ໃນຕອນເຊົ້າເວລາ 8:30 ໂມງ ຂອງວັນທີ 22 ມິຖຸນາ 2023, ທີ່ຫ້ອງຮັບແຂກໃຫຍ່ ຊັ້ນ 04 ກະຊວງອຸດສາຫະກໍາແລະ ການຄ້າ, ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ນາງມໍລະກົດ ສີສະຫວັດ, ເອກອັກຄະຣາຊະທູດ ແຫ່ງ ຣາຊະອານາຈັກໄທ ປະຈໍາ ສປປ ລາວ ພ້ອມຄະນະ ໃນໂອກາດໄດ້ມາຮັບຕໍາແໜ່ງເອກອັກຄະຣາຊະທູດ ແຫ່ງຣາຊະອານາຈັກໄທ ປະຈໍາ ສປປ ລາວ (ຄົນໃໝ່); ເປັນກຽດເຂົ້າຮ່ວມມີບັນດາ ທ່ານຫົວໜ້າ-ຮອງຫົວໜ້າກົມ ແລະ ຫົວໜ້າ-ຮອງຫົວໜ້າພະແນກ ກ່ຽວຂ້ອງອ້ອມຂ້າງກະຊວງ ເຂົ້າຮ່ວມທັງສອງຝ່າຍ ປະມານ 10 ທ່ານ.

        ໂອກາດນີ້  ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ສະແດງຄວາມຍິນດີຕ້ອນຮັບຕໍ່  ທ່ານ ນ ມໍລະກົດ ສີສະຫວັດ ເອກອັກຄະຣາຊະທູດ ແຫ່ງຣາຊະອານາຈັກໄທ ປະຈໍາ ສປປ ລາວ ໃນໂອກາດເຂົ້າຢ້ຽມຂໍ່ານັບຄັ້ງນີ້ ທັງສອງຝ່າຍໄດ້ສົນທະນາ ປຶກສາຫາລືກ່ຽວກັບວຽກງານການຮ່ວມມື ລະຫວ່າງ ສປປ ລາວ- ຣາຊະອານາຈັກໄທ ທີ່ມີການພົວພັນເສີມສ້າງທີ່ດີໃນໄລຍະຜ່ານມາເປັນຕົ້ນ ໂອກາດການຄ້າ-ການລົງທຶນທົ່ວໄປ, ບັນຫາບາງຂໍ້ຄົງຄ້າງທີ່ຍັງບໍ່ທັນເຂົ້າໃຈຊຶ່ງກັນ ແລະ ກັນ ຕົວຢ່າງ: ການນໍາເຂົ້ານໍ້າມັນເຊື້ອໄຟຈາກປະເທດໄທ, ການ​ອຳນວຍ​ຄວາມ​ສະດວກ​ໃນ​ການ​ຂົນ​ສົ່ງ​ສິນຄ້າ ຜ່ານ​ທາງ​ລົດ​ໄຟ ລາວ-ຈີນ ​ຕໍ່ ຢູ​ໂລບ, ການພັດທະນາການຄ້າຊາຍແດນ ລາວ-ໄທ ໃນຂອບເຂດສິນຄ້າກະສິກໍາ ແລະ ການສະໜັບສະໜູນພາກທຸລະກິດໄທໃຫ້ມາລົງທຶນໃນລາວໃຫ້ຫຼາຍເພີ່ມຂຶ້ນ; ຝ່າຍໄທ ພ້ອມໃຫ້ການສະໜັບສະໜູນ ຄວາມຊ່ວຍເຫຼືອທາງວິຊາການ ໃນການພັດທະນາຊັບພະຍາກອນມະນຸດ, ມີບົດຮຽນການພັດທະນາຊຸມຊົນ, ການສ້າງເສດຖະກິດພໍພຽງ, ການຂົນສົ່ງໂດຍ Logistic; ການຜະລິດກະສິກໍາ ທີ່ເຮັດເປັນສະມາຄົມ ແລະ ສະຫະກອນ; ການຜະລິດສິນຄ້າ SMEs (OTOP) ທີ່ດີ;

     ພ້ອມດຽວກັນນີ້, ທ່ານເອກອັກຄະຣາຊະທູດ ແຫ່ງຣາຊະອານາຈັກໄທ  ປະຈໍາ ສປປ ລາວ ໄດ້ສະແດງຄວາມຍິນດີ ແລະ ຂອບໃຈຕໍ່ທ່ານລັດຖະມົນຕີ ທີ່ໄດ້ໃຫ້ການຮ່ວມມື ລະຫວ່າງ ສປປ ລາວ –  ຣາຊະອານາຈັກໄທ ​ ແລະ ​ອຳ​ນວຍ​ຄວາມ​ສະ​ດວກໃນວຽກງານຫຼາຍດ້ານ ເພື່ອໃຫ້ເກີດຜົນປະໂຫຍດສູງສຸດໃຫ້ແກ່ສອງປະເທດໃນຕໍ່ໜ້າ.

        ຕອນທ້າຍ ທ່ານລັດຖະມົນຕີ ໄດ້ສະແດງຄວາມຂອບໃຈ ຕໍ່ທ່ານເອກອັກຄະຣາຊະທູດ ພ້ອມທັງສະແດງຄວາມຫວັງວ່າ: ສອງ​ປະ​ເທດຈະ​ສືບ​ຕໍ່​ເປີດ​ກວ້າງ​ການ​ສະໜັບສະໜູນ, ແລກປ່ຽນບົດຮຽນ-ຂໍ້ມູນຂ່າວສານຊຶ່ງກັນ ແລະ ກັນ ​ແລະ ການ​ຮ່ວມ​ມື ​ເພື່ອເສີມ​ຂະຫຍາຍ​ການ​ຄ້າ ​ແລະ ການ​ລົງທຶນໃຫ້ນັບມື້ນັບເພີ່ມຂຶ້ນ. ນອກຈາກນີ້, ທ່ານລັດຖະມົນຕີຍັງໄດ້ມອບຂອງຂວັນຜະລິດຕະພັນຊາຂອງລາວ ໃຫ້ແກ່ທ່ານທູດ ເພື່ອເປັນການໂຄສະນາສິນຄ້າຜະລິດຈາກປະເທດລາວໃຫ້ບັນດາປະເທດໄດ້ຮັບຮູ້ ຢ່າງກວ້າງຂວາງ.

ພາບ-ຂ່າວ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