ໃນວັນທີ 19 ພຶດສະພາ 2023, ທີ່ຫ້ອງປະຊຸມທາງໄກ ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມປຶກສາຫາລື ວຽກງານໂຄສະນາປະຊາສຳພັນ ຂະແໜງອຸດສາຫະກຳ ແລະ ການຄ້າ ທົ່ວປະເທດ ໂດຍການເປັນຂອງທ່ານ ປອ ມະໂນທອງ ວົງໄຊ  ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ, ທັງເປັນຫົວໜ້າຄະນະໂຄສະນາປະຊາສໍາພັນ ຂອງຂະແໜງ ອຄ, ຂັ້ນສູນກາງມີບັນດາທ່ານຄະນະກົມ, ຄະນະພະແນກ ພາຍໃນກະຊວງ ອຄ ແລະ ຂັ້ນທ້ອງຖິ່ນ ມີຄະນະພະແນກອຸດສາຫະກໍາ ແລະ ການຄ້າ ແຂວງ, ນະຄອນຫຼວງ ພ້ອມດ້ວຍຄະນະເຂົ້າຮ່ວມ

ທ່ານປະທານກອງປະຊຸມໄດ້ໃຫ້ຮູ້ວ່າ: ເພື່ອເປັນການຜັນຂະຫຍາຍເນື້ອໃນຈິດໃຈຂອງຂໍ້ຕົກລົງ ສະບັບເລກທີ 0425/ອຄ, ລົງວັນທີ 30 ມີນາ 2023 ວ່າດ້ວຍການແຕ່ງຕັ້ງຄະນະໂຄສະນາປະຊາສຳພັນ ຂະແໜງອຸດສາຫະກຳ ແລະ ການຄ້າ, ເພື່ອເປັນການປັບປຸງວຽກງານຂ່າວສານໃຫ້ກວ້າງຂວາງຂຶ້ນ, ພ້ອມທັງປັບປຸງທາງດ້ານຮູບແບບ, ວິທີການ ແລະ ກົນໄກໂຄສະນາປະຊາສໍາພັນ ເພື່ອແນໃສ່ເຜີຍແຜ່ຂໍ້ມູນຂ່າວສານໃຫ້ສັງຄົມໄດ້ຮັບຮູ້ທົ່ວເຖິງ, ວ່ອງໄວ ແລະ ທັນກັບສະພາບການ

ວຽກງານອຸດສາຫະກໍາ ແລະ ການຄ້າ ເປັນວຽກງານທີ່ມີຄວາມຕິດພັນຢ່າງແໜ້ນແຟ້ນຕໍ່ກັບການເຄື່ອນ ໄຫວການດໍາລົງຊີວິດຢູ່ໃນສັງຄົມ, ບັນດານັກທຸລະກິດ, ຜູ້ຜະລິດ, ຜູ້ປະກອບການ, ພໍ່ຄ້າຊາວຂາຍ, ຜູ້ອຸປະພັກ ແລະ ບໍລິໂພກ ຕະຫຼອດຮອດປະຊາຊົນ ກໍ່ຕ້ອງມີຄວາມຕ້ອງການສູງດ້ານການບໍລິໂພກຂໍ້ມູນຂ່າວສານ ກ໋ຽວກັບວຽກງານອຸດສາຫະກໍາ ແລະ ການຄ້າ. ກໍໄດ້ເອົາໃຈໃສ່ການລົງຂ່າວ ໂຄສະນາປະຊາສຳພັນໃຫ້ສັງຄົມຮັບຊາບ ອັນທີ່ເປັນປະເດັນເຄັ່ງຮ້ອນ ໃຫ້ມີການປະຊາສຳພັນ ເພື່ອສື່ໃຫ້ສັງຄົມມີຄວາມເຂົ້າໃຈຕໍ່ປະເດັນທີ່ຕິດພັນຂະແໜງອຸດສາຫະກຳ ແລະ ການຄ້າ ທີ່ເປັນຫົວຂໍ້ສຳຄັນທີ່ຈະນຳໄປເຜີຍແຜ່ໃຫ້ສັງຄົມຮັບຊາບ. ໂດຍສະເພາະໃນຍຸກປະຈຸບັນ ເປັນຍຸກເຕັກໂນໂລຊີມີການພັດທະນາແບບກ້າວກະໂດດ, ຂ່າວສານ ປະຊາສໍາພັນຈະຕ້ອງໄດ້ພັດທະນາໃຫ້ກວ້າງຂວາງຂຶ້ນ, ດ້ວຍຫຼາຍຮູບແບບ, ຫຼາຍວິທີການ ແລະ ວ່ອງໄວທັນກັບເຫດການ ໂດຍສະເພາະແມ່ນການໂຄສະນາປະຊາສໍາພັນ ໂດຍຜ່ານຫຼາຍຊ່ອງທາງ ເປັນຕົ້ນແມ່ນການໂຄສະນາປະຊາສໍາພັນຜ່ານທາງສື່ພິມ ແລະ ທາງອອນລາຍ

