ໃນວັນທີ 14 ສິງຫາ 2023, ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມຄະນະຊີ້ນໍາຂັ້ນວິຊາການ ແລະ ກອງປະຊຸມເຜີຍແຜ່ການຈັດຕັ້ງປະຕິບັດທຶນສົມທົບ ເພື່ອສົ່ງເສີມທຸລະກິດ ໄລຍະ 2 (BAF II) ຂຶ້ນທີ່ໂຮງແຮມລາວພລາຊາ, ນະຄອນຫຼວງວຽງຈັນ, ສປປ ລາວ. ກອງປະຊຸມໃນພາກທີໜຶ່ງແມ່ນເພື່ອທົບທວນການຈັດຕັ້ງປະຕິບັດທຶນສົມທົບ BAF II ທີ່ຜ່ານມາ ແລະ ແລກປ່ຽນບົດຮຽນ ເພື່ອວາງແຜນບູລິມະສິດໃນອະນາຄົດ. ສ່ວນກອງປະຊຸມໃນພາກທີສອງແມ່ນການລາຍງານຜົນປະເມິນໄລຍະກາງຂອງທຶນສົມ ທົບເພື່ອສົ່ງເສີມທຸລະກິດ ໄລຍະ 2 (BAF II) ໂດຍບໍລິສັດທີ່ປຶກສາ EMC ແລະ ໄດ້ມີການແລກປ່ຽນຄໍາຄິດເຫັນຂອງຜູ້ໄດ້ຮັບທຶນສົມທົບ BAF II ແລະ ຜູ້ສະໜອງການບໍລິການທາງດ້ານວິຊາການໃຫ້ແກ່ຜູ້ໄດ້ຮັບທຶນ BAF II ທີ່ມີຕໍ່ການຈັດຕັ້ງປະຕິບັດທຶນສົມທົບໂດຍລວມ.
ກອງປະຊຸມດັ່ງກ່າວ ໂດຍການເປັນປະທານຂອງ ທ່ານ ແສງພະນົມຈອນ ອິນທະສານ, ຮອງຫົວໜ້າກົມແຜນການ ແລະ ການຮ່ວມມື, ກະຊວງອຸດສາຫະກໍາ ແລະ ການຄ້າ. ກອງປະຊຸມດັ່ງກ່າວໄດ້ໃຫ້ກຽດເຂົ້າຮ່ວມໂດຍບັນດາຜູ້ຕາງໜ້າຈາກບັນດາກົມ ພາຍໃຕ້ກະຊວງອຸດສາຫະກໍາ ແລະ ການຄ້າ, NIU, ທີມງານ ທຶນສົມທົບ BAF II ແລະ ຕາງໜ້າຈາກບໍລິສັດທີ່ຮັບທຶນສົມທົບ BAF II ແລະ ບໍລິສັດສະໜອງການບໍລິການ ລວມທັງໝົດ 50 ທ່ານ.
ໃນລະຫວ່າງກອງປະຊຸມ, ຜູ້ເຂົ້າຮ່ວມກອງປະຊຸມໄດ້ຮັບຟັງການນໍາສະເໜີ ແລະ ແລກປ່ຽນຄໍາຄິດເຫັນກ່ຽວກັບຜົນສໍາເລັດ ເຊິ່ງປັດຈຸບັນລັດຖະບານໄດ້ສໍາເລັດອະນຸມັດທຶນສົມທົບ ຈໍານວນ 466 ທືນ ແລະ ເບີກຈ່າຍໃຫ້ແກ່ທຸລະກິດ ຈໍານວນ 358 ທຶນ, ສິ່ງທ້າທາຍ ແລະ ແຜນບູລິມະສິດໃນການຈັດຕັ້ງປະຕິບັດທຶນສົມທົບ BAF II. ໃນວາລະທີ 2 ທາງບໍລິສັດທີ່ປຶກສາອີເອັມຊີໄດ້ລາຍງານຜົນປະເມິນໄລຍະກາງຂອງທຶນສົມທົບ ເຊິ່ງຜົນໂດຍລວມແມ່ນບໍລິສັດທີ່ໄດ້ຮັບທຶນສະໜັບສະໜູນຈາກ BAF II ມີການເຕີບໂຕໄວກວ່າ ແລະ ມີລາຍຮັບເພີ່ມຂື້ນຫຼາຍກວ່າປະມານ 25-30% ຕໍ່ປີ ເມືອທຽບກັບບໍລິສັດລັກສະນະດຽວກັນທີ່ບໍ່ໄດ້ຮັບທຶນສົມທົບ. ນອກຈາກນີ້, ຍັງໄດ້ໃຫ້ໂອກາດແກ່ບໍລິສັດທີ່ໄດ້ຮັບທຶນສົມທົບ BAF II ແລະ ບໍລິສັດທີ່ສະໜອງການບໍລິການ ໄດ້ແລກປ່ຽນກ່ຽວກັບປະສົບການຕໍ່ກັບການຈັດຕັ້ງປະຕິບັດວຽກງານທຶນສົມທົບ BAF II
ສຸດທ້າຍນີ້, ທ່ານ ແສງພະນົມຈອນ ອິນທະສານ, ຮອງຫົວໜ້າກົມແຜນການ ແລະ ການຮ່ວມມື, ໄດ້ ສະແດງຄວາມຂອບໃຈມາຍັງບັນດາຜູ້ເຂົ້າຮ່ວມ ແລະ ບໍລິສັດທີ່ເປັນຜູ້ຕັ້ງໜ້າປະກອບສ່ວນເຂົ້າໃນກອງປະຊຸມດັ່ງກ່າວ ແລະ ເຫັນດີເປັນເອກະພາບຕໍ່ກັບຄວາມຄຶບໜ້າການຈັດຕັ້ງປະຕິບັດໂຄງການ ພ້ອມດ້ວຍຜົນຂອງການປະເມີນໄລຍະກາງທຶນສົມທົບ BAF II ທີ່ທາງບໍລິສັດທີ່ປຶກສາ EMCໄດ້ລາຍງານຕໍ່ທີ່ປະຊຸມ.
ກອງປະຊຸມດັ່ງກ່າວໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (LCT), ເຊິ່ງເປັນໂຄງການທີ່ໄດ້ຮັບການປະກອບທຶນຮ່ວມເຂົ້າກອງທຶນສົບທົບຫຼາຍຝ່າຍໂດຍທະນາຄານໂລກ, ລັດຖະບານອົດສະຕຣາລີ, ລັດຖະບານ ໄອແລນ ແລະ ລັດຖະບານ ອາເມຣິກາ, ເຊິ່ງເປົ້າໝາຍຫຼັກແມ່ນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ຂະຫຍາຍຕົວຂອງທຸລະກິດໂດຍການປັບປຸງສະພາບແວດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນຂອງພາກທຸລະກິດ.
ແຫຼ່ງຂໍ້ມູນຂ່າວ-ພາບ: NIU
ໂພດໂດຍ: ໄພວັນ ໂຄດວັນທາ
