ຕອນບ່າຍ ເວລາ 02: 00 ໂມງ ຂອງວັນທີ 13 ມີນາ 2023 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ; ທ່ານ ນາງ ຣີຄາຣດາ ລຸຍສ ຣີເອເກີ, ຜູ້ຕາງໜ້າອົງການສະຫະປະຊາຊາດ ເພື່ອການພັດທະນາ (UNDP) ປະຈໍາລາວ ໄດ້ເຂົ້າຢ້ຽມອໍາລາ ທ່ານ ປອ ມະໂນທອງ ວົງໄຊ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ເນື່ອງໃນໂອກາດການສໍາເລັດການປະຕິບັດໜ້າທີ່ວຽກງານ ຂອງຕົນປະຈໍາຢູ່ ສປປ ລາວ ແລະ ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 06 ທ່ານ.
ທ່ານ ປອ ມະໂນທອງ ວົງໄຊ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍ້ອງຍໍຊົມເຊີຍ ຕໍ່ ທ່ານ ນາງ ຣີຄາຣດາ ລຸຍສ ຣີເອເກີ, ທີ່ມີຜົນງານປະກອບສ່ວນຫຼາຍດ້ານໃຫ້ແກ່ ສປປ ລາວ ເປັນຕົ້ນການຮ່ວມມືທາງດ້ານການຄ້າ, ການລົງທຶນໂຄງການໃຫຍ່ທີ່ປິ່ນອ້ອມ ໃຫ້ແກ່ເສດຖະກິດຂອງລາວ ແລະ ໂຄງການແລກປ່ຽນອື່ນໆ ລວມເຖິງການທີ່ໄດ້ຊ່ວຍເຫຼືອໃນໄລຍະຜ່ານມາ ນອກນັ້ນຍັງເປັນຄູ່ຮ່ວມມືທີ່ດີ. ທັງສອງຝ່າຍໃຫ້ຄໍາໝັ້ນສັນຍາຕໍ່ກັນວ່າ: ຈະສືບຕໍ່ຜັນຂະຫຍາຍຍຸດທະສາດໄລຍະຍາວ, ການຮັກສາມູນເຊື້ອໃນການຮ່ວມພັດທະນາເສດຖະກິດ-ສັງຄົມທີ່ດີ ແລະ ວຽກງານອື່ນໃນຕໍ່ໜ້າໃຫ້ແກ່ ສປປ ລາວ.
ທ່ານ ນາງ ຣີຄາຣດາ ລຸຍສ ຣີເອເກີ, ໄດ້ກ່າວວ່າ: ຂ້າພະເຈົ້າຮູ້ສຶກພາກພູມໃຈທີ່ໄດ້ປະຕີບັດໜ້າທີ່ວຽກງານທາງການ ປະຈໍາ ສປປ ລາວ ແລະ ກໍ່ສະແດງຄວາມຂອບໃຈມາຍັງທ່ານ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ໃນໄລຍະຜ່ານມາ ທີ່ອໍານວຍຄວາມສະດວກໃຫ້ແກ່ຂ້າພະເຈົ້າ.
ຕອນທ້າຍ ທ່ານ ຮອງລັດຖະມົນຕີ ໄດ້ອວຍພອນໄຊ ໃຫ້ທ່ານຜູ້ຕາງໜ້າຈົ່ງເດີນທາງກັບຄືນປະເທດດ້ວຍຄວາມສະຫວັດດີພາບ ແລະ ສົ່ງເສີມສາຍພົວພັນ ແລະ ການຮ່ວມມື ຊຶ່ງກັນ ແລະ ກັນໃຫ້ດີຂຶ້ນເລື້ອຍໆ.
ພາບ-ຂ່າວ: ໄພຄໍາອີ ວິໄລຄໍາ ສູນສະຖິຕິ ແລະ ຂໍ້ມູນຂ່າວສານ, ກຜຮ/ກະຊວງ ອຄ.
