ໃນວັນທີ 23 ມິຖຸນາ 2023, ທີ່ກະຊວງ ອຄ, ໄດ້ຈັດກອງປະຊຸມພົບປະແລກປ່ຽນບົດຮຽນການເຄື່ອນໄຫວວຽກງານຊາວໜຸ່ມ ແລະ ວິຊາສະເພາະ 2 ກະຊວງ, ກະຊວງອຸດສາຫະກໍາ ແລະ ການຄ້າ (ອຄ) ແລະ ກະຊວງການຕ່າງປະເທດ (ຕປທ) ຂື້ນ ໂດຍການເປັນປະທານຮ່ວມຂອງ ສະຫາຍ ມະໄລທອງ ກົມມະສິດ ກໍາມະການສໍາຮອງສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີ ກະຊວງ ອຄ, ສະຫາຍ ມອນໄຊ ລາວມົວຊົ່ງ ກໍາມະການສໍາຮອງສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິບັດລາວ ແລະ ສະຫາຍ ທອງຜ່ານ ສະຫວັນເພັດ, ຄະນະປະຈໍາພັກ, ຮອງລັດຖະມົນຕີກະຊວງການຕ່າງປະເທດ ຜູ້ເຂົ້າຮ່ວມມີ ຄະນະບໍລິຫານງານ ແລະ ສະມາຊິກຊາວໜຸ່ມຂອງສອງກະຊວງ ເຂົ້າຮ່ວມ.

ໃນກອງປະຊຸມພົບປະແລກປ່ຽນບົດຮຽນລະຫວ່າງຊາວໜຸ່ມກະຊວງ ອຄ ແລະ ກະຊວງ ຕປທ ຄັ້ງນີ້ມີ 4 ຫົວຂໍ້ຄື:  1). ການເຄື່ອນໄຫວ ຂອງ ຊປປ ລາວ ກະຊວງອຸດສາຫະກຳ ແລະ ການຄ້າ ; 2). ວຽກງານອໍານວຍຄວາມສະດວກທາງດ້ານການຄ້າ; 3). ກ່ຽວກັບການຈັດຕັ້ງປະຕິບັດວຽກງານ 4 ບຸກ ຂອງຄະນະບໍລິຫານງານຊາວໜຸ່ມກະຊວງການຕ່າງ ປະເທດ ; ແລະ 4). ສິ່ງທ້າທາຍຂອງການພົວພັນເສດຖະກິດສາກົນຫຼັງໂຄວິດ-19, ນອກນັ້ນໃນຕອນແລງຈະໄດ້ສ້າງກິດຈະກໍາຮ່ວມກັນ ເພື່ອຮັດແໜ້ນຄວາມສາມັກຄີລະຫວ່າງຊາວໜຸ່ມ 2 ກະຊວງ.

