ວັນທີ 2 ມິຖຸນາ 2023 ຜ່ານມາ, ກະຊວງອຸດສາຫະກໍາ ແລະ ການຄ້າ (ອຄ) ໄດ້ຈັດຈັດຕັ້ງປາຖະກະຖາ ວັນຜ່າວົງປິດລ້ອມຂອງກອງພັນທີ 2 ວິລະຊົນ ທີ່ທົ່ງໄຫຫີນ ຊຽງຂວາງ ຄົບຮອບ 64 ປີ ແລະ ວິລະກຳໂຕນຄຸກຂອງບັນດາຜູ້ນຳຂອງພັກ ແລະ ແນວລາວຮັກຊາດ ຄົບຮອບ 63 ປີ ໂດຍການໃຫ້ກຽດເປັນປະທນ ຂອງ ທ່ານ ນາງ ຈັນສຸກ ແສງພະຈັນ ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ ມີບັນດາທ່ານ, ບັນດາສະຫາຍ ຄະນະປະຈຳພັກກະຊວງ,​ ເລຂາໜວຍພັກ-ຄະນະໜ່ວຍພັກ, ຄະນະຫ້ອງການ, ຫົວໜ້າກົມ-ຄະນະກົມ, ສະຖາບັນ, ຕາງໜ້າ 3 ອົງການຈັດຕັ້ງມະຫາຊົນ ຂອງກະຊວງ ແລະ ສະມາຊິກພັກ ເຂົ້າຮ່ວມ.

ຈຸດປະສົງເພື່ອເປັນການສຶກສາອົບຮົມໃຫ້ແກ່ ພະນັກງານ, ສະມາຊິກພັກ ​ທົ່ວອົງຄະນະພັກກະຊວງອຸດສາຫະກໍາ ແລະ ການຄ້າ ໄດ້ລະນຶກຫວນຄືນມູນເຊື້ອອັນພິລະອາດຫານ, ຄວາມສາມັກຄີອັນແໜ້ນແຟ້ນ ແລະ ການນໍາພາອັນສະຫຼາດສ່ອງໃສຂອງບັນດາຜູ້ນໍາການປະຕິວັດລາວ, ມີຄວາມຮັບຮູ້, ເຂົ້າໃຈ ແລະ ມີຄວາມເອກອ້າງທະນົງໃຈຕໍ່ມູນເຊື້ອປະຫວັດສາດ, ຜົນງານການສ້າງສາພັດທະນາປະເທດຊາດ ກໍຄືຜົນງານ ແລະ ຄຸນງາມຄວາມດີ ອັນໃຫຍ່ຫຼວງຂອງບັນດາຜູ້ນໍາປະຕິວັດ, ເສີມຂະຫຍາຍມູນເຊື້ອແຫ່ງຄວາມສາມັກຄີເປັນປຶກແຜ່ນແໜ້ນໜາຂອງບັນດາຊົນເຜົ່າ, ຊັ້ນຄົນ, ເພດ,​ໄວ ໄດ້ຮໍ່າຮຽນເອົາຄຸນສົມບັດສິນທຳປະຕິວັດ, ຄຸນງາມຄວາມດີ ແລະ ການອຸທິດສະຕິປັນຍາອັນໃຫຍ່ຫຼວງຂອງພະນັກງານປະຕິວັດອາວຸໂສ ທີ່ໄດ້ບຸກເບິີກເສັ້ນທາງການປະຕິວັດໃນເມື່ອກ່ອນທີ່ມີນໍ້າໃຈບຸກບືນຫ້າວຫັນປະຕິບັດວຽກງານພາຍໃຕ້ການນຳພາຂອງພັກ​ ແລະ ຜົນສຳ​ເລັດ​ຂອງ​ວຽກ​ງານ​ຕ່າງໆ ທີ່​ປະ​ເທດ​ຊາດ​ຍາດ​ມາ​ໄດ້​ແຕ່​ອະ​ດິດ​ເຖິງປັດຈຸ​ບັນ ​ໃຫ້​ເຕັມ​ໄປ​ດ້ວຍ​ຄວາມ​ໝາຍ ​ແລະ ​ເນື້ອ​ໃນ​ເລິກ​ເຊິ່ງ.

