ໃນວັນທີ 26 ມິຖຸນາ 2023 ທີ່ ຫ້ອງປະຊຸມໃຫຍ່ຊັ້ນ 01, ກະຊວງອຸດສາຫະກໍາ ແລະ ການຄ້າ; ໜ່ວຍພັກກົມອຸດສາຫະກໍາ ແລະ ຫັດຖະກໍາ ໄດ້ຈັດ ‘‘ກອງປະຊຸມກາງສະໄໝ ຄັ້ງທີ VI ຂອງໜ່ວຍພັກ ກົມອຸດສາຫະກໍາ ແລະ ຫັດຖະກໍາ” ຂຶ້ນ ໂດຍການເປັນປະທານຮ່ວມຂອງສະຫາຍ ປອ ບົວວັນ ວິລະວົງ ຄະນະປະຈໍາພັກກະຊວງ ອຄ ແລະ ສະຫາຍ ສໍາລີ ບຸດສະດີ, ຮັກສາການເລຂາໜ່ວຍພັກກົມອຸດສາຫະກໍາ ແລະ ຫັດຖະກໍາ; ມີຜູ້ເຂົ້າຮ່ວມຈາກຄະນະຮັບຜິດຊອບລົງຕິດຕາມ ຂອງກະຊວງ ແລະ ສະມາຊິກພັກສົມບູນ ຂອງໜ່ວຍພັກກົມ ອຫ ຈໍານວນປະມານ 45 ສະຫາຍ.
ຈຸດປະສົງເພື່ອສະຫຼຸບການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VI ຂອງໜ່ວຍພັກກົມອຸດສາຫະກໍາ ແລະ ຫັດຖະກໍາ ກາງສະໄໝ ໄລຍະແຕ່ 6/2019-6/2023 ແລະ ທິດທາງທ້າຍສະໄໝ; ພ້ອມທັງເຜີຍແຜ່ເຊື່ອມຊຶມ 3 ເອກະສານ:
1. ຄໍາສັ່ງ ຂອງຄະນະເລຂາທິການສູນກາງພັກ ເລກທີ 268/ຄລສພ, ລົງວັນທີ 20/01/2023; 2. ມະຕິ ຂອງກົມການເມືອງສູນກາງພັກ ວ່າດ້ວຍມາດຕະຖານ ຂອງພະນັກງານ ນໍາພາ-ຄຸ້ມຄອງ ເລກທີ 030/ກມສພ, ລົງວັນທີ 03 ມັງກອນ 2018; 3. ກົດລະບຽບພັກ ສະໄໝທີ XI ວ່າດ້ວຍຂໍ້ຫ້າມ ຂອງສະມາຊິກພັກ. * ແລະ ຜ່ານລະບຽບການທາບທາມຄວາມໄວ້ວາງໃຈ ແລະ ຂັ້ນຕອນໃນການປ່ອນບັດ, ລົງຄຳເຫັນຕໍ່ການນໍາພາ ລວມແລະບຸກຄົນໃນຄະນະໜ່ວຍພັກ; ຜ່ານບົດສໍາຫຼວດບຸກຄົນໃນຄະນະໜ່ວຍພັກ ແລະ ບົດປະກອບຄຳເຫັນຂອງສະມາຊິກພາຍໃນໜ່ວຍພັກ ທີ່ປະກອບໃຫ້ຄະນະໜ່ວຍພັກ 5 ສະຫາຍ ເລີ່ມຈາກ ສະຫາຍ ປອ ບົວວັນ ວິລະວົງ, ຕາມດ້ວຍ ສະຫາຍ ລຳລີ ບຸດສະດີ ແລະ ຕໍ່ດ້ວຍຄະນະໜ່ວຍພັກ ຕາມລໍາດັບ. ພ້ອມດຽວກັນນີ້, ສະມາຊິກພັກສົມບູນ ຂອງໜ່ວຍພັກທີ່ເຂົ້າຮ່ວມໄດ້ ປະກອບຄຳເຫັນຕໍ່ບົດສໍາຫຼວດບຸກຄົນໃນຄະນະໜ່ວຍພັກ ແລະ ສະຫາຍ ປອ ບົວວັນ ວິລະວົງ ຄະນະປະຈໍາພັກໄດ້ໃຫ້ການໂອ້ລົມ ແລະ ໃຫ້ທິດຊີ້ນໍາຕໍ່ກອງປະຊຸມວ່າ: ບັນດາສະຫາຍຄະນະໜ່ວຍພັກໄດ້ມີຄວາມຮັບຜິດຊອບສູງໃນການຊີ້ນໍາ ນໍາພາຈັດຕັ້ງຜັນຂະຫຍາຍມະຕິຄຳສັ່ງຕ່າງໆຂອງພັກ ແລະ ລັດ ໃຫ້ເປັນແຜນງານລະອຽດ ຕາມພາລະບົດບາດໜ້າທີ່ການເມືອງຂອງຕົນ. ໃນນັ້ນ, ກໍໄດ້ຍົກໃຫ້ເຫັນບັນດາດ້ານທີ່ພົ້ນເດັ່ນເປັນຕົ້ນ ແມ່ນການນຳພາທາງດ້ານ ການເມືອງ-ແນວຄິດ, ການຄຸ້ມຄອງປ້ອງກັນ, ກໍ່ສ້າງ ແລະ ຂະຫຍາຍພັກ, ການຍົກລະດັບຄວາມຮູ້ຄວາມສາມາດ ແລະ ການນຳພາດ້ານວິຊາສະເພາະ, ນັບທັງການຄົ້ນຄວ້າ, ສ້າງ ແລະ ປັບປຸງບັນດານິຕິກຳ, ລະບຽບການຕ່າງໆ ເພື່ອເປັນເຄື່ອງມືໃນການສົ່ງເສີມ ແລະ ຄຸ້ມຄອງໂຮງງານອຸດສາຫະກຳປຸງແຕ່ງ ແລະ ຫັດຖະກຳໃນຂອບເຂດທົ່ວປະເທດ. ນອກນີ້, ພວກສະຫາຍກໍຍັງໄດ້ມີການຮ່ວມມື ເພື່ອເຊື່ອມໂຍງເສດຖະກິດກັບພາກພືື້ນ ແລະ ສາກົນ ເປັນຕົ້ນ ການຮ່ວມມືຶໃນຂອບອາຊຽນ, ຂອບແມ່ນ້ຳຂອງແມ່ນ້ຳລ້ານຊ້າງ, ຂອບແມ່ນໍ້າຂອງ-ຍີ່ປຸ່ນ, ທະນາຄານໂລກ, ອົງການ UNIDO ແລະ ອົງການຈັດຕັ້ງອື່ນໆ ໃນການຍາດແຍ່ງເອົາການຮ່ວມມື, ການຊ່ວຍເຫຼືອທາງດ້ານເຕັກນິກ ແລະ ວິຊາການ ເພື່ອການພັດທະນາຂະແໜງການອຸດສາຫະກຳປຸງແຕ່ງ ແລະ ຫັດຖະກຳ ໃຫ້ຂະຫຍາຍຕົວ;
ແລະມີຄໍາເຫັນບາງຈຸດທີ່ເປັນທິດຊີ້ນຳເພື່ອເປັນບ່ອນອີງໃຫ້ແກ່ບັນດາສະມາຊິກພັກກົມ ອຫ ໄດ້ນຳໄປພິຈາລະນາຄົ້ນຄິດເພື່ອປັບປຸງແກ້ໄຂ ໃນການນຳພາດ້ານການເມືອງ-ແນວຄິດ ແລະ ການຈັດຕັ້ງປະຕິບັດວຽກງານວິຊາສະເພາະ ດັ່ງນີ້:
1/ ສືບຕໍ່ເອົາໃຈໃສ່ ກໍ່ສ້າງ ແລະ ປັບປຸງ ຮາກຖານພັກ ໃຫ້ມີຄວາມເຂັ້ມແຂງ ໜັກແໜ້ນ ຕາມ 5 ຫຼັກການ ແລະ 3 ທິດນຳ ຂອງພັກ. 2/ສືບຕໍ່ຊີ້ນໍາ-ນໍາພາ ວຽກງານສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ພະນັກງານ ເພື່ອຍົກສູງຄວາມຮັບຜິດຊອບ ແລະ ໜ້າທີ່ຂອງສະມາຊິກພັກ ໂດຍສະເພາະໄລຍະທີ່ມີຄວາມຫຍຸ້ງຍາກດ້ານເສດຖະກິດການເງິນ ຖືເປັນບັ້ນທົດສອບຄວາມໜັກແໜ້ນຂອງສະມາຊິກພັກ, ພະນັກງານຕິດຕາມຊຸກຍູ້ສະມາຊິກພັກໃນການປະຕິບັດກົດລະບຽບຂອງພັກ ໂດຍສະເພາະບັນດາຂໍ້ຫ້າມ ເພື່ອເປັນແບບຢ່າງໃຫ້ມະຫາຊົນ ພ້ອມນີ້ກໍ່ໃຫ້ສືບຕໍ່ຊີ້ນຳ-ນຳພາອົງການຈັດຕັ້ງມະຫາຊົນ ເປັນເຈົົ້າການລະດົມໃຫ້ສະມາຊິກ ມີແນວຄິດອຸ່ນອ່ຽນທຸ່ນທ່ຽງ, ມີສະຕິສູງຕໍ່ສະພາບຄວາມຫຍຸ້ງຍາກດ້ານເສດຖະກິດ-ການເງິນ ໂດຍສະ ເພາະຄ່າຄອງຊີບແພງ ເຮັດແນວໃດເພື່ອຮັບປະກັນບໍ່ໃຫ້ມີປະກົດການຫຍໍ້ທໍ້ໃນຖັນແຖວສະມາຊິກພັກ, ພະນັກງານ. 3/ສືບຕໍ່ຜັນຂະຫຍາຍເນື້ອໃນມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ VI ສະໄໝທີ XI ຢ່າງຕັ້ງໜ້າ ແລະ ມະຕິຂອງຄະນະບໍລິຫານງານພັກ ກະຊວງ ອຄ ສະໄໝທີ V ໂດຍສະເພາະວຽກຈຸດສຸມ ແລະ ສຳຄັນ. ສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງ ຊຶ່ງການຫັນປ່ຽນແມ່ນພາວະວິໄສ, ແມ່ນສິ່ງສຳຄັນ ແລະ ຈຳເປັນຕ້ອງປ່ຽນ ເພາະສະພາບແວດລ້ອມມີການປ່ຽນແປງ, ແຕ່ການດຳເນີນການຫັນປ່ຽນ ຕ້ອງດຳເນີນໄປຢ່າງຮອບຄອບ ແລະ ມີບາດກ້າວທີ່ເໝາະສົມ, ການຫັນປ່ຽນຕ້ອງຢຶດໝັ້ນ ຫຼື ຕໍ່ຍອດຈິດໃຈຂອງພັກ, ຕ້ອງສືບຕໍ່ຍູ້ແຮງການປ່ຽນແປງດ້ານເສດຖະກິດ, ຕ້ອງປັບປຸງແບບແຜນການນຳພາ ຂອງພັກສອດຄ່ອງຕາມຈຸດພິເສດຂອງພວກເຮົາ, ແກ້ໄຂຂອດພະນັກງານ, ການເລືອກເຟັ້ນຄົນໃຫ້ຖືກຕ້ອງຕາມຄວາມຮູ້ຄວາມສາມາດ ແລະ ສ້າງຮາກຖານພັກໃຫ້ໜັກແໜ້ນ. 4/ຕັ້ງໜ້າຜັນຂະຫຍາຍບັນດາມະຕິຂອງພັກ ແລະ ລັດຖະບານ ໂດຍສະເພາະ ໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ. ສູ້ຊົນຈັດຕັ້ງປະຕິບັດວຽກງານສົ່ງເສີມການຜະລິດ ເພື່ອທົດແທນການນໍາເຂົ້າ ແລະ ເປັນສິນຄ້າສົ່ງອອກ ຕາມແຜນວຽກຈຸດສຸມ ແລະ ແຜນວຽກບູລິມະສິດ ກໍ່ຄື ການຈັດຕັ້ງປະຕິບັດແຜນພັດທະນາອຸດສາຫະກຳປຸງແຕ່ງ ແລະ ຫັດຖະກຳ 5 ປີ (2021-2025) ແລະ ແຜນວຽກຂອງໜ່ວຍພັກໄດ້ວາງອອກ ໃຫ້ເປັນຮູບປະທຳ, ບັນລຸຜົນສຳເລັດຕາມຄາດໝາຍ ອັນເປັນເງື່ອນໄຂສຳຄັນປະກອບສ່ວນໃນການແກ້ໄຂບັນຫາອັດຕາເງິນເຟີ້ ແລະ ຫັນໄປສູ່ສັງຄົມການຜະລິດຢ່າງແທ້ຈິງ. 5/ ສືບຕໍ່ການຕິດຕາມກວດກາ ແລະ ປະເມີນການຈັດຕັ້ງປະຕິບັດບັນດາຂໍ້ຕົກລົງ, ແຈ້ງການ ແລະ ນິຕິກຳອື່ນໆ ທີ່ສຳຄັນ ແຕ່ຍັງບໍ່ທັນຈັດຕັ້ງປະຕິບັດໄດ້ດີ, ລວມທັງກົນໄກ ແລະ ຂອດການປະສານງານ ລະຫວ່າງສາຍຕັ້ງ ແລະ ສາຍຂວາງ ທີ່ມີການປຶກສາຫາລືກັນ ແຕ່ກໍ່ຍັງບໍ່ທັນຕອບສະໜອງຕໍ່ຄວາມຮຽກຮ້ອງຕ້ອງການ ໃນໄລຍະກາງສະໄໝຜ່ານມາ ໃຫ້ໄດ້ຮັບການຄົ້ນຄວ້າ ແລະ ປັບປຸງແກ້ໄຂໃນຕໍ່ໜ້າ ບັນຫາໃດທີ່ຍັງແກ້ບໍ່ຕົກ ກໍຈະຕ້ອງໄດ້ລາຍງານຂໍທິດຊີ້ນຳ ຈາກຄະນະພັກກະຊວງ ເພື່ອປັບປຸງແກ້ໄຂ.
ນີ້ແມ່ນຈຸດລວມທີ່ຂ້າພະເຈົ້າຍົກຂຶ້ນໃຫ້ບັນດາສະຫາຍໃນຄະນະໜ່ວຍພັກ ແລະ ສະມາຊິກພັກ ທີ່ມີຄວາມຮັບຜິດ ຊອບໃນການຊີ້ນຳ ນຳພາໃນແຕ່ລະຂັ້ນ ເພື່ອເປັນບ່ອນອີງໃນການຈັດຕັ້ງຜັນຂະຫຍາຍໃຫ້ເກີດຜົນເປັນຈິງ.
ພາບ-ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
