອງໜຶ່ງຜະລິດຕະພັນ (ODOP) ເຂົ້າຮ່ວມ 86 ທ່ານ

ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອເຜີຍແຜ່ໂຄງການ ນຳໃຊ້ຊັບສິນທາງປັນຍາ ເຂົ້າສູ່ຂະບວນການຜະລິດ ແລະ ກັບກຳຂໍ້ມູນ ກ່ຽວກັບຜູ້ຜະລິດ ໜຶ່ງເມືອງໜຶ່ງຜະລິດຕະພັນ (ODOP) ໂດຍແນໃສ່ຊ່ວຍໃນການສ້າງເຄື່ອງໝາຍການຄ້າ ແລະ ເຄື່ອງໝາຍລວມໝູ່ ເພື່ອສ້າງເປັນຍີ່ຫໍ້ສິນຄ້າຂອງລາວ ແລະ ສ້າງມູນຄ່າເພີ່ມໃຫ້ກັບຜະລິດຕະພັນ ຜ່ານແຜນງານ “ໜຶ່ງຜະລິດຕະພັນ – ໜຶ່ງຊັບສິນທາງປັນຍາ”  ແລະ ເທື່ອນີ້ ກໍເປັນການເປີດກວ້າງໃຫ້ບັນດາຜູ້ເຂົ້າຮ່ວມ ໄດ້ສາມາດເຂົ້າໃຈຕື່ມ ກ່ຽວກັບວຽກງານຊັບສິນທາງປັນຍາ ໂດຍສະເພາະ ກໍແມ່ນການສ້າງເຄື່ອງໝາຍການຄ້າ ຊຶ່ງເປັນສ່ວນສຳຄັນທີ່ຈະເຮັດໃຫ້ກິດຈະການຂອງຜູ້ຜະລິດ ແລະ ຜູ້ປະກອບການມີຊື່ສຽງ, ເປັນທີ່ຮັບຮູ້ໃນທົ່ວສັງຄົມ ແລະ ເປັນການສ້າງມູນຄ່າເພີ່ມໃຫ້ແກ່ສິນຄ້າ ກໍຄື ວິສາຫະກິດຂອງຕົນ.

ໃນໄລຍະຜ່ານມາ ຢູ່ ສປປ ລາວເຮົາ ກໍມີການພັດທະນາໄປເທື່ອລະກ້າວ ເມື່ອປີ 2020 ມີຈຳນວນໂຮງງານອຸດສາຫະກຳ ທີ່ຫຼາຍກວ່າໝູ່, ຜະລິດຕະພັນ ກໍມີຈຳນວນເພີ່ມຂຶ້ນຕາມລຳດັບ ແຕ່ການປົກປ້ອງສິດ ຫຼື ຜະລິດຕະພັນຂອງຕົນເອງສ້າງຂຶ້ນນັ້ນ ເປັນເລື່ອງທີ່ສຳຄັນ; ສຳລັບແຂວງອຸດົມໄຊ ມີພຽງ 15 ລາຍການຜະລິດຕະພັນ ທີ່ເປັນໂອດອບ. ເພື່ອເຮັດໃຫ້ມູນຄ່າສາມາດເພີ່ມຂຶ້ນ  ແລະ ໄດ້ຮັບການປົກປ້ອງສິນຄ້າຂອງເຮົານັ້ນ ການນຳໃຊ້ເຄື່ອງມືທີ່ຖືກຕ້ອງ ເພື່ອຂັບເຄື່ອນທຸລະກິດ ຈຶ່ງເປັນບັນຫາທີ່ສຳຄັນ ທີ່ຕ້ອງໄດ້ຮັບຄວາມຮັບເອົາໃຈໃສ່ເປັນຢ່າງສູງ; ຈາກນະໂຍບາຍໜຶ່ງເມືອງໜຶ່ງຜະລິດຕະພັນ ໃນຕໍ່ໜ້ານີ້ ຈະເນັ້ນໃສ່ວຽກງານ ໂດຍສະເພາະການຜັນຂະຫຍາຍຈາກໜຶ່ງຜະລິດຕະພັນ ເປັນໜຶ່ງຊັບສິນທາງປັນຍາ ເພື່ອເຮັດໃຫ້ຊັບສິນທາງປັນຍາ ເປັນຕົວຊ່ວຍເຂົ້າໃນການຂັບເຄື່ອນທຸລະກິດ ແລະ ເປັນປັດໄຈສຳຄັນຂອງການເຮັດໃຫ້ເກີດການລົງທຶນ ແລະ ກິດຈະກຳທາງການຄ້າ ຈາກຕ່າງປະເທດ ກໍຄື ການຂັບເຄື່ອນເສດຖະກິດແຫ່ງຊາດ ໃຫ້ມີການຂະຫຍາຍຕົວເທື່ອລະກ້າວ ແລະ ຕໍ່ເນື່ອງ