ປະທານໄດ້ກ່າວຕື່ມວ່າ: ​ທ່າມກາງ​ບັນຍາກາດ​ທີ່​ທົ່ວ​ພັກ, ທົ່ວ​ລັດ ​ແລະ ທົ່ວ​ປວງ​ຊົນ​ລາວ ທັງຊາດ ພວມ​ຈັດຕັ້ງຜັນ​ຂະຫຍາຍ​ມະຕິກອງ​ປະຊຸມ​ໃຫຍ່ ຄັ້ງທີ XI ຂອງ​ພັກ ແລະ ການຈັດຕັ້ງຜັນຂະຫຍາຍແຜນພັດທະນາເສດຖະກິດສັງຄົມ 5 ປີ ຄັ້ງທີ IX ເຂົ້າສູ່ທຸກວຽກງານຂອງຂະແໜງການຕົນຢ່າງ​ເປັນ​ຂະ​ບວນຟົດ​ຟື້ນ ເວົ້າລວມ, ເວົ້າສະເພາະແມ່ນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງອຸດສາຫະກໍາ ແລະ ການຄ້າ ແລະ ແຜນພັດທະນາອຸດສາຫະກໍາປຸງແຕ່ງ ແລະ ການຄ້າ 5 ປີ ( 2021-2025 ) ຂອງຂະແໜງອຸດສາຫະກໍາ ແລະ ການຄ້າ ເຂົ້າສູ່ການຈັດຕັ້ງປະຕິບັດແຕ່ລະໜ້າວຽກ, ແຕ່ລະໂຄງການຂອງຂະແໜງການ ໃຫ້ໄດ້ຮັບຜົນສໍາເລັດຕາມລະດັບຄາດໝາຍທີ່ວາງໄວ້, ພິເສດພວກເຮົາພວມກະກຽມເປີດກອງປະຊຸມຄົບຄະນະກາງສະໄໝຂອງຄະນະບໍລິຫານງານພັກກະຊວງ ສະໄໝທີ V ແລະ ກາງສະໄໝຂອງບັນດາໜ່ວຍພັກທົ່ວອົງຄະນະພັກກະຊວງ ໃນມໍ່ໆນີ້

ໂດຍປະຕິ​ບັດ​ຕາມ​ແຈ້ງ​ການ​​ຂອງ​ຄະນະ​ໂຄສະນາ​ອົບຮົມ​ສູ​ນກາງ​ພັກ ​ແລະ ການ​ຕົກລົງ​ເຫັນ​ດີຂອງ​ລັດຖະມົນຕີ​ກະຊວງ ອຄ ວ່າ​ດ້ວຍ​ການ​ອະນຸມັດ​ໃຫ້​ຈັດ​ຕັ້ງພິທີ​ປາຖະກະຖາ​ວັນ​ທີ່​ສຳຄັນ​ຕ່າງໆ ຂອງພັກ ແລະ ຂອງ​ຊາດ, ກະຊວງອຸດສາຫະກຳ ແລະ ການຄ້າ ຈຶ່ງໄດ້ຈັດຕັ້ງພິທີປາຖະກະຖາ 2 ວັນປະຫວັດສາດ ສຳຄັນຂອງ​ພັກ, ຂອງ​ຊາດ ຂຶ້ນຢ່າງເປັນທາງການ ​ຄື: 1) ວັນຜ່າວົງປິດລ້ອມ ຂອງກອງພັນທີ 2 ວິລະຊົນທີ່ທົ່ງໄຫຫີນ ຊຽງຂວາງ ຄົບຮອບ 64 ປີ (18 ພຶດສະພາ 1959–18 ພຶດສະພາ 2023) ແລະ 2) ວິລະກໍາໂຕນຄຸກຢ່າງມະຫັດສະຈັນຂອງບັນດາຜູ້ນໍາຂອງພັກ ແລະ ແນວລາວຮັກຊາດ ຄົບຮອບ 63 ປີ (24 ພຶດສະພາ 1960-24 ພຶດສະພາ 2023)

ຂ່າວ: ໄພວັນ ສູນສະຖິຕິ ແລະ ຂໍ້ມູນຂ່າວສານ, ອຄ

ພາບ: ໜັງສືພິມເສດຖະກິດການຄ້າ