ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມສະຫຼຸບ-ຖອດຖອນບົດຮຽນການຈັດຕັ້ງປະຕິ ບັດວຽກງານກວດກາການຄ້າ ໃນໄລຍະ ປີ 2022 ຜ່ານມາ ແລະ ທິດທາງແຜນການ ປີ 2023. ຂື້ນໃນວັນທີ 5 ເມສາ 2023, ທີ່ກະຊວງ ອຄ ໂດຍການເປັນປະທານ ຂອງທ່ານ ມະໄລທອງ ກົມມະສິດ ລັດຖະມົນ ຕີ ກະຊວງອຸດສາຫະກໍາ ແລະ ການຄ້າ, ກອງປະຊຸມຄັ້ງນີ້ ມີທ່ານ ບຸນເຖິງ ດວງສະຫວັນ ຮອງລັດຖະມົນຕີ, ຜູ້ຊີ້ນໍາກົມການຄ້າພາຍໃນ, ມີບັນດາທ່ານຫົວໜ້າກົມ/ຮອງຫົວໜ້າກົມ ແລະ ຫົວໜ້າ/ຮອງຫົວໜ້າສະຖາບັນ, ມີພະແນກອຸດສາຫະກຳ ແລະ ການຄ້າແຂວງ, ນະຄອນຫຼວງ ໃນຂອບເຂດທົ່ວປະເທດ, ມີຕາງໜ້າຂະແໜງການທີ່ກ່ຽວຂ້ອງຄື ກະຊວງການເງິນ, ກະຊວງສາທາລະນະສຸກ, ກະຊວງກະສິກຳ ແລະ ປ່າໄມ້ ແລະ ກະຊວງປ້ອງກັນຄວາມສະຫງົບ ພ້ອມທັງພະນັກງານພາຍໃນກົມການຄ້າພາຍໃນ ກະຊວງ ອຄ ລວມທັງໝົດ 110 ທ່ານ
ກອງປະຊຸມໄດ້ຟັງສະຫຼຸບລາຍງານຜົນການຈັດຕັ້ງປະຕິບັດວຽກງານກວດກາການຄ້າ ຂອງຂະແໜງ ອຸດສາຫະກຳ ແລະ ການຄ້າ ໃນຂອບເຂດທົ່ວປະເທດ, ຜ່ານມາອົງການປະຕິບັດວຽກງານກວດກາການຄ້າ ໄດ້ເຄື່ອນໄຫວຕິດຕາມກວດກາຕາມພາລະບົດບາດ ແລະ ສິດໜ້າທີ່ ໃນໄລຍະ 01 ປີ ໃນຂອບເຂດທົ່ວປະເທດ ລວມທັງສູນກາງ ຊຶ່ງສາມາດກວດກາໄດ້ການລະເມີດລະບຽບການຄຸ້ມຄອງການຄ້າ, ການຄ້າສິນຄ້ານອກລະບົບ ແລະ ການດຳເນີນທຸລະກິດທີ່ບໍ່ມີທະບຽນວິສາຫະກິດໄດ້ທັງໝົດ 859 ກໍລະນີ, ໃນນັ້ນແກ້ໄຂແລ້ວ 855 ກໍລະນີ, ຍັງຄ້າງ 04 ກໍລະນີ, ຄິດເປັນມູນຄ່າລວມທັງໝົດ: 4,188,182,550 ກີບ, ໄດ້ຍຶດ ແລະ ນຳສິນຄ້າໝົດອາຍຸ, ລອກຮຽນແບບ, ບໍ່ມີຄຸນນະພາບ, ຢາສູບເຖື່ອນ ໄປທໍາລາຍຖິ້ມມີມູນຄ່າ 3,953,212,950 ກີບ, ພ້ອມທັງປັບໃໝຜູ້ລະເມີດຕາມກົດໝາຍ ແລະ ລະບຽບການ
ນອກນັ້ນຍັງໄດ້ສືບຕໍ່ປະສານສົມທົບກັບ ຂະແໜງການທີ່ກ່ຽວຂ້ອງ ເພື່ອສະກັດກັ້ນການຄ້າຂາຍນອກລະບົບ ຊຶ່ງສາມາດກັກ, ຢຶດ ບາງປະເພດສິນຄ້າອຸປະໂພກ ແລະ ບໍລິໂພກ ໄດ້ຈຳນວນໜຶ່ງ ເປັນຕົ້ນແມ່ນ ສິນຄ້າປະເພດບໍລິໂພກທີ່ໝົດອາຍຸ, ສິນຄ້າອຸປະໂພກທີ່ເຊື່ອມຄຸນນະພາບໝົດອາຍຸການນຳໃຊ້ ແລະ ສິນຄ້າປອມແປງໄດ້ຫລາຍລາຍການ ຊຶ່ງທັງໝົດນັ້ນແມ່ນໄດ້ໃຊ້ມາດຕະການຕໍ່ຜູ້ລະເມີດຕາມລະບຽບ ແລະ ກົດໝາຍ
