ຕອນເຊົ້າ ເວລາ 10: 30 ໂມງ ຂອງວັນທີ 7 ສິງຫາ 2023 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ, ທ່ານ ມະໄລທອງ ກົມມະສິດ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການ ເຂົ້າຢ້ຽມຂໍ່ານັບອໍາລາຂອງ ທ່ານ ດຣ. Peter Haymond, ເອກອັກຄະລັດຖະທູດຜູ້ມີອໍານາດແຫ່ງສະຫະລັດອາເມລິກາພ້ອມດ້ວຍຄະນະມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 10 ກວ່າທ່ານ.
ໂອກາດນີ້ ທ່ານ ມະໄລທອງ ກົມມະສິດ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍ້ອງຍໍຊົມເຊີຍຕໍ່ ທ່ານ ດຣ. Peter Haymond, ທີ່ໄດ້ມາຮັບໜ້າດຳລົງຕຳແໜ່ງເປັນເອກອັກຄະລັດຖະທູດໃຫ້ແກ່ສອງປະເທດ ລາວ-ອາເມລິກາ ໃນໄລຍະຜ່ານມາ ທ່ານ ກໍ່ມີຜົນງານທີ່ດີເດັ່ນໃນການສ້າງສາຍພົວພັນຮ່ວມມືທີ່ດີນັບມື້ນັບແໜ້ນແຟ້ນຍິ່ງຂຶ້ນຫຼາຍດ້ານ ແລະ ຕີລາຄາສູງຕໍ່ຜົນງານຫຼາຍດ້ານໃຫ້ແກ່ ສປປ ລາວ ເປັນຕົ້ນ ບັນດາໂຄງການຕ່າງໆທີ່ປິ່ນອ້ອມດ້ານການສຶກສາ, ສາທາລະນາສຸກ, ຢາປ້ອງກັນຕ້ານໂຄວິດໃຫ້ແກ່ລາວ ແລະ ການຮ່ວມມືທາງດ້ານການຄ້າ ການລົງທຶນໃຫ້ແກ່ເສດຖະກິດຂອງລາວ, ນອກນັ້ນຍັງເປັນຄູ່ຄ້າຮ່ວມກັນສິນຄ້າການນຳເຂົ້າ-ສົ່ງອອກໃນຕໍ່ໜ້າໃຫ້ມີການຮ່ວມມືທາງດ້ານການຄ້າຫຼາຍຂຶ້ນ, ທັງສອງຝ່າຍສືບຕໍ່ສະເໜີຮ່ວມມືວຽກງານໃນຕໍ່ໜ້າແກ້ໄຂຂໍ້ຄົງຄ້າງໃຫ້ດີຂຶ້ນກວ່າເກົ່າ.
ທ່ານ ດຣ. Peter Haymond, ໄດ້ກ່າວວ່າ: ຂ້າພະເຈົ້າຮູ້ສຶກພູມໃຈທີ່ໄດ້ດໍາລົງຕໍາແໜ່ງເປັນ ເອກອັກຄະລັດຖະທູດຜູ້ມີອໍານາດເຕັມແຫ່ງ ສະຫະລັດ ອາເມລິກາ ປະຈໍາ ສປປ ລາວ ແລະ ກໍ່ສະແດງຄວາມຂອບໃຈມາຍັງທ່ານລັດຖະມົນຕີ ໃນໄລຍະທີ່ດຳລົງຕຳແໜ່ງເປັນເອກອັກຄະລັດຖະທູດຢູ່ ສປປ ລາວ ໃນໄລຍະຜ່ານມາກະຊວງກະຄືລັດຖະບານຂອງ ສປປ ລາວ ທີ່ອໍານວຍຄວາມສະດວກໃຫ້ແກ່ຂ້າພະເຈົ້າ.
ຕອນທ້າຍ ທ່ານ ລັດຖະມົນຕີ ຍັງອວຍພອນໃຫ້ທ່ານທູດຈົ່ງເດີນທາງກັບຄືນປະເທດດ້ວຍຄວາມສະຫວັດດີພາບ ແລະ ສົ່ງເສີມສາຍພົວພັນ ແລະ ການຮ່ວມມື ລະຫວ່າງ ສອງປະເທດໃຫ້ດີຂຶ້ນໃນຕໍ່ໜ້າ.
ພາບ-ຂ່າວ: ໄພຄໍາອີ ສູນສະຖິຕິ ແລະ ຂໍ້ມູນຂ່າວສານ ກະຊວງ ອຄ.
