ໃນວັນທີ 16 ພຶດສະພາ 2023 ຜ່ານມາ, ທ່ານ ປອ. ມະໂນທອງ ວົງໄຊ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ນໍາພາຄະນະຜູ້ແທນຈາກ ສປປ ລາວ, ຈາກບັນດາອະນຸກໍາມະການຮັບຜິດຊອບວຽກງານກະກຽມເປັນປະທານອາຊຽນຂອງ ສປປ ລາວ ປີ 2024 ເຂົ້າຮ່ວມກອງປະຊຸມຖອດຖອນບົດຮຽນ ກ່ຽວກັບການກະກຽມເປັນເຈົ້າພາບ ແລະ ເປັນປະທານອາຊຽນ ຂອງ ສປປ ລາວ ທີ່ກະຊວງອຸດສາຫະກໍາ ແລະ ການຄ້າ ສສ ຫວຽດນາມ

ທ່ານຮອງລັດຖະມົນຕີກະຊວງອຸດສາຫະກໍາ ແລະ ການຄ້າ ໄດ້ໃຫ້ຮູ້ວ່າ ກະຊວງອຸດສາຫະກໍາ ແລະ ການຄ້າ ໃນນາມຮັບຜິດຊອບວຽກງານການເຊື່ອມໂຍງເສດຖະກິດອາຊຽນຂອງ ສປປ ລາວ ປັດຈຸບັນ, ພວມຂຸ້ນຂ້ຽວໃສ່ການກະກຽມທຸກດ້ານໃນການດໍາເນີນເປັນເຈົ້າພາບ ແລະ ເປັນປະທານອາຊຽນ ທີ່ຄິດພັນກັບເສົາຄໍ້າປະຊາຄົມເສດຖະກິດອາຊຽນ ໃນປີ 2024 ຈະມາເຖິງນີ້ ສະນັ້ນ, ຈຶ່ງໄດ້ມາຖອດຖອນບົດຮຽນ ແລະ ປະສົບການໃນການເປັນປະທານອາຊຽນຂອງ ສສ. ຫວຽດນາມ ຜ່ານມາ

ເຊິ່ງຄະນະຜູ້ແທນຈາກ ສປປ ລາວ ກໍໄດ້ບົດຮຽນສໍາຄັນຫລາຍດ້ານ ຈາກ ສສ ຫວຽດນາມ ໂດຍສະເພາະແມ່ນດ້ານເນື້ອໃນ, ດ້ານພິທີການ ແລະ ສະຖານທີ່, ດ້ານງົບປະມານ ແລະ ຂົນຂວາຍ, ດ້ານຂ່າວສານ ແລະ ປະຊາສໍາພັນ, ຊຶ່ງຈະໄດ້ນໍາມາຜັນຂະຫຍາຍການຈັດຕັ້ງປະຕິບັດ ໃນການກະກຽມເປັນເຈົ້າພາບອາຊຽນຂອງ ສປປ ລາວໃນປີ 2024ໃຫ້ປະສົບຜົນສໍາເລັດອັນຈົບງາມ ໃນຕໍ່ໜ້າຄືກັນກັບ ສສ ຫວຽດນາມ

ໃນໂອກາດນີ້້, ທັງສອງຝ່າຍກໍໄດ້ຖືໂອກາດປຶກສາຫາລື ແລກປ່ຽນບົດຮຽນກ່ຽວກັບຄວາມຄືບໜ້າ ແລະ ເປັນໄປໄດ້ໃນການລົງນາມໃນສັນຍາການຄ້າສອງຝ່າຍ ທີ່ທັງສອງຝ່າຍໄດ້ຕົກລົງຈະປັບສັນຍາການຄ້າສອງຝ່າຍ ສະບັບປີ 2015, ຊຶ່ງການປັບປຸງໄດ້ເລີ່ມແຕ່ປີ 2020 ມາຮອກປັດຈຸບັນທັງສອງຝ່າຍໄດ້ຕົກລົງເຫັນດີ ແລະ ພ້ອມທີ່ຈະດໍາເນີນຂັ້ນຕອນພາຍໃນປະເທດ  ເພື່ອຂໍສິດລົງນາມ ແລະ ຄາດວ່າການລົງນາມຈະເກີດຂື້ນໃນລະຫວ່າງເດືອນ 6-7 ປີ 2023, ໃນໂອກາດຂອງການພົບປະຂອງການນໍາຂັ້ນສູງລະດັບປະເທດ ຊຶ່ງເລຂາທິການໃຫຍ່ ຂອງ ສສ ຫວຽດນາມ ຈເດີນທາງມາຢ້ຽມຢາມ ສປປ ລາວ ໃນໄລຍະດັ່ງກ່າວ.

ນອກຈາກນີ້, ກອງປະຊຸມຍັງໄດ້ປຶກສາຫາລືຮ່ວມກັນ ກ່ຽວກັບການຍົກລະດັບມູນຄ່າການຄ້າສອງຝ່າຍ ໃຫ້ເພີ່ມຂື້ນ 10% ໃນແຕ່ລະປີ ຊຶ່ງ ສປປ ລາວ ໄດ້ສະເໜີໃຫ້ມີການພົບປະ ແລະ ເຮັດວຽກນໍາບັນດາກົມທີ່ກ່ຽວຂ້ອງ ຂອງຂະແໜງອຸດສາຫະກໍາ ແລະ ການຄ້າ ທັງສອງຝ່າຍ ເພື່ອຮ່ວມກັນປຶກສາຫາລື ກ່ຽວກັບການຊຸກຍູ້ໃຫ້ມີການເພີ່ມມູນຄ່າທາງການຄ້າ ລາວ-ຫວຽດນາມ ຕາມຄາດໝາຍທີ່ໄດ້ວາງໄວ້ດັ່ງກ່າວ

ແຫຼ່ງຂໍ້ມູນ: ກົມນະໂຍບາຍການຄ້າຕ່າງປະເທດ

ຮຽບຮຽງ: ທ ໄພວັນ ໂຄດວັນທາ ສູນສະຖິຕິ ແລະ ຂໍ້ມູນຂ່າວສານ, ອຄ