ໃນຕອນເຊົ້າຂອງວັນທີ 29 ທັນວາ 2023 ໄດ້ຮັບຂໍ້ມູນຈາກພົນລະເມືອງດີ ວ່າມີການຂົນ, ຂ່ຽນຖ່າຍເຄື່ອງຂອງຈາກລົດບັນທຸກ 22 ລໍ້ ໃສ່ລົດກະບະ ແຕ່ເຊົ້າມືດ ທີ່ສົງໃສວ່າມີການລະເມີດ ຢູ່ເດີ່ນດິນເປົ່າວ່າງ ຮ່ອມ 2 ເຂດບ້ານ ໂຊກຄຳ ເມືອງໄຊເສດຖາ ນະຄອນຫຼວງວຽງຈັນ.
ຄະນະກວດກາ ແລະ ແກ້ໄຂການຄ້າສິນຄ້ານອກລະບົບ ກະຊວງອຸດສາຫະກໍາ ແລະ ການຄ້າ ຈິ່ງໄດ້ຊີ້ນໍາໃຫ້ຄະນະເຈົ້າໜ້າທີ່ກວດກາການຄ້າ, ກົມແຂ່ງຂັນທາງທຸລະກິດ ແລະ ກວດກາການຄ້າ ລົງກວດກາສະພາບຕົວຈິງ ພົບເຫັນມີສິນຄ້າເທິງລົດບັນທຸກເຄື່ອງ ຂະໜາດ 22 ລໍ້ ເປັນຜະລິດຕະພັນຊີ້ນແຊ່ແຂງ ປະກອບມີຊີ້ນງົວ, ຂາໝູ ແລະ ຕີນໄກ່ ບໍ່ມີເອກະສານຕິດຕາມສິນຄ້າ. ສະນັ້ນ, ທາງຄະນະເຈົ້າໜ້າທີ່ ຈິ່ງໄດ້ຍຶດສິນຄ້າໄວ້ຊົ່ວຄາວ ແລ້ວນໍາສິນຄ້າໄປໄວ້ສາງເຢັນ ແລະ ກວດນັບຕົວຈິງ ລາຍລະອຽດດັ່ງນີ້:
- ຊີ້ນງົວຜະລິດຕະພັນ ຈາກປະເທດອິນເດຍ ກາ black gold ແກັດຂະໜາດ 25 ກິໂລກຣາມ ຈຳນວນ 20 ແກັດ ເທົ່າກັບ 500 ກິໂລກຣາມ.
- ຊີ້ນງົວຜະລິດຕະພັນ ຈາກປະເທດອິນເດຍ ກາ black gold ແກັດຂະໜາດ 20 ກິໂລກຣາມ ຈຳນວນ 85 ແກັດ ເທົ່າກັບ 1,700 ກິໂລກຣາມ.
- ຊີ້ນງົວ ກາ Green Bull ແກັດຂະໜາດ 20 ກິໂລກຣາມ ຈຳນວນ 5 ແກັດ ເທົ່າກັບ 100 ກິໂລກຣາມ.
- ຂາໝູ ຜະລິດຕະພັນຈາກ ປະເທດເບຊິນ ແກັດຂະໜາດ 18-20 ກິໂລກຣາມ ຈຳນວນ 25 ແກັດ ເທົ່າກັບ 459 ກິໂລກຣາມ.
- ຕີນໄກ່ ຜະລິດຕະພັນ CP ຈາກປະເທດຫວຽດນາມ ແກັດຂະໜາດ 15 ກິໂລກຣາມ ຈຳນວນ 595 ແກັດ ເທົ່າກັບ 8,925 ກິໂລກຣາມ.
ສິນຄ້າລວມທັງໝົດມີ 730 ແກັດ ນ້ຳໜັກລວມ 11,684 ກິໂລກຣາມ (ຕາມສິ່ງຫຸ້ມຫໍ່) ຍັງບໍ່ໄດ້ປະເມີນມູນຄ່າ.
ດັ່ງນັ້ນ, ຄະນະເຈົ້າໜ້າທີ່ກວດກາການຄ້າ ຈິ່ງໄດ້ຍຶດສິນຄ້າຈຳນວນດັ່ງກ່າວໄວ້ຊົ່ວຄາວ ໂດຍໄດ້ນຳໄປຝາກໄວ້ທີ່ສາງເຢັນ ແລະ ໄດ້ເຮັດບົດບັນທຶກກວດກາ ກັບຜູ້ຮັບເໝົາຂົນສົ່ງເຄື່ອງດັ່ງກ່າວ ພ້ອມທັງລະບຸໃຫ້ຂຶ້ນມາແກ້ໄຂຄະດີ ຕາມລະບຽບການພາຍໃນ 3 ວັນລັດຖະການ ນັບແຕ່ມື້ລົງກວດກາເປັນຕົ້ນໄປ.
ສິນຄ້າຈໍານວນດັ່ງກ່າວ ເປັນສິນຄ້າທີ່ລັກລອບນໍາເຂົ້າມາແບບນອກລະບົບ, ບໍ່ຜ່ານການຢັ້ງຢືນດ້ານສຸຂະອານາໄມສັດ ແລະ ມີການຂົນສົ່ງທີ່ບໍ່ຖືກຕ້ອງຫຼັກການສຸຂະອານາໄມ ທີ່ຂະແໜງການກ່ຽວຂ້ອງກຳນົດ.
ຮຽກຮ້ອງມາຍັງທົ່ວສັງຄົມເພື່ອເປັນຫູເປັນຕາຊ່ວຍພະນັກງານ, ເຈົ້າໜ້າທີ່ພວກເຮົາ ໃນການປາບປາມການຄ້າສິນຄ້ານອກລະບົບ ເພື່ອປະກອບສ່ວນຊ່ວຍສ້າງສາພັດທະນາປະເທດຊາດ. (ຖ້າພົບເຫັນສາມາດແຈ້ງສາຍດ່ວນປົກປ້ອງຜູ້ຊົມໃຊ້ 1510).
ຂ່າວ-ພາບ: ໄພວັນ ໂຄດວັນທາ ຂ່າວສານ ອຄ
