ຕອນບ່າຍ ເວລາ 14 : 00 ໂມງ ຂອງວັນທີ 11 ກໍລະກົດ 2023 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າພົບປະ ຂອງ ທ່ານ HAGIUDA Koichi (ຮາກິອູດະ ໂຄອິຈິ) ປະທານຄະນະກຳມາທິການຄົ້ນຄວ້ານະໂຍບາຍ ພັກເສລີປະຊາທິປະໄຕ ຍີປຸ່ນ (ອາດີດລັດຖະມົນຕີເສດຖະກິດ, ການຄ້າ ແລະ ອຸດສາຫະກຳຍີ່ປຸ່ນ) ພ້ອມຄະນະ, ມີຜູ້ຕາງໜ້າຈາກສອງຝ່າຍເຂົ້າຮ່ວມ ຈໍານວນປະມານ 29 ທ່ານ.
ໃນໂອກາດພົບປະຄັ້ງນີ້ ທ່ານລັດຖະມົນຕີ ກະຊວງ ອຄ ໄດ້ສະແດງຄວາມຍິນດີຕ້ອນຮັບ ແລະ ຂອບໃຈ, ໂດຍສະເພາະລັດຖະບານປະເທດຍີ່ປຸ່ນ ກໍ່ຄືປະຊາຊົນຍີ່ປຸ່ນ ທີ່ໄດ້ໃຫ້ການສະໜັບສະໜູນ ແລະ ຮ່ວມມືກັບ ສປປ ລາວ ຊຶ່ງທ່ານໄດ້ສະເໜີ 3 ບັນຫາໃນການປຶກສາຫາລືກັບຝ່າຍຍີ່ປຸ່ນຄື: 1/ ການເພີ່ມທະວີການຮ່ວມມືເສດຖະກິດ ອຸດສາຫະກໍາ ການຄ້າ ແລະ ການສົ່ງເສີມການລົງທຶນ ຢູ່ລາວ ໄລຍະຜ່ານມາ ນັກລົງທຶນຍີ່ປຸ່ນໄດ້ມາລົງທຶນ ໃນເຂດເສດຖະກິດພິເສດຕ່າງໆ ເປັນຕົ້ນ ສະຫວັນເຊໂນ, ເຂດກວມລວມ, VITA Park, ປາກເຊ-ຍີ່ປຸ່ນ ຂໍໃຫ້ສຶກສາເບິ່ງທ່າແຮງຂອງລາວໃນການໂຄສະນາດຶງດູດການລົງທຶນຂອງນັກລົງທຶນຍີ່ປຸ່ນໃຫ້ຫຼາຍຂຶ້ນ ໂດຍການເພີ່ມທຶນຕິດພັນກັບການຄ້າ ຊຸກຍູ້ການຜະລິດໂດຍສະເພາະອຸດສາຫະກໍາປຸງແຕ່ງ; 2/ ການຮ່ວມມືຂອບພາກພື້ນ, ຂອບສອງຝ່າຍ, ຫຼາຍຝ່າຍເປັນຕົ້ນ ອາຊຽນ-ຍີ່ປຸ່ນ, ແມ່ນໍ້າຂອງ-ຍີ່ປຸ່ນ ຊຶ່ງໄລຍະຜ່ານມາກອງປະຊຸມອາຊຽນ ທີ່ຈັດຢູ່ປະເທດກໍາປູເຈຍ ທາງຝ່າຍຍີ່ປຸ່ນມີນະໂຍບາຍຕໍ່ອາຊຽນ ໃນການພັດທະນາຟື້ນຟູເສດຖະກິດຫຼັງໂຄວິດ-19, ເສດຖະກິດໝູນວຽນໃນການພັດທະນາຫຼຸດຜ່ອນອາຍກາດໂບນິກ, ການຫັນເປັນດິຈິຕອນສົ່ງເສີມ SMEs, ການຮັບປະກັນດ້ານສະບຽງອາຫານ, ສົ່ງເສີມການພັດທະນາພະລັງງານໃໝ່, ນະໂຍບາຍການສົ່ງເສີມອາຊຽນ ແລະ ຫວັງຢ່າງຍິ່ງທາງຍີ່ປຸ່ນຈະຊຸກຍູ້ສົ່ງເສີມ ສປປ ລາວໃນການພັດທະນາຂົງເຂດດັ່ງກ່າວ, ຊຶ່ງຜ່ານມາກໍມີບໍລິສັດຍີ່ປຸ່ນມາສຶກສາຄວາມເປັນໄປໄດ້ໃນການພັດທະນາພະລັງງານໄຣໂດເຈນ ຢູ່ລາວ ນີ້ຈະເປັນພະລັງງານໜຶ່ງໃນອານະຄົດ ທີ່ປ່ຽນຈາກພະລັງງານນໍ້າຈາກເຂື່ອນໄຟຟ້າ; 3/ ສິ່ງສໍາຄັນຕໍ່ການພັດທະນາຂອງລາວ ຄືການຖອດຖອນບົດຮຽນ, ຄໍາຄິດເຫັນ, ຄໍາແນະນໍາທີ່ດີເດັ່ນຈາກປະເທດຍີ່ປຸ່ນ ເປັນຕົ້ນ 1. ການສຶກສາ ໂດຍການພັດທະນາຊັບພະຍາກອນມະນຸດ 2. ການຫັນເປັນອຸດສາຫະກໍາ ແລະ ທັນສະໄໝ 3. ການຮັບເອົາສິ່ງໃໝ່ ແລະ ປະຍຸກໃຊ້ 4. ພາກລັດ-ພາກທຸລະກິດຮ່ວມມືກັນພັດທະນາ 5. ການສົ່ງເສີມຄົນເກັ່ງ, ຄົນດີ; ສິ່ງເຫຼົ່ານີ້ສາມາດນໍາມາໝູນໃຊ້ໃນລາວ ທັງເປັນການຊ່ວຍເຫຼືອລາວພັດທະນາດ້ວຍຕົນເອງ ຕົວຢ່າງ: ຄໍາບູຮານລາວເຄີຍເວົ້າວ່າ: ເອົາປາໃຫ້ຊາວນາກິນ 3 ມື້ກໍໝົດ ຖ້າສາມາດສອນໃຫ້ເຂົາເຈົ້າຕຶກປາ, ລ້ຽງປາດ້ວຍຕົນເອງກໍ່ຈະເປັນການລ້ຽງຊີບໄປໄດ້ຕະຫຼອດຊີວິດ. ພ້ອມດຽວກັນນີ້, ທ່ານ HAGIUDA Koichi ໄດ້ປຶກສາຫາລື ແລະ ແລກປ່ຽນຄໍາຄິດເຫັນ ກ່ຽວກັບການຮ່ວມມືສອງຝ່າຍ ລາວ-ຍີ່ປຸ່ນ ໃນການພັດທະນາເສດຖະກິດ, ອຸດສາຫະກຳ ແລະ ການຄ້າ ເພື່ອເປັນການສະເຫລີມສະຫລອງການສ້າງຕັ້ງສາຍພົວພັນ ແລະ ການຮ່ວມມື ອາຊຽນ-ຍີ່ປຸ່ນ ຄົບ ຮອບ 50 ປີ; ການຮ່ວມມື ໃນການເຂົ້າຮ່ວມງານວາງສະແດງໂລກ 2025 (World Expo 2025) ຢູ່ເມືອງ ໂອຊະກາ ເພື່ອສະເຫລີມສະຫລອງການສ້າງຕັ້ງສາຍພົວພັນການທູດ ລາວ-ຍີ່ປຸ່ນ ຄົບຮອບ 70 ໃນ ປີ 2025 ແລະ ບັນຫາອື່ນໆທີ່ກ່ຽວຂ້ອງ ເພື່ອໃຫ້ເກີດຜົນປະໂຫຍດທີ່ດີ ໃຫ້ແກ່ສອງປະເທດ. ນອກຈາກນີ້, ທ່ານ HAGIUDA Koichi ກໍ່ສະແດງຄວາມຂອບໃຈຕໍ່ທ່ານ ລັດຖະມົນຕີ ກະຊວງ ອຄ ທີ່ໄດ້ປະກອບຄໍາຄິດເຫັນອັນມີຄ່າ ໃນການພົບປະຄັ້ງນີ້ ແລະ ໃຫ້ການຕ້ອນຮັບດ້ວຍໄມຕີຈິດມິດຕະພາບ; ສອງປະເທດຈະສືບຕໍ່ການສະໜັບສະໜູນ, ແລກປ່ຽນຂໍ້ມູນຂ່າວສານຊຶ່ງກັນ ແລະ ກັນ ແລະ ການຍົກລະດັບຄວາມຮ່ວມມືໃຫ້ສູງຂຶ້ນ ເພື່ອເສີມຂະຫຍາຍການຄ້າ ແລະ ການລົງທຶນໃຫ້ນັບມື້ນັບດີຂຶ້ນ.
ຕອນທ້າຍ ທ່ານລັດຖະມົນຕີ ໄດ້ສະແດງຄວາມຂອບໃຈ ຕໍ່ທ່ານ HAGIUDA Koichi ຕ່ໍການສະໜັບສະໜູນ ຂອງຍີ່ປຸ່ນໃນການເປັນປະທານອາຊຽນຂອງລາວປີ 2024, ການພົບປະແລກປ່ຽນຄວາມຮູ້ ແລະ ໃຫ້ຄວາມຄິດເຫັນຫຼາຍອັນທີ່ເປັນປະໂຫຍດ ພ້ອມທັງອວຍພອນໄຊ ໃຫ້ທ່ານພ້ອມຄະນະ ປະສົບຜົນສໍາເລັດໃນການເຄື່ອນໄຫວວຽກງານ ຢູ່ສປປ ລາວ ແລະ ຈົ່ງມີສຸຂະພາບແຂງແຮງ.
ພາບ-ຂ່າວ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
