ໜ່ວຍພັກຮາກຖານບໍລິສັດເບຍລາວ ໄດ້ເປີດກອງປະຊຸມຄົບ​ຄະນະ​ກາງ​ສະ​ໄໝຂອງຄະນະພັກຮາກຖານ ຂື້ນ ໃນວັນທີ 5 ກໍລະກົດ 2023, ທີ່ຫ້ອງປະຊຸມບໍລິສັດເບຍລາວ ໂດຍໃຫ້ກຽດເປັນປະທານຂອງ ສະຫາຍ ສິດທິໄຊ ເກດຕະວົງ ຄະນະພັກກະຊວງອຸດສາຫະກໍາ ແລະ ການຄ້າ, ເລຂາໜ່ວຍພັດຮາກຖານ ບໍລິສັດເບຍລາວ ມີບັນດາສະຫາຍຄະນະໜ່ວຍພັກ ແລະ ສະມາຊິກພັກສົມບູນ ເຂົ້າຮ່ວມ.

ສະຫາຍ ສິດທິໄຊ ເກດຕະວົງ ເລຂາໜ່ວຍພັດຮາກຖານ ໄດ້ກ່າວເປີດກອງປະຊຸມໃນຄັ້ງນີ້ວ່າ: ປະຕິບັດຕາມກົດລະບຽບ ຂອງພັກປະຊາຊົນປະຕິວັດລາວ ສະໄໝທີ XI, ຄໍາສັ່ງ ຂອງຄະນະເລຂາທິການສູນກາງພັກ ວ່າດ້ວຍການດໍາເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຕ່ລະຂັ້ນ, ສະບັບເລກທີ 268/ຄລສພ, ລົງວັນທີ 20 ມັງກອນ 2023 ແລະ ແຜນການກະກຽມດໍາເນີນກອງປະຊຸມກາງສະໄໝ ຂອງຄະນະບໍລິຫານງານພັກກະຊວງອຸດສາຫະກໍາ ແລະ ການຄ້າ ສະບັບເລກທີ 081/ຄບພ.ອຄ, ລົງວັນທີ 19 ພຶດສະພາ 2023 ແລະ ໃນທ່າມກາງບັນຍາກາດທີ່ທົ່ວພັກ, ທົ່ວລັດ ແລະ ປະຊາຊົນລາວບັນດາເຜົ່າ ພວມຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງລັດ ຄັ້ງທີ IX ເຂົ້າສູ່ຊີວິດຕົວຈິງຢ່າງກວ້າງຂວາງ ໃນທົ່ວປະເທດ. ຄຽງຄູ່ກັນນັ້ນ ສະມາຊິກພັກ-ພະນັກງານພາຍໃນ ພວມຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງອຸດສາຫະກໍາ ແລະ ການຄ້າ ແລະ ແຜນພັດທະນາອຸດສາຫະກໍາປຸງແຕ່ງ ແລະ ການຄ້າ ເຂົ້າໃນແຜນວຽກຂອງຕົນ ຢ່າງເປັນຮູບປະທໍາ ແລະ ຢ່າງຕັ້ງໜ້າ.

ຜູ້ແທນເຂົ້າຮ່ວມກອງປະຊຸມ ໄດ້ຮັບຟັງການເຜີຍເເຜ່ເຊື່ອມຊຶມ 3 ເອກະສານສໍາຄັນ ຂອງຄະນະເລຂາທິການສູນກາງພັກຄື: 1. ເຜີຍແຜ່ເຊື່ອມຊືມຄໍາສັ່ງຂອງຄະນເລຂາທິການສູນກາງພັກ ເລກທີ 268/ຄລສພ, ລົງວັນທີ 20/01/2023; 2. ມະຕິຂອງກົມການເມືອງສູນກາງພັກ ວ່າດ້ວຍມາດຕະຖານຂອງພະນັກງານນໍາພາ-ຄຸ້ມຄອງ ເລກທີ 030/ກມສພ; ແລະ 3. ກົດລະບຽບພັກ ສະໄໝທີ XI, ຄືໜ້າທີ່ ແລະ ສິດ ຂອງຄະນະໜ່ວຍພັກຮາກຖານ ແລະ ຂໍ້ຫ້າມສະມາຊິກພັກ

