ໃນຕອນເຊົ້າເວລາ 10:00 ໂມງ ຂອງວັນທີ 17 ພຶດສະພາ 2023 ທີ່ຫ້ອງຮັບແຂກໃຫຍ່ຊັ້ນ 04 ກະຊວງອຸດສາຫະກໍາ ແລະ ການຄ້າ, ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ XIEKUN, ປະທານສະມາຄົມເສດຖະກິດ ແລະ ວັດທະນະທໍາ ຈີນ-ອາຊຽນ ແລະ ທ່ານ ປອ ນາງ ແຂວະລີ ວົງສຸທິ, ປະທານສະມາຄົມເສດຖະກິດ ແລະ ວັດທະນະທໍາ ລາວ-ຈີນ ພ້ອມຄະນະ; ມີຮອງຫົວໜ້າຫ້ອງການ, ຮອງຫົວໜ້າກົມ, ຫົວໜ້າ-ຮອງພະແນກ ອ້ອມຂ້າງກະຊວງທີ່ກ່ຽວຂ້ອງ ເຂົ້າຮ່ວມທັງສອງຝ່າຍ 12 ທ່ານ.
ໂອກາດນີ້ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ສະແດງຄວາມຍ້ອງຍໍຊົມເຊີຍຕໍ່ ທ່ານ XIEKUN, ປະທານສະມາຄົມເສດຖະກິດ ແລະ ວັດທະນະທໍາ ຈີນ-ອາຊຽນ ໃນການຊຸກຍູ້ ແລະ ສົ່ງເສີມການຄ້າ-ການລົງທຶນ, ການຄ້າຊາຍແດນ ລາວ-ຈີນ, ການພັດທະນານິຄົມອຸດສາຫະກຳ ລຽບຕາມແລວທາງລົດໄຟ ລາວ-ຈີນ, ການອຳນວຍຄວາມສະດວກໃນການຂົນສົ່ງສິນຄ້າ ຜ່ານທາງລົດໄຟ ລາວ-ຈີນ ຕໍ່ໃສ່ບັນດາປະເທດ ເອີຣົບ; ການຊຸກຍູ້ໃນການພັດທະນາສິນຄ້າກະສິກຳ ເພື່ອນຳໃຊ້ພາຍໃນ ແລະ ການສົ່ງອອກຕ່າງປະເທດ ໂດຍສະເພາະຈີນ; ວຽກງານການສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ໃນການສ້າງຄວາມເຂັ້ມແຂງດ້ານຜະລິດຕະພາບ ແລະ ມີຄຸນນະພາບ; ວຽກງານສົ່ງເສີມການຄ້າ, ວຽກງານວາງສະແດງສິນຄ້າ ແລະ ການສົ່ງເສີມການລົງທຶນ ແລະ ການຜະລິດ ທີ່ຕິດພັນກັບນິຄົມອຸດສາຫະກຳ; ການຊ່ວຍເຫລືອເພື່ອພັດທະນາ ແລະ ຍົກລະດັບດ້ານວິຊາການ ຜ່ານການຝຶກອົບຮົມ ເປັນຕົ້ນ ການຜະລິດສິນຄ້າອຸດສາຫະກຳທີ່ ປຸງແຕ່ງຈາກກະສິກຳ, ການເພີ່ມມູນຄ່າ ແລະ ການພັດທະນາອຸດສາຫະກຳສະອາດ, ອຸດສາຫະກຳນິເວດ ແລະ ຄວາມປອດໄພໃນອຸດສາຫະກຳຜະລິດອາຫານ.
ຕອນທ້າຍ ທ່ານ XIEKUN, ປະທານສະມາຄົມເສດຖະກິດ ແລະ ວັດທະນະທໍາ ຈີນ-ອາຊຽນ ທ່ານ ນາງ ແຂວະລີ ວົງສຸທິ, ປະທານສະມາຄົມເສດຖະກິດ ແລະ ວັດທະນາທຳ ລາວ-ຈີນ ຖືເອົາໂອກາດພົບປະຄັ້ງນີ້ ສະແດງຄວາມຂອບໃຈຕໍ່ ທ່ານ ລັດຖະມົນຕີ ທີ່ໄດ້ໃຫ້ການຕ້ອນຮັບ ແລະ ໃຫ້ການຮ່ວມມື ລະຫວ່າງ ສປປ ລາວ – ສປ ຈີນ ແລະ ຈີນ-ອາຊຽນ ທີ່ເອື້ອອຳນວຍຄວາມສະດວກໃນວຽກງານຫຼາຍດ້ານ ຊຶ່ງເຮັດໃຫ້ເກີດຜົນປະໂຫຍດສູງສຸດແກ່ ສອງປະເທດ.
ພາບ-ຂ່າວ: ໄພຄໍາອີ ກົມແຜນການ ແລະ ການຮ່ວມ, ກະຊວງ ອຄ.
