ວັນທີ 07 ກໍລະກົດ 2023 ກະຊວງອຸດສາຫະກຳ ແລະ ການຄ້າ ໄດ້ຈັດງານສະເຫລີມສະຫລອງວັນຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (MSME) ສາກົນ ປະຈຳປີ 2023  ໂດຍໄດ້ຈັດຂຶ້ນ ຢູ່ທີ່ກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ກະຊວງອຸດສາຫະກຳ ແລະ ການຄ້າ ພາຍການເປັນປະທານກ່າວເປີດຂອງ ທ່ານ ບຸນເຖິງ ດວງສະຫວັນ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ເຊິ່ງມີຕາງໜ້າຈາກພາກລັດ, ພາກທຸລະກິດ, ສະຖາບັນການສຶກສາ ແລະ ອົງການຈັດຕັ້ງສາກົນຕ່າງໆ ເຂົ້າຮ່ວມເກືອບ 100 ທ່ານ.

              ໃນງານດັ່ງກ່າວ ທ່ານ ປອ ບຸນເພັງ ສີບຸນເຮືອງ, ຫົວໜ້າກົມສົ່ງເສີມ ວິສາຫະກິດຂະໜາດນ້ອຍ ແລະ ກາງ  ກະຊວງອຸດສາຫະກຳ ແລະ ການຄ້າ ໄດ້ລາຍງານໂດຍຫຍໍ້ໃຫ້ຊາບກ່ຽວກັບຄວາມເປັນມາຂອງງານດັ່ງກ່າວ  ຊຶ່ງແມ່ນສະມັດຊາໃຫຍ່ອົງການສະຫະປະຊາຊາດ ໄດ້ຮັບຮອງເອົາຕາມຍັດຕິສະບັບເລກທີ 71/279 ໃນເດືອນເມສາ 2017 ໂດຍກໍານົດເອົາວັນທີ 27 ມິຖຸນາ ຂອງທຸກປີ ເປັນວັນ MSME  ສາກົນ.  ຫຼັງຈາກນັ້ນມາ, ວັນທີ່ມີຄວາມໝາຍຄວາມສໍາຄັນດັ່ງກ່າວ ໄດ້ຮັບການສະເຫຼີມ ສະຫຼອງຢ່າງກວ້າງຂວາງ ໂດຍບັນດາອົງການຈັດຕັ້ງໃນເຄືອຂ່າຍຂອງ ອົງການສະຫະປະຊາຊາດ ທັງຢູ່ ເຊີແນວ ປະເທດສະວິດເຊີແລນ,  ຢູ່ນິວຢອກ ສະຫະລັດອາເມລິກາ, ໃນບັນດາປະເທດອາຊຽນ ແລະ ປະເທດຕ່າງໆໃນໂລກ ລວມທັງ ສປປ ລາວ ເຮົາ.

             ຈດຸປະສົງຂອງການກໍານົດໃຫ້ມີວັນດັ່ງກ່າວ ແມ່ນເພື່ອເຮັດໃຫ້ທຸກພາກສ່ວນທີ່ກ່ຽວຂ້ອງ ແລະ ທົ່ວສັງຄົມໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງເຖິງຖອງກ່ຽວກັບບົດບາດ ແລະ ຄວາມສໍາຄັນຂອງ MSME ທີ່ໄດ້ປະກອບສ່ວນເຂົ້າໃນການພັດທະນາເສດຖະກິດ, ການສ້າງວຽກເຮັດງານທໍາ ແລະ ການສ້າງລາຍຮັບ ເພື່ຶອຍົກລະດັບຊີວິດການເປັນຢູ່ຂອງປະຊາຊົນ ແລະ ຊຸມຊົນ ຢູ່ໃນທຸກຂົງເຂດທົ່ວໂລກ, ໂດຍສະເພາະແມ່ນການປະກອບສ່ວນ ເພື່ອບັນລຸເປົ້າໝາຍການພັດທະນາແບບຍືນຍົງ (SDG) ປີ 2030.

           ໃນປີ 2023, ອົງການສະຫະປະຊາຊາດ ໄດ້ກຳນົດຫົວຂໍ້ໃນການສະເຫລີມສະຫລອງວັນ MSME ສາກົນ ປະຈຳປີ 2023 ພາຍໃຕ້ຫົວຂໍ້ ກະຕຸ້ນ MSME ທົ່ວໂລກໂດຍການສະໜັບສະໜູນການເປັນຜູ້ປະກອບກິດຈະການເພດຍິງ ແລະ ຊາວໜຸ່ມ ແລະ ການປັບໂຕດ້ານຕ່ອງໂສ້ການສະໜອງ” ພາຍໃຕ້ຫົວຂໍ້ດັ່ງກ່າວ ກະຊວງອຸດສາຫະກຳ ແລະ ການຄ້າ ໄດ້ຄົ້ນຄວ້າ ແລະ  ດັດປັບໃຫ້ສອດຄ່ອງກັບນະໂຍບາຍສົ່ງເສີມການພັດທະນາເສດຖະກິດສັງຄົມ ຂອງ ສປປ ລາວ ເຮົາໃນປະຈຸບັນ ຈຶ່ງໄດ້ກຳນົດຫົວຂໍ້ຄື: “ຍົກລະດັບຜະລິດຕະພັນລາວ ເພື່ອທົດແທນການນຳເຂົ້າ”.

              ໃນວາລະກ່າວເປີດງານດັ່ງກ່າວ ທ່ານ ບຸນເຖິງ ດວງສະຫວັນ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ປະທານເປີດງານ ໄດ້ຊີ້ໃຫ້ເຫັນຄວາມສຳຄັນຂອງການສົ່ງເສີມ ແລະ ພັດທະນາ MSME ເຊິ່ງ MSME ຢູ່ ສປປ ລາວ ກວມອັດຕາສ່ວນປະມານ 99,8% ຂອງບັນດາວິສາຫະກິດທັງໝົດ ແລະ ສ້າງວຽກເຮັດງານທຳຫລາຍກວ່າ 80% ຂອງອັດຕາການຈ້າງງານ. ບັນດາ MSME ເຫລົ່ານັ້ນເຄື່ອນໄຫວທຸລະກິດໃນຂະແໜງການຕ່າງໆ ເຊັ່ນ: ການຄ້າ, ການຜະລິດ ແລະ ການບໍລິການ. ໃນໄລຍະຜ່ານມາ, ລັດຖະບານໄດ້ໃຫ້ຄວາມສຳຄັນແກ່ການສົ່ງເສີມ ແລະ ພັດທະນາ MSME ໂດຍໄດ້ກຳນົດບັນດານະໂຍບາຍ ແລະ ມາດຕະການຕ່າງໆ ເຊິ່ງຈັດຕັ້ງປະຕິບັດໂດຍບັນດາກະຊວງ, ໜ່ວຍງານ ທັງພາກລັດ ແລະ ພາກທຸລະກິດ ເພື່ອກະຕຸ້ນ ແລະ ສົ່ງເສີມ MSME ໃຫ້ສາມາດປະກອບສ່ວນເຂົ້າໃນການແກ້ໄຂຄວາມຫຍຸ້ງຍາກທາງດ້ານເສດຖະກິດໃນປະຈຸບັນ.

 ພາບ: ໄພຄໍາອີ

ຂ່າວ: ຈາກກົມ SME  ກະຊວງ ອຄ.