ໃນກອງປະຊຸມຄັ້ງນີ້ ຜູ້ເຂົ້າຮ່ວມໄດ້ຮັບຝັງການບັນຍາຍ ໃນຫົວຂໍ້ເຊັ່ນ: ຄວາມສໍາຄັນຂອງວຽກງານຊັບສິນທາງປັນຍາ; ສໍາລັບທຸລະກິດຍຸດທະສາດໃນການສ້າງ ແລະ ຈົດທະບຽນເຄື່ອງໝາຍການຄ້າ; ແນະນຳຂັ້ນຕອນ ແລະ ການປະກອບເອກະສານຍື່ນຄຳຮ້ອງຂໍຈົດທະບຽນເຄື່ອງໝາຍການຄ້າ, ພ້ອມນັ້ນ ໃນກອງປະຊຸມກໍໄດ້ມີການສົນທະນາ ແລະ ແລກປ່ຽນຄໍາຄິດເຫັນ, ເພື່ອໃຫ້ຜູ້ເຂົ້າຮ່ວມສາມາດເຂົ້າໃຈໄດ້ເຖິງບັນດາປະເພດຂອງຊັບສິນທາງປັນຍາ, ເພື່ອຊ່ວຍໃຫ້ເຂົ້າໃຈເຖິງຜົນປະໂຫຍດ ຈາກການນຳໃຊ້ຊັບສິນທາງປັນຍາ, ການນຳໃຊ້ສິດປົກປ້ອງຊັບສິນທາງປັນຍາ ຂອງຕົນເອງ

ໃນວັນທີ 24 ກຸມພາ 2023 ຂອງວັນດຽວກັນ ທີ່ຫ້ອງວ່າການແຂວງອຸດົມໄຊ, ທ່ານ ນ. ຈັນສຸກ ແສງພະຈັນ, ຮອງລັດຖະມົນຕີ ອຄ ແລະ ການຄ້າ ພ້ອມດ້ວຍຄະນະ ກໍໄດ້ເຂົ້າຢ້ຽມຂໍ່ານັບ ແລະ ພົບປະ ທ່ານ ອ່ອນແກ້ວ ອຸ່ນອາລົມ, ຮອງເຈົ້າແຂວງ, ແຂວງອຸດົມໄຊ, ເພື່ອລາຍງານຈຸດປະສົງຂອງໂຄງການ ໃນການລົງມາຈັດຕັ້ງປະຕິບັດ ກອງປະຊຸມ ດັ່ງກ່າວ

ໃນວັນທີ 23 ກຸມພາ 2023, ຄະນະດັ່ງກ່າວ ກໍໄດ້ໄດ້ລົງເຄື່ອນໄຫວຢ້ຽມຢາມຊຸກຍູ້-ສົ່ງເສີມ ແລະ ໃຫ້ຄຳປຶກສາແກ່ກຸ່ມຜູ້ຜະລິດ ແລະ ຜູ້ປະກອບການໜຶ່ງເມືອງໜຶ່ງຜະລິດຕະພັນ (ODOP) ເຊິ່ງປະກອບມີ ກຸ່ມວິສາຫະກິດ ຫັດຖະກຳໄຕລື້ ສ່ວນບຸກຄົນ; ກຸ່ມຜະລິດໄຄແຜ່ນ ບ້ານວຽງຄຳ; ກຸ່ມວິສາຫະກິດ ບຸດໄຊຍາ ສ່ວນບຸກຄົນ ຜະລິດ ແລະ ຈຳໜ່າຍໝາກກູ້ ບ້ານດອນສະອາດ, ເພື່ອເກັບກໍາຂໍ້ມູນ ແລະ ໃຫ້ຄຳປຶກສາ ກ່ຽວກັບຊັບສິນທາງປັນຍາ ເພີ່ມຕື່ມ ໂດຍສະເພາະ ການປົກປ້ອງເຄື່ອງໝາຍການຄ້າ, ພ້ອມທັງແນະນໍາ ກ່ຽວກັບການອອກແບບເຄື່ອງໝາຍການຄ້າ ແລະ ການຫຸ້ມຫໍ່ຜະລິດຕະພັນສິນຄ້າ ເພື່ອເຮັດໃຫ້ສິນຄ້າມີຄວາມໂດດເດັ່ນສວຍງາມ ແລະ ເປັນທີ່ສົນໃຈຂອງຜູ້ບໍລິໂພກ ກໍຄື ສັງຄົມ ແລະ ຍັງສາມາດຕໍ່ຍອດຜະລິດຕະພັນສິນຄ້າຂອງຕົນເອງໄດ້ໃນອະນາຄົດ

ຮຽບຮຽງ: ທ ໄພວັນ ໂຄດວັນທາ

ຂ່າວ-ພາບ: ພະກາວັນ ໂພທິຣາຊ (ກົມຊັບສິນທາງປັນຍາ)