ໃນວັນທີ 16 ມີນາ 2023, ທີ່ ໂຮງແຮມ ແລນມາກ ນະຄອນຫຼວງວຽງຈັນ, ຄະນະບໍລິຫານງານສະຫະພັນແມ່ຍິງ ກະຊວງອຸດສາຫະກໍາ ແລະ ການຄ້າ ຈັດງານສະເຫຼີມສະຫຼອງວັນແມ່ຍິງສາກົນ ວັນທີ 8 ມີນາ ຄົບຮອບ 113 ປີ ແລະ ງານສຳມະນາໃນຫົວຂໍ້“ ແມ່ຍິງຍຸກໃໝ່ ກ້າເວົ້າ ກ້າເຮັດ ກ້າສະແດງອອກ ແລະ ກ້າຮັບຜິດຊອບ” ໃຫ້ກຽດເປັນປະທານຮ່ວມຂອງ ທ່ານ ນາງ ຈັນສຸກ ແສງພະຈັນ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ, ທ່ານ ແຟຣງ ຕີບິຖານ ຫົວໜ້າໂຄງການຄອມພລີດ ແລະ ທ່ານ ນາງ ສົມໝາຍ ພົມມຸນິວົງ ຄະນະບໍລິຫານງານສູກາງສະຫະພັນແມ່ຍິງ, ປະທານສະຫະພັນແມ່ຍິງກະຊວງ ອຄ ເຂົ້າຮ່ວມມີ ຄະນະພັກ, ຄະນະນໍາກະຊວງ, ເລຂາໜ່ວຍພັກອອ້ມຂ້າງກະຊວງ, ຕາງໜ້າຊາວໜຸ່ມ, ກໍາມະບານ ພ້ອມດ້ວຍ ສະມາຊິກແມ່ນຍິງ ທັງໝົດ ຈໍານວນ 200 ທ່ານ.
ເນື່ອງໃນໂອກາດສະເຫຼີມສະຫຼອງວັນແມ່ຍິງສາກົນ ຊຶ່ງວຽນມາບັນຈົບຄົບຮອບ 113 ປີ ຖືໄດ້ວ່າເປັນວັນທີ່ມີຄວາມໝາຍຄວາມສຳຄັນ ໃນໜ້າປະຫວັດສາດໂລກ ເພື່ອລະນຶກເຖິງຄວາມເຂັ້ມແຂງຂອງແມ່ຍິງ ທີ່ໄດ້ຕໍ່ສູ້ເພື່ອສິດເສລີພາບ ແລະ ຄວາມເປັນທຳ ໂດຍມື້ນີ້ສະຫະພັນແມ່ຍິງ ກະຊວງ ອຄ ຈຶ່ງໄດ້ພ້ອມກັນຈັດຕັ້ງຂະບວນການສະເຫຼີມສະຫຼອງວັນດັ່ງກ່າວ ອັນເຕັມໄປດ້ວຍບັນຍາກາດຟົດຟື້ນ ໄປພ້ອມໆກັບຂະບວນການສະເຫຼີມສະຫຼອງວັນແມ່ຍິງໃນທົ່ວປະເທດ ກໍຄືໃນທົ່ວໂລກ.
ເພື່ອເຮັດໃຫ້ຂະບວນການສະເຫຼີມສະຫຼອງວັນແມ່ຍິງສາກົນ ໃນປີນີ້ ເຕັມໄປດ້ວຍຄວາມໝາຍສຳຄັນ ແລະ ມີເນື້ອໃນອັນອຸດົມສົມບູນ ພວກເຮົາທັງໝົດຈະໄດ້ ສຳມະນາຫົວຂໍ້ “ແມ່ຍິງຍຸກໃໝ່ ກ້າເວົ້າ ກ້າເຮັດ ກ້າສະແດງອອກ ແລະ ກ້າຮັບຜິດຊອບ”. ແລະ ພ້ອມກັນຍົກສູງ ຄໍາຂວັນ ໃນການສະເຫຼີມສະຫຼອງ ວັນແມ່ນຍິງສາກົນ ປີ 2023 ທີ່ວ່າ “ການນຳໃຊ້ດີຈິຕອນ ສຳລັບທຸກຄົນ: ການນຳໃຊ້ນະວັດຕະກຳ ແລະ ເຕັກໂນໂລຊີເພື່ອຄວາມສະເໜີ ພາບ ຍິງ – ຊາຍ”
ຢ່າງໃດກໍຕາມ, ການພັດທະນາໃນຂົງເຂດວຽກງານແມ່ຍິງ ຂອງພວກເຮົາ ກໍໄດ້ສູ້ຊົນ ແລະ ເຮັດສຳເລັດໜ້າທີການເມືອງ ທີ່ພັກ, ລັດຖະບານ ແລະ ປະຊາຊົນໄດ້ມອບໝາຍໃຫ້ ສະແດງອອກ ກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດຄັ້ງຫຼ້າສຸດ ທີ່ໄດ້ຮັບຮອງເອົາແຜນພັດທະນາແມ່ຍິງແຫ່ງຊາດ 2021-2025 ຊຶ່ງມີ 10 ແຜນງານ, 65 ໂຄງການ; ໄດ້ຮັບຮອງເອົາກົດລະບຽບຂອງສະຫະພັນແມ່ຍິງລາວ ຕິດພັນກັບຄຳຂວັນຂອງສະຫະພັນແມ່ຍິງລາວ ຄື: “ພັດທະນາຄວາມສະເໝີພາບ ຍິງ-ຊາຍ ຕິດພັນກັບການພັດທະນາປະເທດຊາດ” ແລະ ຂໍ້ແຂ່ງຂັນ 3 ດີ ຂອງສະຫະພັນແມ່ຍິງລາວ (ພົນລະເມືອງດີ, ພັດທະນາດີ ແລະ ສ້າງຄອບຄົວດີ).
