ໃນວັນທີ 27 ກໍລະກົດ 2023, ທີ່ກະຊວງ ອຄ, ກອງປະຊຸມ ຄົບຄະນະກາງສະໄຫມ ຂອງຄະນະບໍລິຫານງານພັກ ກະຊວງ ອຄ ສະໄໝທີ V ໂດຍການໃຫ້ກຽດເຂົ້າຮ່ວມເປັນປະທານຂອງ ສະຫາຍ ປອ. ໄຊສົມພອນ ພົມວິຫານ, ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ແລະ ສະຫາຍ ມະໄລທອງ ກົມມະສິດ, ກໍາມະການສໍາຮອງສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງ ອຄ, ພ້ອມທັງ, ຮອງເລຂາຄະນະພັກ, ຄະນະປະຈໍາພັກ, ກໍາມະການພັກກະຊວງ, ຄະນະບໍລິຫານງານພັກກະຊວງ, ຄະນະໜ່ວຍພັກຫ້ອງການ, ກົມ, ສະຖາບັນ ແລະ ບັນດາໜ່ວຍພັກລັດວິສາຫະກິດ, 3 ອົງການຈັດຕັ້ງມະຫາຊົນ ແລະ ພະນັກງານ ຂັ້ນຫົວໜ້າພະແນກ ເຂົ້າຮ່ວມ.

ໃນໂອກາດນີ້ ສະຫາຍ ມະໄລທອງ ກົມມະສິດ ກໍາມະການສໍາຮອງສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີ ກະຊວງ ອຄ ໄດ້ລາຍງານຜົນຂອງກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ກະຊວງ ອຄ ສະໄຫມທີ V, ໄດ້ດໍາເນີນພາຍໃຕ້ການຊີ້ນໍາ ແລະ ເປັນປະທານ ຂອງ ສະຫາຍ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງ ຊາດ, ເຊິ່ງກອງປະຊຸມໄດ້ດໍາເນີນຕາມ 3 ວາລະໃຫຍ່ຄື: 1). ການທາບທາມຄວາມໄວ້ວາງໃຈ ຕໍ່ການນໍາພາລວມ ແລະ ບຸກຄົນຄະນະບໍລິຫານງານພັກ ກະຊວງອຸດສາຫະກໍາ ແລະ ການຄ້າ ໂດຍໄດ້ຮັບຟັງການເຜີຍແຜ່ແນະນໍາ ຄໍາສັ່ງ ເລກທີ 268/ຄລສພ, ມາດຕະຖານຂອງພະນັກງານນໍາພາ-ຄຸ້ມຄອງ, ມາດຕະຖານສະເພາະຫນ້າທີ່ຮັບຜິດຊອບ ຂອງຄະນະບໍລິຫານງານພັກ ກະຊວງ-ອົງການ, ຂໍ້ຫ້າມສໍາລັບສະມາຊິກພັກ ຈາກສະຫາຍ ທອງຈັນ ໂຂງພູມຄໍຳ ກຳມະການປະຈໍາພັກ, ຮອງຫົວໜ້າຄະນະຈັດຕັ້ງສູນກາງພັກ ແລະ ການແນະນໍາລະບຽບການ, ບາດກ້າວຂັ້ນຕອນການທາບທາມ ຈາກສະຫາຍ ວັນຄໍາ ໄຊວົງສັກ ຫົວໜ້າກົມຄົ້ນຄວ້າ ແລະ ວາລະສານ ຄະນະກວດກາສູນກາງພັກ. 2). ກອງປະຊຸມເປີດກວ້າງຄົບຄະນະກາງສະໄຫມ ຂອງຄະນະບໍລິຫານງານພັກ ກະຊວງ ອຄ ໄດ້ຮັບຟັງການຜ່ານຮ່າງບົດສະຫຼຸບຕີລາຄາການນໍາພາຈັດຕັ້ງປະຕິບັດມະຕິກອງປະຊຸມໃຫ່ຍ ຄັ້ງທີ V ຂອງອົງຄະນະພັກ ກະຊວງ ອຸດສາຫະກໍາ ແລະ ການຄ້າ ຕິດພັນກັບ ການຈັດຕັ້ງປະຕິບັດມະຕິກອງປະ ຊຸມໃຫ່ຍຜູ້ແທນທົ່ວປະເທດ ຄັ້ງທີ XI ຂອງພັກ ໄລຍະກາງສະໄຫມ ແລະ ທິດທາງແຜນການຕໍ່ຫນ້າ; ພ້ອມນີ້, ກໍ່ໄດ້ຮັບຟັງການຜ່ານ ຮ່າງບົດສະຫຼຸບການຈັດຕັ້ງປະຕິບັດແຜນພັດທະນາອຸດສາຫະກໍາປຸງແຕ່ງ ແລະ ການຄ້າ ຕິດພັັນກັບການ ຈັດຕັ້ງປະຕິບັດ ແລະ 02 ວາລະແຫ່ງຊາດ ຂອງຂະແໜງ ອຄ ແລະ ທິດທາງແຕ່ປັດຈຸບັນ ເຖິງປີ 2025; 3). ກອງປະຊຸມດໍາເນີນຊີວິດການເມືອງ ພາຍໃນຄະນະພັກບໍລິຫານງານພັກກະຊວງ. ໂດຍໄດ້ຮັບຟັງການຜ່ານຮ່າງບົດສໍາຫຼວດການນໍາພາລວມຂອງຄະນະບໍລິຫານງານພັກກະຊວງ ອຄ ໄລຍະກາງສະໄໝ ແລະ ກໍານົດວິທີການແກ້ໄຂໃນຕໍ່ໜ້າ.

