ກົມການຄ້າຕ່າງປະເທດ ກະຊວງອຸດສາຫະກຳ ແລະ ການຄ້າ (ອຄ) ໄດ້ຈັດພິທີເປີດໂຕ ເວັບໄຊທ໌ສູນຂໍ້ມູນຂ່າວສານທາງດ້ານການຄ້າ ຂອງ ສປປ ລາວ ລຸ້ນທີ 3, ໃນວັນທີ 20 ທັນວາ 2023 ທີ່ໂຮງແຮມຄາວພາຊ້າ ໂດຍການເຂົ້າຮ່ວມຂອງທ່ານ ບຸນເຖິງ ດວງສະຫວັນ ຮອງລັດຖະມົນຕີກະຊວງ ອຄ, ມີບັນດາທ່ານ ຈາກພາກລັດ, ອົງການຈັດຕັ້ງສາກົນ ແລະ ພາກທຸລະກິດເຂົ້າຮ່ວມ.
ທ່ານ ບຸນເຖິງ ດວງສະຫວັນ ໄດ້ກ່າວວ່າ: ເວັບໄຊທ໌ສູນຂໍ້ມູນຂ່າວສານທາງດ້ານການຄ້າ ຂອງ ສປປ ລາວ ຫຼືLao PDR Trade Portal (LTP) ໄດ້ຖືກສ້າງຂຶ້ນ ແລະ ນໍາໃຊ້ນັບແຕ່ວັນທີ 22 ມິຖຸນາ 2012 ເປັນຕົ້ນມາ ໂດຍໄດ້ຮັບການສະໜັບສະໜູນຂອງໂຄງການພັດທະນາການຄ້າ ໄລຍະທີ 1 (TDF 1) ເຊິ່ງມາຮອດປັດຈຸບັນແມ່ນໄດ້ 11 ປີກວ່າແລ້ວ ແລະ ໃນເດືອນມິຖຸນາ 2022 ໄດ້ມີການສະຫຼອງຄົບຮອບ 10 ປີ ຂອງເວັບໄຊທ໌ດັັ່ງກ່າວ ເຊິ່ງ LTPໄດ້ກາຍເປັນແຫຼ່ງຂໍ້ມູນຂ່າວສານທາງດ້ານການຄ້າ ຜ່ານລະບົບອອນລາຍ ທີີ່ເປັນສູນລວມໃນການສະໜອງຂໍ້ມູນຂ່າວສານ, ບົດຄວາມ, ກົດໝາຍ, ລະບຽບການ, ຂັັ້ນຕອນ, ແບບຟອມ, ສະຖິຕິ ແລະ ຄ່າພັນທະຕ່າງໆ ທີີ່ຕິດພັນກັບການນໍາເຂົ້າ – ສົ່ງອອກ, ການເຄື່ອນຍ້າຍ, ຜ່ານແດນ ແລະ ການຂົນສົ່ງ ສິນຄ້າ ຂອງ ສປປ ລາວ.
ທ່ານກ່າວວ່າ: ຈຸດປະສົງເພື່ອໃຫ້ພາກລັດ, ຜູ້ປະກອບການ, ນັກຄົ້ນຄວ້າ, ຄູອາຈານ, ນັກສຶກສາ, ອົງການຈັດຕັັ້ງສາກົນ ແລະ ສັງຄົມ ສາມາດເຂົ້າເຖິງ ແລະ ຄົ້ນຫາຂໍ້ມູນຂ່າວສານທາງດ້ານການຄ້າໄດ້ຢ່າງມີປະສິດທິພາບ ແລະ ປະສິດທິຜົນ, ວ່ອງໄວ-ທັນໃຈ ປະກອບເຂົ້າໃນວຽກງານຂອງຕົນ, ເປັນການສົ່ງເສີມການນໍາໃຊ້ເຕັກໂນໂລຊີດິຈິຕອນ ຕາມນະໂຍບາຍຂອງລັດຖະບານຂອງ ສປປ ລາວ ແລະ ທັງເປັນການປະຕິບັດພັນທະຂອງ ສປປ ລາວ ຕໍ່ພາກພື້ນ ແລະ ສາກົນ
ການພັດທະນາເວັບໄຊທ໌ LTP ເປັນລຸ້ນໃໝ່ ຫຼື ລຸ້ນທີ 3 ແມ່ນນອນໃນວຽກງານຈຸດສຸມປີ 2023 ຂອງຄະນະກໍາມະການອໍານວຍຄວາມສະດວກທາງດ້ານການຄ້າ ແລະ ການຂົນສົ່ງເພື່ອໂຄສະນາ ແລະ ເຜີຍແຜ່ຂໍ້ມູນຂ່າວສານທາງດ້ານການຄ້າໃຫ້ມີຄວາມໂປ່ງໃສ ແລະ ວ່ອງໄວ. ການພັດທະນາເວັບໄຊທ໌ ດັັ່ງກ່າວ ໄດ້ລິເລີີ່ມມາແຕ່ເດືອນ ມິຖຸນາ 2023 ໂດຍໄດ້ຮັບການສະໜູນຂອງທະນາຄານໂລກ ແລະໃນມື້ນີ້ຖືເປັນການເປີດນໍາໃຊ້ເປັນທາງການ.