ໂອກາດອັນສະຫງ່າລາສີນີ້ ຄະນະປະທານໄດ້ສະແດງຄວາມຊົມເຊີຍ ຕໍ່ຄະນະບໍລິຫານງານຊາວໜຸ່ມ 2 ກະຊວງ , ກະຊວງ ອຄ ແລະ ກະຊວງ ຕປທ ທີ່ໄດ້ຕັ້ງໃຈຮ່ວມກັນຈັດກອງປະຊຸມພົບປະແລກປ່ຽນບົດຮຽນຄັ້ງນີ້ຂື້ນ ແລະ ໄດ້ເນັ້ນບາງຈຸດຄື ຊາວໜຸ່ມຕ້ອງໄດ້ເຮັດບົດບາດສໍາຄັນ ດ້ານການນໍາພາ ການເມືອງແນວຄິດ, ສ້າງຄວາມເຂົ້າໃຈຕໍ່ແນວທາງນະໂຍບາຍຂອງພັກ-ລັດ, ພ້ອມນັ້ນກໍ່ໃຫ້ຊາວໜຸ່ມພ້ອມເອົາໃຈໃສ່ກຽມພ້ອມສ້າງການຫັນປ່ຽນຢ່າງແຂງແຮງເລິກເຊິ່ງຮອບດ້ານໃນຍຸກໃໝ່, ໃຫ້ຊາວໜຸ່ມກາຍເປັນກໍາລັງແຮງທີ່ພັກໄວ້ເນື້ອເຊື່ອໃຈຕາມຄໍາຂວັນຂອງຊ່າວໜຸ່ມ 4 ບຸກ; ພ້ອມເສີມຂະຫຍາຍຄວາມຮັບຜິດຊອບບົດບາດ ການເປັນແບບຢ່າງນໍາໜ້າພາທາງການຈັດຕັ້ງປະຕິບັດວຽກງານວິຊາສະເພາະຢ່າງຕັ້ງໜ້າ ເພື່ອປະກອບສ່ວນເຂົ້າໃນການສ້າງສາພັດທະນາປະເທດຊາດໃຫ້ຈະເລີນກ້າວໜ້າຂື້ນເລືອຍໆ. ຄຽງຄູ່ກັນນີ້ສະມາຊິກຊາວໜຸ່ມທັງໝົດຕ້ອງໄດ້ຝຶກຜົນຫຼໍ່ຫຼອມ, ສົ່ງເສີມຄວາມຮູ້ຄວາມສາມາດດ້ານການເມືອງ-ແນວຄິດ, ມີແບບແຜນທີ່ແນ່ນອນ; ເປັນເສນາທິການໃຫ້ຄະນະພັກ, ຄະນະນໍາກະຊວງທຸກຂັ້ນ; ລົງເລິກສົ່ງເສີມດ້ານເຕັກນິກ ແລະ ທັກສະຕ່າງໃຫ້ມີຄວາມໜັກແໜ້ນ; ມີຫົວຄິດປະດິດສ້າງ, ກ້າຄິດ, ກ້າສະເໜີສິ່ງທີ່ເປັນຜົນປະໂຫຍດຕໍ່ສ່ວນລວມ ພ້ອມກັນສ້າງຂະບວນການຊາວໜຸ່ມ 2 ກະຊວງ ໃຫ້ມີຂະບວນການຟົດພື້ນຫ້າວຫັນ. ສືບຕໍ່ສ້າງຂະບວນການຈັດຕັ້ງຂໍ້ແຂ່ງຂັນຍ້ອງຍໍຮັກຊາດພັດທະນາ, ວຽກງານ 3 ສ້າງຂອງພັກ ແລະ ຂະບວນການຂໍ້ແຂ່ງຂັນ 4 ບຸກຂອງຊາວໜຸ່ມ ຕິດພັນຄໍາຂວັນທີ່ວ່າ: ບ່ອນໃດຍາກຊາວໜຸ່ມບຸກ, ບ່ອນໃດທຸກຊາວໜຸ່ມຜ່ານຜາ, ບ່ອນໃດຊາດຕ້ອງການຊາວໜຸ່ມຂັນອາສາ.

ຕອນທ້າຍ ທ່ານຍັງໄດ້ຮຽກຮ້ອງໃຫ້ສະມາຊິກຊາວໜຸ່ມ ຕ້ອງເພີ່ມທະວີຄວາມເຊື່ອໝັ້ນຕໍ່ການນໍາພາຂອງອົງຄະນະພັກກະຊວງ, ຄະນະພັກທຸກຂັ້ນ, ຍຶດໝັ້ນອຸດົມການຂອງຊາວໜຸ່ມຢ່າງແທ້ຈິງ ຕ້ອງໄດ້ຍົກລະດັບເພີ່ມທະວີເອົາໃຈໃສ່ໄຈ້ແຍກໃຫ້ໄດ້ມິດ ແລະ ສັດຕູ ໃຫ້ຈະແຈ້ງ ໃນສະພາບຄວາມຫຍຸ້ງຍາກປະຈຸບັນນີ້, ຕ້ອງກໍາແໜ້ນຕໍ່ແນວທາງນະໂຍບາຍຂອງພັກ ແລະ ຍົກສູງບົດບາດຄວາມຮັບຜິດຊອບດ້ານວິຊາສະເພາະຂອງຕົນທີ່ຖືກມອບໝາຍໃຫ້ສໍາເລັດຕາມຈຸດປະສົງເປົ້າໝາຍ.

ຂ່າວ-ພາບ: ໄພວັນ ໂຄດວັນທາ ສູນສະຖິຕິ ແລະ ຂໍ້ມູນຂ່າວສານ