ພ້ອມນັ້ນ ສະມາຊິກພັກ ຍັງຈະໄດ້ປະກອບຄໍາຄິດເຫັນ ໃສ່ບົດສະຫຼຸບການຈັດຕັ້ງປະຕິບັດ ມະຕິກອງປະຊຸມຄະນະພັກຮາກຖານ ແລະ ທິດທາງທ້າຍສະໄໝ ແລະ ບົດສໍາຫຼວດການນໍາພາລວມ, ບຸກຄົນ ຂອງຄະນະພັກຮາກຖານ ບໍລິສັດ ເບຍລາວ ເພື່ອຊອກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ເພື່ອນໍາໄປປັບປຸງແກ້ໄຂໃຫ້ດີຂຶ້ນ ແລະ ພາກທິດທາງວຽກງານຈຸດສຸມຮອດທ້າຍສະໄໝ; ກອງປະຊຸມຈະໄດ້ດໍາເນີນຊີວິດການເມືອງພາຍໃນຄະນະພັກຮາກຖານ, ສະມາຊິກພັກແຕ່ລະສະຫາຍຍັງຈະໄດ້ໃຊ້ສິດປະຊາທິປະໄຕ ຂອງຕົນຢ່າງຕັ້ງໜ້າ ເພື່ອປ່ອນບັດທາບທາມຄວາມເຊື່ອໝັ້ນ-ໄວ້ວາງໃຈ ຂອງການນໍາພາລວມ ແລະ ບຸກຄົນ ໃນຄະນະໜ່ວຍພັກ, ເປັນພື້ນຖານໃຫ້ຄະນະໜ່ວຍພັກເປັນບ່ອງອີງໃນການປັບປຸງກໍ່ສ້າງຕົນເອງ ເພື່ອສືບຕໍ່ຊີ້ນຳ-ນໍາພາ ຂະບວນການໃນການຈັດຕັ້ງປະຕິບັດ ຕາມມະຕິກອງປະຊຸມຄົບຄະນະກາງສະໄໝ ໃຫ້ບັນລຸຜົນສໍາເລັດຕາມລະດັບຄາດໝາຍ.

ໂອກາດອັນສະຫງ່າລາສີນີ້ ສະຫາຍ ສິດທິໄຊ ເກດຕະວົງ ເລຂາໜ່ວຍພັດຮາກຖານ ກໍໄດ້ໂອ້ລົມວ່າ: ສະແດງຄວາມຊົມເຊີຍຕໍຜົນງານ, ຜົນສໍາເລັດໃນໄລຍະກາງສະໄໝຂອງຄະນະພັກຮາກຖານບໍລິສັດເບຍລາວ ຍາດມາໄດ້ ແລະ ຖືໂອກາດນີ້ໃຫ້ທັດສະນະທີ່ຕັ້ງໜ້າຕໍ່ບັນດາສະຫາຍ ເພື່ອເອົາໃຈໃສ່ສືບຕໍ່ເພີ່ມທະວີ ແລະ ຍົກສູງວຽກງານຄວາມຮັບຜິດ ຊອບໃຫ້ສູງຂຶ້ນ ແລະ ເນັ້ນຕື່ມວ່າ: 1. ສືບຕໍ່ນໍາພາ-ຊີ້ນໍາວຽກງານການເມືອງ-ແນວຄິດໃຫ້ມີຄວາມສະຫງົບ ແລະ ມີຄວາມສະຖຽນລະພາບ, 2. ດໍາເນີນທຸລະກິດໃຫ້ສອດຄ່ອງ ແລະ ຖືກຕ້ອງຕາມ ລະບຽບ-ກົດໝາຍ ແລະ ມີການມອບພັນທະງົບປະມານຢ່າງຕໍ່ເນື່ອງ, 3. ປົກປ້ອງພະນັກງານ-ກໍາມະກອນ, ສິ່ງແວດລ້ອມ, ຊັບສິນ, ຊື່ສຽງອົງກອນ ແລະ ສິດຜົນປະໂຫຍດ ຂອງຜູ້ທີ່ມີສ່ວນຮ່ວມໃນທຸລະກິດ, 4. ດໍາເນີນທຸລະກິດຕາມ 6 ແນວທາງ ເພື່ອຄວາມຍືນຍົງຂອງທຸລະກິດ ແລະ ສ້າງບໍລິສັດໃຫ້ເປັນ ບໍລິສັດທີ່ປະສົບຜົນສໍາເລັດທີ່ສຸດ, ເປັນມືອາຊີບທີ່ສຸດ ແລະ ເປັນທີ່ໜ້າສົນໃຈທີ່ສຸດ ແລະ 5. ຮັກສາມູນເຊື້ອ ແລະ ສືບຕໍ່ປະກອບສ່ວນຊ່ວຍເຫຼືອສັງຄົມ ຢ່າງເປັນປະຈໍາ.

ຕອນທ້າຍສະຫາຍຍັງຮຽກຮ້ອງໃຫ້ສະມາຊິກພັກ-ພະນັກງານ ທັງໝົດຈົ່ງນໍາເອົາເນື້ອໃນຂອງຈິດໃຈກອງປະຊຸມກາງສະໄໝໃນຄັ້ງນີ້ ໄປຈັດຕັ້ງຜັນຂະຫຍາຍໃຫ້ເກີດໝາກເກີດຜົນໃຫຍ່ຫຼວງກວ່າເກົ່າ ເປັນຕົ້ນແມ່ນທິດທາງ,ແຜນ ການ, ວິທີການແກ້ໄຂຈຸດອ່ອນ, ຂໍ້ຄົງຄ້າງ ຂອງການນໍາພາລວມຂອງຄະນະພັກຮາກຖານ, ບຸກຄົນໃນຄະນະພັກຮາກຖານ ແຕ່ລະສະຫາຍ ໃຫ້ມີອັນປ່ຽນແປງໃໝ່ ແລະ ແກ້ໄຂໃຫ້ສໍາເລັດ.

ຂ່າວ-ພາບ: ໄພວັນ ໂຄດວັນທາ ສູນສະຖິຕິ ແລະ ຂໍ້ມູນຈໍຂ່າວສານ