ໃນວັນທີ 8 ມິຖຸນາ 2023, ທີ່ກະຊວອຸດສາຫະກໍາ ແລະ ການຄ້າ ໄດ້ຈັດກອງປະຊຸມເປີດກວ້າງຂັ້ນສູນກາງ ເພື່ອປະກອບຄໍາເຫັນ ຕໍ່ກັບ ຮ່າງກົດໝາຍ ວ່າດ້ວຍການຄຸ້ມຄອງລາຄາສິນຄ້າ ແລະ ຄ່າບໍລິການ ໂດຍການເປັນປະທານຂອງ ທ່ານ ບຸນເຖິງ ດວງສະຫວັນ ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ ມີບັນດາທ່ານ ຫົວໜ້າກົມ, ຮອງກົມ, ຫົວໜ້າພະແນກ, ຮອງພະແນກ, ວິຊາການຈາກບັນດາກະຊວງ ແລະ ຂະແໜງການທີ່ກ່ຽວຂ້ອງ ພ້ອມດ້ວຍບັນດາຜູ້ຕາງໜ້າຫົວໜ່ວຍທຸລະກິດ ເຂົ້າຮ່ວມ.

ໂອກາດນີ້ທ່ານປະທານໄດ້ກ່າວວ່າ: ກອງປະຊຸມເປີດກວ້າງຂັ້ນສູນກາງ ເພື່ອປະກອບຄຳເຫັນ ຕໍ່ກັບ ຮ່າງກົດ ໝາຍ ວ່າດ້ວຍການຄຸ້ມຄອງລາຄາສິນຄ້າ ແລະ ຄ່າບໍລິການ ໃນມື້ນີ້ ເປີດຂຶ້ນບົນພື້ນຖານແຜນການຄົ້ນຄວ້າສ້າງ ຮ່າງ ກົດໝາຍດັ່ງກ່າວ ໃຫ້ສຳເລັດພາຍໃນທ້າຍປີນີ້, ຄະນະດັ່ງກ່າວກໍດຳເນີນໄປຕາມຂັ້ນຕອນຂອງການສ້າງນິຕິກຳ ຕາມທີ່ໄດ້ກຳນົດໄວ້ໃນກົດໝາຍ ວ່າດ້ວຍການສ້າງນິຕິກຳ, ຊຶ່ງຕາມແຜນການສ້າງກົດໝາຍໃນເບື້ອງຕົ້ນ ແມ່ນຈະໃຫ້ສຳເລັດໃນທ້າຍ ປີ 2025, ປະຈຸບັນວຽກງານຄຸ້ມຄອງລາຄາສິນຄ້າ ແລະ ຄ່າບໍລິການ ແມ່ນເປັນວຽກທີ່ມີຄວາມສຳຄັນຫຼາຍ ແລະ ຕິດພັນກັບຫຼາຍຂະແໜງການແຕ່ສູນກາງລົງຮອດທ້ອງຖິ່ນ ຊຶ່ງເປັນວຽກງານທີ່ອ່ອນໄຫວ ທັງຕິດພັນຕໍ່ກັບຊີວິດການເປັນຢູ່ ຂອງພໍ່ແມ່ປະຊາຊົນບັນດາເຜົ່າ ໃນຂອບເຂດທົ່ວປະເທດ ຈິ່ງໄດ້ຍ້າຍມາໃສ່ກອງປະຊຸມສະໄໝສາມັນເທື່ອທີ VI ຂອງສະມາຊິກສະພາແຫ່ງຊາດ ຊຸດທີ 9 ໃຫ້ສຳເລັດໃນທ້າຍປີ 2023 ນີ້.

ຕອນທ້າຍທ່ານປະທານໃຫ້ຮູ້ຕື່ມວ່າ: ຜ່ານການຮັບຟັງ ການປະກອບຄຳເຫັນ ຕໍ່ກັບ ຮ່າງ ກົດໝາຍວ່າດ້ວຍການຄຸ້ມຄອງລາຄາສິນຄ້າ ແລະ ຄ່າບໍລິການ ພ້ອມທັງຮັບຟັງການສົນທະນາແລກປ່ຽນ ຄໍາເຫັນ ຈາກບັນດາທ່ານທີ່ເຂົ້າຮ່ວມໃນກອງປະຊຸມຄັ້ງນີ້ ແມ່ນເຫັນໄດ້ວ່າມີບັນຍາກາດທີ່ຟົດຟື້ນຫຼາຍ ແລະ ມີການປະກອບຄຳເຫັນຢ່າງກົງໄປກົງມາ ຊຶ່ງມີຄວາມໝາຍຄວາມສຳຄັນຫຼາຍ ຕໍ່ກັບຄະນະຮັບຜິດ ຊອບສ້າງຮ່າງກົດໝາຍດັ່ງກ່າວ ໄດ້ນຳເອົາໄປສືບຕໍ່ຄົ້ນຄວ້າປັບປຸງເນື້ອໃນ ຂອງຮ່າງກົດໝາຍດັ່ງກ່າວນີ້ ມີເນື້ອໃນທີ່ຮັດກຸມ, ກະທັດຮັດ, ຊັດເຈນ, ຖືກຕ້ອງ, ຄົບຖ້ວນ, ສອດຄ່ອງທາງດ້ານຫຼັກການ, ລະ ບຽບການ ແລະ ສະພາບຄວາມເປັນຈິງຂອງການພັດທະນາເສດຖະກິດ-ສັງຄົມ ເຮັດໃຫ້ການຄຸ້ມຄອງ ແລະ ການຈັດຕັ້ງປະຕິບັດວຽກງານຄຸ້ມຄອງລາຄາ ໄດ້ຮັບປະສິດທິ ພາບ ແລະ ມີປະສິດທິຜົນ.

ຂ່າວ-ພາບ: ທ ໄພວັນ ໂຄດວັນທາ ສູນສະຖິຕິ ແລະ ຂໍ້ມູນຂ່າວສານ