ຄະນະບໍລິຫານງານສະຫະພັນແມ່ຍິງ ກະຊວງ ອຄ ກໍໄດ້ສຸມຄວາມພະຍາມໃນການຜັນຂະຫຍາຍ ແຜນພັດທະນາແມ່ຍິງແຫ່ງຊາດ ກຳນົດເປັນແຜນງານຂອງສະຫະພັນແມ່ຍິງ ກະຊວງ ອຄ ປີ 2021-2025 ໂດຍສຸມໃສ່ 4 ແຜນງານຕົ້ນຕໍ ໃນການສ້າງຄວາມເຂັ້ມແຂງໃຫ້ອົງການຈັດຕັ້ງສະຫະພັນແມ່ຍິງ ແລະ ພັດທະນາບຸກຄະລາກອນເພດຍິງກະຊວງ ອຄ; ສົ່ງເສີມທາງດ້ານວິຊາການໃຫ້ແກ່ແມ່ຍິງຂົງເຂດ ອຄ; ສົ່ງເສີມຄວາມກ້າວໜ້າແມ່ຍິງ ແລະ ສິດສະເໝີພາບ ຍິງ-ຊາຍ ຂະແໜງ ອຄ; ແລະ ສ້າງຂະບວນການ ແລະ ກິດຈະກຳທາງສັງຄົມ. ເຫັນໄດ້ວ່າແຜນງານດັ່ງກ່າວ ແມ່ນເພື່ອຊຸກຍູ້ການພັດທະນາແມ່ຍິງຢ່າງຮອບດ້ານ ໂດຍຈະໄດ້ມີການຜັນຂະຫຍາຍເປັນ ແຜນປະຕິບັດງານ ແລະ ກິດຈະກຳພັດທະນາແມ່ຍິງເປັນອັນລະອຽດ ເພື່ອໃຫ້ສອດຄ່ອງກັບເງື່ອນໄຂຕົວຈິງທາງດ້ານເສດຖະກິດ- ສັງຄົມ, ການເມືອງ ແລະ ຄວາມຮຽກຮ້ອງຕ້ອງການຂອງວຽກງານແມ່ຍິງກະຊວງ ອຄ ໃນແຕ່ລະໄລຍະ 
ຕອນທ້າຍ ຂໍຮຽກຮ້ອງມາຍັງເອື້ອຍນ້ອງແມ່ຍິງທຸກຄົນ ເວົ້າລວມ, ເວົ້າສະເພາະ ແມ່ນແມ່ຍິງໃນຂະແໜງອຸດສາຫະກຳ ແລະ ການຄ້າ ໃຫ້ສືບຕໍ່ຕັ້ງໜ້າເສີມຂະຫຍາຍຄວາມຮູ້ຄວາມສາມາດຂອງຕົນ ໃຫ້ສັງຄົມເຫັນໄດ້ສັກກະຍະພາບຂອງແມ່ຍິງ ຮັກສາໄວ້ດ້ານຄຸນສົມບັດຂອງຄວາມເປັນຜູ້ຍິງ ກໍຄືຄວາມລະອຽດອ່ອນ, ຄວາມອ່ອນໂຍນ, ຄວາມໂອບເອື້ອອາລີ ແລະ ຮູ້ຈັກປະສົມປະສານລະຫວ່າງ ຄວາມອ່ອນໂຍນ, ຄວາມອົດທົນ ແລະ ຄວາມເຂັ້ມແຂງ ໃຫ້ສາມາດພັດທະນາຕົນເອງ ໃຫ້ກາຍເປັນແມ່ຍິງທີ່ມີຄວາມສາມາດ ແລະ ກ້າວໜ້າຕາມຍຸກສະໄໝ ເພື່ອສ້າງບົດບາດໃໝ່ທີ່ມີຄວາມສຳຄັນໃຫ້ກັບສັງຄົມເປັນກ້າວໆ.
ຂ່າວ ແລະ ພາບ: ທ ໄພວັນ ໂຄດວັນທາ ສູນສະຖິຕິ ແລະ ຂໍ້ມູນຂ່າວສານ ອຄ