ເພື່ອເຮັດໃຫ້ສູນຂໍ້ມູນຂ່າວສານທາງດ້ານການຄ້າຂອງ ສປປ ລາວ ດຶງດູດການນໍາໃຊ້ແລະ ສ້າງຄວາມໜ້າເຊື່ອຖືໃຫ້ແກ່ຜູ້ຊົມໃຊ້ ຫຼາຍຂຶ້ນ, ກົມການຄ້າຕ່າງປະເທດ ຈະຕ້ອງໄດ້ມີການຄຸ້ມຄອງເວັບໄຊທ໌ດັັ່ງກ່າວ ໃຫ້ມີຄວາມປອດໄພ ແລະ ຄວາມສະຖຽນທາງດ້ານເຕັກນິກເຊັ່ນ ເຂົ້າເບິ່ງໄດ້ທຸກເວລາ ແລະ ທົ່ວໂລກ ຖ້າມີບັນຫາ ຕ້ອງໄດ້ປັບປຸງໂດຍໄວທີ່ສຸດ ພ້ອມດຽວກັນ, ແມ່ນສ້າງກົນໄກປະສານສົມທົບກັບພາກສ່ວນທີີ່ກ່ຽວຂ້ອງ ເພື່ອເອົາຂໍ້ມູນຂ່າວສານຕ່າງໆລົງເວັບໄຊທ໌ດັັ່ງກ່າວ ໃຫ້ເປັນປົກກະຕິ ທັງພາສາລາວ ແລະ ພາສາອັງກິດ ເຊິ່ງບໍ່ສະເພາະແຕ່ຂໍ້ມູນຂ່າວສານຂອງຂະແໜງອຸດສາຫະກໍາ ແລະ ການຄ້າ ເທົ່ານັັ້ນ, ແຕ່ຕ້ອງມີຂໍ້ມູນຂ່າວສານຂອງພາກສ່ວນທີີ່ກ່ຽວຂ້ອງ ນໍາເພາະເວັບໄຊທ໌ດັັ່ງກ່າວ ແມ່ນ ຈຸດບໍລິການຂໍ້ມູນຂ່າວສານທາງດ້ານການຄ້າໃຫ້ແກ່ສັງຄົມ ແບບປະຕູດຽວ. ສິີ່ງສໍາຄັນ, ຕ້ອງໄດ້ສ້າງ ແລະ ພັດທະນາບຸກຄະລາກອນທີີ່ຮັບຜິດຊອບ ເພື່ອຄຸ້ມຄອງເວັບໄຊທ໌ໃຫ້ມີຄວາມຍືນຍົງ ແລະ ສາມາດນໍາໃຊ້ໄປອີກຫຼາຍໆສິບປີຂ້າງໜ້າ.
ທ່ານ ນາງ ມະນີວອນ ວົງໄຊ ຫົວໜ້າກົມການຄ້າຕ່າງປະເທດໄດ້ກ່າວວ່າ: ການນໍາໃຊ້ ເວັບໄຊທ໌ LTP ກົມການຄ້າຕ່າງປະເທດ ໄດ້ອັບໂຫລດບັນດາຂໍ້ມູນຂ່າວສານ, ປະກາດ, ລາຍການສິນຄ້າ, ນິຕິກໍາ, ແບບຟອມ, ຂັ້ນຕອນ, ມາດຕະການ, ອັດຕາພາສີ ແລະ ຂໍ້ມູນຂ່າວສານຕ່າງໆທີ່ຕິດພັນກັບການນໍາເຂົ້າ -ສົ່ງອອກ, ການຜ່ານແດນ, ການເຄື່ອນຍ້າຍສິນຄ້າ ຢ່າງເປັນປົກະຕິ ນັບແຕ່ເດືອນມິຖຸນາ 2012 ມາຮອດເດືອນກັນຍາ 2023 ໄດ້ອັບໂຫລດຂໍ້ມູນ ບັນດານິຕິກໍາ ຕ່າງໆ ທີ່ຕິດພັນກັບການຄ້າ ຈໍານວນທັງໝົດ 901 ສະບັບ, ໃນນັ້ນແຈ້ງການ 306 ສະບັບ, ຂໍ້ຕົກລົງ 233 ສະບັບ, ຄຳແນະນຳ 147 ສະບັບ, ກົດໝາຍ 73 ສະບັບ, ດຳລັດ 52 ສະບັບ, ຄຳສັ່ງ 49 ສະບັບ, ລັດຖະບັນຍັດ 5 ສະບັບ ແລະ ອື່ນໆຕາມລໍາດັບ.
ສະຖິຕິການນໍາໃຊ້ ເຫັນວ່າ: ນັບແຕ່ປີ 2012-2022, ຈໍານວນການນໍາໃຊ້ເວັບໄຊທ໌ (Sessions) ມີທັງໝົດ 739,473 ຄັ້ງ, ຜູ້ຊົມໃຊ້ (Users) ຈໍານວນ 357,864 ຜູ້ຊົມໃຊ້, ການເຂົ້າຊົມ (Hits) ມີ 3,959,109 ຄັ້ງ. ເຊິ່ງເວັບໄຊທ໌ LTP ລຸ້ນທີ 3 ມີໂສມໜ້າເວັບໄຊທ໌ ມີຄວາມສະໄໝ ແລະ ສະບາຍຕາ, ມີຂໍ້ມູນຫຼາກຫຼາຍ ແລະ ອັນພົ້ນເດັ່ນແມ່ນການຄົ້ນຫາຂໍ້ມູນ ທີີ່ມີຄວາມສະດວກວ່ອງໄວ ແລະ ແນ່ນອນຫຼາຍຂຶ້ນກວ່າທີ່ຜ່ານໆມາ ເພື່ອໃຫ້ທັນກັບເຕັກໂນໂລຊີດິຈິຕອນໃນປັດຈຸບັນ.
ຂ່າວ-ພາບ: ໄພວັນ ໂຄດວັນທາ ຂ່າວສານ ອຄ
