ຄະນະບໍລິຫານງານຊາວໜຸ່ມກະຊວງອຸດສາຫະກໍາ ແລະ ການຄ້າ (ອຄ) ໄດ້ຈັດກອງປະຊຸມສະຫຼຸບຜົນການການເຄື່ອນໄຫວວຽກງານງານຊາວໜຸ່ມປະຈໍາປີ 2022 ແລະ ທິດທາງແຜນການ ປະຈໍາປີ 2023 ແລະ ພິທີມອບຫຼຽນກາລະນຶກວັນສ້າງຕັ້ງຄະນະຊາວໜຸ່ມປະຊາຊົນປະຕິວັດລາວ ຄົບຮອບ 65 ປີ (14 ເມສາ 1955-14 ເມສາ 2020) ຂື້ນໃນວັນທີ 23 ມິຖຸນາ 2023, ທີ່ກະຊວງ ອຄ ໂດຍການເປັນປະທານຮ່ວມຂອງ ສະຫາຍ ມະໄລທອງ ກົມມະສິດ ກໍາມະການສໍາຮອງສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີ ກະຊວງ ອຄ, ສະຫາຍ ມອນໄຊ ລາວມົວຊົ່ງ ກໍາມະການສໍາຮອງສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິບັດລາວ ແລະ ສະຫາຍ ປອ ບຸນເພັງ ສີບຸນເຮືອງ ເລຂາຄະນະບໍລິຫານງານ ຊປປລ, ກະຊວງ ອຄ ມີບັນດາສະຫາຍຄະນະພັກກະຊວງ, ເລຂາໜ່ວຍພັກ, ເລຂາຮາກຖານຊາວໜຸ່ມບັນດາກົມ ແລະ ສະມາຊິກຊາວໜຸ່ມ ເຂົ້າຮ່ວມ.
ປະຕິບັດຕາມການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງ V ຂອງອົງຄະນະພັກກະຊວງ ອຄ ແລະ ການ ຈັດຕັ້ງຜັນຂະຫຍາຍແຜນພັດທະນາອຸດສາຫະກໍາປຸ່ງແຕ່ງ ແລະ ການຄ້າ 5 ປີ ( 2021-2025 ) ກໍ່ຄືການຈັດຕັ້ງປະຕິ ບັດມະຕິກອງປະຊຸມໃຫຍ່ຄັ້ງທີ IV ຜູ້ແທນຊາວໜຸ່ມກະຊວງອຸດສາຫະກໍາ ແລະ ການຄ້າ ໄປພ້ອມກັບການດໍາເນິນກອງປະຊຸມຄົບຄະນະກາງສະໄໝຂອງບັນດາຮາກຖານພັກ ທົ່ວອົງຄະນະພັກກະຊວງອຸດສາຫະກໍາ ແລະ ການຄ້າ ຢ່າງເປັນຂະບວນຟົດຟື້ນ ແລະ ບົດແນະນໍາ ກ່ຽວກັບການຍ້ອງຍໍ ຂອງສູນກາງຊາວໜຸ່ມປະຊາຊົນປະຕິວັດລາວ ໃນໄລຍະ ໃໝ່ ສະບັບເລກທີ 541/ລຂ, ລົງວັນທີ 14 ຕຸລາ 2021 ແລະ ຂໍ້ຕົກລົງຂອງຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ສະບັບເລກທີ 035/ລຂ, ລົງວັນທີ 10 ມັງກອນ 2023 ວ່າດ້ວຍມອບຫຼຽນກາລະນຶກ 65 ປີ ວັນສ້າງຕັ້ງຄະນະຊາວໜຸ່ມປະຊາຊົນປະຕິວັດລາວ ໃຫ້ແກ່ບຸກຄົນ ແລະ ກົມກອງຂອງກະຊວງອຸດສາຫະກໍາ ແລະ ການຄ້າ ທີ່ມີຜົນງານດີເດັ່ນໃນການປະກອບສ່ວນວຽກງານຊາວໜຸ່ມປະຊາຊົນປະຕິວັດລາວ ໃນໄລຍະຜ່ານມາ.
ໂອກາດນີ້ ສະຫາຍເລຂາຄະນະບໍລິຫານງານ ຊປປລ, ກະຊວງ ອຄ ໄດ້ຂື້ນລາຍງານພ້ອມຕີລາຄາຜົນການຈັດ ຕັ້ງປະຕິບັດວຽກງານງານຊາວໜຸ່ມປະຈໍາປີ 2022 ແລະ ທິດທາງແຜນການ ປະຈໍາປີ 2023 ເຊິ່ງສະຫາຍຍັງໃຫ້ຮູ້ວ່າ ປັດຈຸບັນຄະນະບໍລິຫານງານຊາວໜຸ່ມປະຊາຊົນ ປະຕິວັດລາວ ກະຊວງອຸດສາຫະກຳ ແລະ ການຄ້າ ມີໜ່ວຍຊາວໜຸ່ມທັງໝົດ 19 ໜ່ວຍ, ມີສະມາຊິກທົງໝົດ 767 ສະຫາຍ, ຍິງ 329 ສະຫາຍ, ໃນນີ້: ຂົງເຂດລັດບໍລິຫານ 14 ໜ່ວຍ ສະມາຊິກ 457 ສະຫາຍ, ຍີງ 200 ສະຫາຍ ແລະ ຂົງເຂດບໍລິສັດລັດວິສາຫະກິດ 5 ໜ່ວຍ , ສະມາຊິກ 340 ສະຫາຍ, ຍີງ 129 ສະຫາຍ.
ໂອກາດອັນສະຫງ່າລາສີນີ້ ພິທີມອບຫຼຽນກາລະນຶກວັນສ້າງຕັ້ງຄະນະຊາວໜຸ່ມປະຊາຊົນປະຕິວັດລາວ ຄົບ ຮອບ 65 ປີ (14 ເມສາ 1955-14 ເມສາ 2020) ທັງໝົດຈໍານວນ 130 ຫຼຽນກາ, ໃນນີ້ມອບໃຫ້ບຸກຄົນ ຈໍານວນ 113 ສະຫາຍ ແລະ 17 ກົມກອງ ຂອງກະຊວງອຸດສາຫະກໍາ ແລະ ການຄ້າ ທີ່ມີຜົນງານດີເດັ່ນໃນຂະບວນການປະກອບສ່ວນວຽກງານຄະນະຊາວ ໜຸ່ມປະຊາຊົນປະຕິວັດລາວ ໃນໄລຍະທີ່ຜ່ານມາ
ຂ່າວ-ພາບ: ໄພວັນ ໂຄດວັນທາ ສູນສະຖິຕິ ແລະ ຂໍ້ມູນຂ່າວສານ