ທີ່ປະຊຸມຍັງໄດ້ປະກອບຄຳເຫັນຢ່າງກົງໄປ ກົງມາຕໍ່ວຽກງານກວດກາການຄ້າ ແລະ ທີ່ປະຊຸມຍັງໄດ້ສະເໜີຍົກ ດໍາລັດ ເລກທີ 508/ນຍ ຂື້ນເປັນກົດໝາຍໃນອານາຄົດ ເພື່ອເປັນບ່ອນອີງໃຫ້ແກ່ວຽກງານກວດກາການຄ້າ ແລະ ທັງເປັນການຖອດຖອນບົດຮຽນໃຫ້ກັນ ແລະ ນຳໄປຈັດຕັ້ງປະຕິບັດໃນຕໍ່ໜ້າ
ໃນຕອນທ້າຍ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ ໄດ້ໃຫ້ການໂອ້ລົມ ແລະ ມີທິດຊີ້ນຳ ເນັ້ນບາງບັນຫາ ເຊັ່ນ: 1). ໃຫ້ອົງການປະຕິບັດວຽກງານກວດກາການຄ້າ ທັງສູນກາງ ແລະ ທ້ອງຖິ່ນ ເອົາໃຈໃສ່ໃນການຕິດຕາມກວດກາ ຕ້ານ, ສະກັດກັ້ນ ການຄ້າສິນຄ້ານອກລະບົບ, ການຄ້າສິນຄ້າປອມແປງ, ສິນຄ້າຮຽນແບບ, ສິນຄ້າເຊື່ອມຄຸນ, ເສຍຄຸນ, ການດຳເນີນທຸລະກິດທີ່ບໍ່ມີອະນຸຍາດ ຫຼື ບໍ່ຖືກກັບວັດຖຸປະສົງ ຕາມພາລະບົດບາດຂອງຕົນຢ່າງເຂັ້ມງວດ; 2). ໃຫ້ເອົາໃຈໃສ່ຈັດຕັ້ງປະຕິບັດວຽກງານກວດກາການຄ້າ ຕາມສິດ ແລະ ໜ້າທີ່ຂອງຕົນທີ່ໄດ້ກຳນົດໄວ້ໃນ ມາດຕາ 24, 25 ຂອງດຳລັດວ່າດ້ວຍກາກວດກາການຄ້າ ສະບັບເລກທີ 508/ລບ, ລົງວັນທີ 4 ທັນວາ 2021 ແລະ ມາດຕາ 5, 6 ,7 ແລະ ມາດຕາ 13, 15 ຂອງຂໍ້ຕົກລົງ ວ່າດ້ວຍການປະຕິບັດວຽກງານກວດກາການຄ້າ ເລກທີ 1499/ອຄ.ກຄພນ, ລົງວັນທີ 08 ກັນຍາ 2017; 3). ໃຫ້ເອົາໃຈໃສ່ຂອດປະສານກັບຂະແໜງ ການທີ່ກ່ຽວຂ້ອງໃຫ້ມີຄວາມກົມກຽວ ແລະ ມີຄວາມເປັນເອກະພາບສູງໃນການຮ່ວມມືກັນໃນການຈັດຕັ້ງປະຕິບັດໃຫ້ໄດ້ຮັບປະສິດທິພາບສູງ; ແລະ 4). ໃຫ້ໝູນໃຊ້ປະສົບການ ແລະ ບົດຮຽນຕົວຈິງ ເພື່ອປັບປຸງເຂົ້າກັບສະພາບຕົວຈິງຂອງບ້ານເຮົາ ຢ່າງມີຫົວຄິດປະດິດສ້າງ ແລະ ແທດເໜາະເປົ້າໝາຍກໍເພື່ອເຮັດໃຫ້ວຽກງານກວດກາການຄ້າ ແລະ ປົກປ້ອງຜູ້ຊົມໃຊ້ໃຫ້ມີຄວາມກ້າວໜ້າຂຶ້ນໄປເລື້ອຍໆ ທັງເປັນການປະກອບສ່ວນຢ່າງຕັ້ງໜ້າເຂົ້າໃນການເຄື່ອນໄຫວ ຕ້ານ ແລະ ສະກັດກັ້ນການລະເມີດລະບຽບກົດໝາຍ ທາງດ້ານການຄ້າ, ການຄ້າສິນຄ້ານອກລະບົບ, ເພື່ອຊ່ວຍໜູນ ຫັນໃຫ້ຜູ້ດຳເນີນທຸລະກິດຫັນເຂົ້າສູ່ກົດ ໝາຍ ແລະ ລະບຽບການ.
ຂ່າວ-ພາບ: ທ ໄພວັນ ໂຄດວັນທາ ສູນສະຖິຕິ ແລະ ຂໍ້ມູນຂ່າວສານ, ອຄ