ທ່ານໃຫ້ຮູ້ຕຶ່ມອິກວ່າ ປະຈຸບັນເຫັນວ່າວຽກງານການໂຄສະນາ ແລະ ປະຊາສໍາພັນ ຂອງຂະແໜງອຸດສາຫະກໍາ ແລະ ການຄ້າ ແມ່ນຍັງບໍ່ທັນໄດ້ພັດທະນາຢ່າງເຕັມເມັດເຕັມໜ່ວຍ, ບໍ່ທັນສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຂອງສັງຄົມ ແຕ່ເຖິງຢ່າງໃດກໍ່ຕາມ ເພື່ອຮັບປະກັນໃຫ້ວຽກງານໂຄສະນາປະຊາສຳພັນ ເປັນເສນາທິການໃຫ້ແກ່ຄະນະນໍາກະຊວງ, ເຮັດໃຫ້ວຽກງານໂຄສະນາ ປະຊາສຳພັນ ສືບຕໍ່ຂະຫຍາຍຕົວ ແລະ ໄດ້ຮັບການປັບປຸງດີຂຶ້ນກວ່າເກົ່າທາງດ້ານປະລິມານ ແລະ ຄຸນນະພາບ, ປະກອບສ່ວນ ຢ່າງຕັ້ງໜ້າເຂົ້າໃນການພັດທະນາວຽກງານຂະແໜງອຸດສາຫະກຳ ແລະ ການຄ້າ ກໍຄື ການພັດທະນາ ເສດຖະກິດ-ສັງຄົມ ຂອງປະເທດເຮົາໃຫ້ມີຄວາມເຂັ້ມແຂງ ຂື້ນຢ່າງຕໍ່ເນືີ່ອງ ຈະຕ້ອງໄດ້ປັບປຸງ ວຽກງານຂ່າວສານ ແລະ ແຕ່ງຕັ້ງຄະນະໂຄສະນາປະຊາສຳພັນ ພ້ອມທັງກຳນົດພາລະບົດບາດການເຄື່ອນໄຫວ ຂອງຄະນະ ເພື່ອເພີ່ມທະວີໃນການອອກຂ່າວ ແລະ ໂຄສະນາເຜີຍແຜ່ຂໍມູນຕ່າງໆ ໃຫ້ທັນສະພາບການ ພ້ອມທັງແນ່ໃສ່ການສ້າງຄວາມເຂັ້ມແຂງດ້ານວຽກງານຂ່າວສານ ຂະແໜງອຸດສາຫະກໍາ ແລະ ການຄ້າ ໃຫ້ທັນກັບຍຸກສະໄໝ ແລະ ເພື່ອສ້າງໃຫ້ເປັນການລວມສູນຂອງວຽກງານຂ່າວສານ ຂະແໜງອຸດສາຫະກໍາ ແລະ ການຄ້າ ອອກສູ່ສັງຄົມໃຫ້ຫລາຍຂື້ນ ແລະ ຢ່າງທົ່ວເຖິງ

ຂ່າວ-ພາບ: ທ ໄພວັນ ໂຄດວັນທາ ສູນສະຖິຕິ ແລະ ຂໍ້ມູນຂ່າວສານ, ອຄ