ໃນຕອນ​ເຊົ້າເວລາ 9:30 ໂມງ ຂອງວັນທີ 23 ມີຖຸນາ 2022, ທີ່ຫ້ອງຮັບແຂກໃຫຍ່ ຊັ້ນ 04 ກະຊວງອຸດສາຫະກໍາ ແລະ ການຄ້າ, ທ່ານ ມະໄລທອງ ກົມມະສິດ  ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ນາງ ລຽວ ຊິວລິນ, ເອກອັກຄະລັດຖະທູດ ແຫ່ງ ສິງກະໂປ ປະຈໍາ ສປປ ລາວ ຊຶ່ງມີສໍານັກງານສະຖານເອກອັກຄະລັດຖະທູດຕັ້ງຢູ່ ສປປ ລາວ ໃນ​ໂອ​ກາດ​ເຂົ້າພົບປະປຶກສາຫາລືທົບທວນຄືນດ້ານການຄ້າ-ການລົງທຶນ ມີຜູ້ເຂົ້າຮ່ວມ ຮອງຫົວໜ້າກົມອ້ອມ ຫົວໜ້າພະແນກອ້ອມຂ້າງກະຊວງ ເຂົ້າຮ່ວມທັງສອງຝ່າຍ ປະມານ 12 ທ່ານ.

          ໂອກາດນີ້  ທ່ານ  ມະໄລທອງ ກົມມະສິດ  ລັດຖະມົນຕີ  ກະຊວງອຸດສາຫະກໍາ ແລະ ການຄ້າ ກໍ່ສະແດງຄວາມຍ້ອງຍໍ ຊົມເຊີຍຕໍ່  ທ່ານ ນາງ ລຽວ ຊິວລິນ, ອັກຄະລັດຖະທູດ ສີງກະໂປ ປະຈໍາ ສປປ ລາວ ໃນໂອກາດເຂົ້າຢ້ຽມຂໍ່ານັບຄັ້ງນີ້ ເຊິ່ງທ່ານ ທູດ ໄດ້ສົນທະນາກ່ຽວກັບວຽກງານການຮ່ວມມື ການພົວພັນດ້ານການຄ້າ ລະຫວ່າງ ສປປ ລາວ-ສິງກະໂປ ທີ່ມີສາຍພົວພັນເສີ່ມສ້າງທີ່ດີໃນໄລຍະຜ່ານມາ ດ້ານເສດຖະກິດ, ດ້ານການຄ້າ, ການລົງທຶນ ລະຫວ່າງ ສປປ ລາວ ແລະ ສິງກະໂປ ໃນນີ້ມູນຄ່າການຄ້າສອງຝ່າຍບັນລຸໄດ້ 200 ລ້ານ ໂດລາສະຫະລັດ ປີ2022

        ສິນຄ້າການນໍາເຂົ້າປະຕິບັດໄດ້ 87 ລ້ານໂດລາສະຫະລັດ. ສິນຄ້າລາວສົ່ງອອກປະກອບມີ: ເຄື່ອງທີ່ເຮັດດ້ວຍເຈ້ຍ, ນໍ້າມັນກະຊວ, ນໍ້າມັນແອັດຊັງ ແລະ ແອັດຊັງພີເສດ, ນໍ໊າມັນດິບ, ຢາສູບ ແລະ ຜະລິດຕະພັນຢາສູບ, ນໍ້າຫອມ, ເຄື່ອງສໍາອາງ ອຸປະກອນກົນຈັກ, ເຄື່ອງພະຫະນະລົດຍົນ, ອຸດສາຫະກໍາອາຫານ, ຊາສໍາເລັດຮູບ ນໍ້າມັນໜຽວ ນໍ້າມັນເຄື່ອງ ແລະ ອື່ນໆ.

       ສິນຄ້າການສົ່ງອອກປະຕິບັດໄດ້ 150 ໂດລາສະຫະລັດ. ປະກອບມີ: ແກ້ວ ແລະ ເຄື່ອງທີ່ເຮັດດ້ວຍແກ້ວ, ຄໍາປະສົມ, ຄໍາແທ່ງ, ເຫຼົາ, ເບຍ ວາຍ, ຢາສູບ, ເຄື່ອງໄຟຟ້າ ແລະ ອຸປະກອນເຄື່ອງໃຊ້ໄຟຟ້າ, ເກືອບ, ເຄື່ອງນຸ່ງຫົ່ມ, ອຸປະກອນກົນຈັກ, ສ່ວນປະກອບເຄື່ອງມື ແລະ ອຸປະກອນທັດສະນະສາດ, ເມັດພຶດ, ໝາກໄມ້ທີ່ມີນໍ້າມັນ, ເຟືອງ ແລະ ຫຍ້າ ໄມ້ອັດ, ຜະລິດຕະພັນດິນເຜົາ, ໄມ້ແປຮູບ, ເຄື່ອງສໍາເລັດຮູບ ແລະ ສິນຄ້າອື່ນໆ.

                 ທ່ານ ລັດຖະມົນຕີ ສະເໜີໃຫ້ຝ່າຍ ສິງກະໂປ ສືບຕໍ່ຮ່ວມມື ແລະ ສົ່ງເສີມການຄ້າສອງຝ່າຍໃຫ້ຂະຫຍາຍໂຕສູງຂື້ນເລື່ອຍໆ ພ້ອມທັງຊັກຊວນໃຫ້ນັກທຸລະກິດສິງກະໂປ ມາລົງທຶນ ໃນ ສປປ ລາວ ໃຫ້ຫຼາຍຂື້ນ.

 ທ່ານ ນາງ ລຽວ ຊິວລິນ    ເອກອັກຄະລັດຖະທູດ ສິງກະໂປ ປະຈໍາ ສປປ ລາວ ໄດ້ສະແດງຄວາມຍິນດີຕໍ່ທ່ານ ລັດຖະມົນຕີ ທີ່ໄດ້ໃຫ້ຄໍາໝັ້ນວ່າໃນຕໍ່ໜ້າຈະໃຫ້ການຮ່ວມມື ລະຫວ່າງ ສປປ ລາວ – ​ສິງກະໂປ ແລະ ​ອຳ​ນວຍ​ຄວາມ​ສະ​ດວກໃນວຽກງານຫຼາຍດ້ານ ເພື່ອໃຫ້ເກີດຜົນປະໂຫຍດສູງສຸດໃຫ້ແກ່ສອງປະເທດໃນອະນາຄົດໜ້າ.

ຂ່າວ-ພາບ: ໄພຄໍາອີ  ສູນສະຖິຕີ ແລະ ຂໍ້ມູນຂ່າວສານ ກະຊວງ ອຄ.