ໃນໂອກາດການເຂົາຮ່ວມກອງປະຊຸມ ສະຫາຍ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ໄດ້ຕີລາຄາສູງຕໍ່ກອງປະຊຸມຄັ້ງນີ້ ພາຍໃຕ້ຄໍາຂວັນ “ຍົກສູງຄວາມສາມາດການນໍາພາຂອງພັກ ໃນການພັດທະນາອຸດສາຫະກໍາປຸງແຕ່ງ ແລະ ການຄ້າ” ໃຫ້ທັນສະໄໝກ້າວໄປສູ່ເສດຖະກິດ ດີຈີຕອນ, ສີຂຽວ ແລະ ຍືນຍົງ, ອັນພົ້ນເດັ່ນແມ່ນແມ່ນ ຂະແໜງ ອຄ ໄດ້ຮັບການຍົກລະດັບການເຄື່ອນໄຫວວຽກງານດີຂື້ນກວ່າເກົ່າ, ການພັດ ທະນາກໍໄດ້ຂະຫຍາຍຕົວດ້ວຍຈັງວະທີ່ດີ ແລະ ໄວສົມຄວນ ຊຶ່ງສະແດງອອກບາງດ້ານພົ້ນເດັ່ນຄື: ໄດ້ມີການແບ່ງຄວາມຮັບຜິດຊອບຢ່າງຈະແຈ້ງໃນການປະຕິບັດແຜນພັດທະນາອຸດສາຫະກໍາປຸງແຕ່ງ ແລະ ການຄ້າ  ກໍຄືແຜນຈັດຕັ້ງປະຕິບັດວຽກບູລິມະສິດ ແລະ ວຽກສໍາຄັນ ລະອຽດສົມຄວນ; ວຽກພັກ-ພະນັກງານ ໄດ້ຮັບການປັບປຸງໃຫ້້ໜັກແໜ້ນ; ໄດ້ສ້າງແລະ ປັບປຸງນະໂຍບາຍ, ຍຸດທະສາດ ແລະນິຕິກໍາຫລາຍສະບັບ; ການຜະລິດອຸດສາຫະກໍາປຸງແຕ່ງ ແລະ ຫັດຖະກໍາບັນລຸປະມານ 32 ພັນລ້ານກວ່າຕື້ກີບ ທຽບໃສ່ໄລຍະດຽວກັນ ເພີ່ມຂື້ນ 19%, ມູນຄ່າການຈໍລະຈອນສິນຄ້າ (ຂາຍຍົກ-ຂາຍຍ່ອຍ ແລະ ຄ່າບໍລິການສ້ອມແປງ) ບັນລຸປະມານ 171 ພັນກວ່າຕື້ກີບ ທຽບໃສ່ໄລຍະດຽວກັນ ເພີ່ມຂື້ນ 17%, ມູນຄ່າການຄ້າຕ່າງປະເທດ ບັນລຸ 36 ຕື້ກວ່າໂດລາ ທຽບໃສ່ໄລຍະດຽວກັນ ເພີ່ມຂື້ນກວ່າ 32.85%, ວຽການວິຊາສະເພາະກໍໄດ້ເອົາໃຈໃສ່ຕັ້ງໜ້າປະຕິບັດວຽກງານໂດຍສຸມໃສ່ 5 ແຜນງານ.

ຕອນທ້າຍສະຫາຍປະທານໄດ້ເນັ້ນຕື່ມວ່າ ເພື່ອໃຫ້ບັນດາສະຫາຍກໍາແໜ້ນ ແລະ ສືບຕໍ່ເອົາໃຈໃສ່ຍົກສູງວຽກງານສຶກສາອົບຮົບການເມືອ-ແນວຄິດ ໃຫ້ແກ່ພະນັກງານ-ສະມາຊິກພັກ; ເພີ່ມທະວີການນໍາພາ-ຊີ້ນໍາ ຂອງຄະນະພັກເພື່ອສ້າງການຫັນປ່ຽນທີ່ແຂງແຮງ, ເລິກເຊິ່ງ ໃນວຽກງານພະນັກງານ; ກໍານົດມາດຕະການແກ້ໄຂພະຍາດອາດຍາສິດ, ປະກົດການຫຍໍ້ທໍ້ ໃຫ້ເຂັ້ມງວດ ແລະ ເດັດຂາດ; ສືບຕໍ່ຊຸກຍູ້ຂະແໜງສາຍຕັ້ງຂັ້ນທ້ອງຖິ່ນ ຕໍ່ການສັບຊ້ອນຈັດວາງບຸກຄະລະກອນ ເຂົ້າໃສ່ກົງຈັກໃໝ່ ທີ່ໄດ້ຮັບຮອງພາລະບົດບາດໄປແລ້ວ; ເອົາໃຈໃສ່ພັດທະນາພື້ນຖານໂຄງລ່າງ ແລະ ຫັນເປັນທັນສະໄໝ; ສືບຕໍ່ສ້າງຄວາມສາມາດດ້ານການແຂ່ງຂັນ ຂອງຂະແໜງອຸດສາຫະກໍາປຸງແຕ່ງ ແລະ ຫັດຖະກໍາ; ສືບຕໍ່ປະສານງານ ຮ່ວມມືກັບຂະແໜງານກ່ຽວຂ້ອງ ໃນການຊຸກຍູ່ສົ່ງເສີມການຜະລິດພາຍໃນ ໃຫ້ມີຄວາມເຂັ້ມແຂງ; ສືບຕໍ່ກໍານົດ ແລະ ສ້າງນະໂຍບາຍທີ່ເປັນບູລິມະສິດສໍາຄັນ ເພື່ອພັດທະນາຂະແໜງ ອຄ; ສືບຕໍ່ລຸກທະລຸຢ່າງແຂງແຮງ ແລະ ຕໍ່ເນື່ອງເພື່ອແກ້ໄຂຂັ້ນຂອດ, ລະບຽບການຄຸ້ມຄອງຂອງລັດ; ສືບຕໍ່ຍູ້ແຮງການຈັດຕັ້ປະຕິບັດ 2 ວາລະແຫ່ງຊາດ; ເອົາໃຈ ໃສ່ເພີ່ມທະວີການພົວພັນຮ່ວມມືກັບຕ່າງປະເທດ; ຕໍ່ກັບຜົນຂອງການທາບທາມ ແລະ ການສໍາຫຼວດການນໍາພາ ກ່ອນ ອຶ່ນໝົດຕ້ອງຮັບຮູ້ ແລະ ເຂົ້າໃຈເປັນເອກະພາບສູງຕໍ່ຜົນດັ່ງກ່າວ; ແລະ ຄະນະພັກກະຊວງ ແລະບັນດາຮາກຖານພັກ ຕ້ອງເພີ່ມທະວີວຽກງານຕິດຕາມກວດກາພັກ, ກວດກາລັດ, ສະກັດກັ້ນ ແລະ ຕ້ອງການສໍ້ລາດບັງຫຼວງໃຫ້ເປັນປົກກະຕິ ແລະ ແທດເຖິງ. ສະຫາຍປະທານເຊື່ອໝັ້ນວ່າ ບັນດາສະຫາຍຈະສືບຕໍ່ພ້ອມກັນບຸກບືນ, ສູ້ຊົນຈັດຕັ້ງປະຕິບັດບັນດາຄາດໝາຍທີ່ວາງໄວ້ ໃນເຄິ່ງສະໄໝທີ່ຍັງເຫຼືອໃນການບັນລຸຄາດໝາຍ ຫຼື ລື່ນຄາດໝາຍ ທີ່ໄດ້ກໍານົດໄວ້, ກອງປະຊຸມໄດ້ປິດລົງໃນວັນດຽວກັນມີຜົນສໍາເລັດຢ່າງສະຫງ່າງາມ.

ຂ່າວ-ພາບ: ໄພວັນ ໂຄດວັນທາ, ສູນສະຖິຕິ ແລະ ຂໍ້ມູນຂ່າວສານ, ອຄ