ໃນຕອນເຊົ້າເວລາ 9: 30 ໂມງ ຂອງວັນທີ 26 ກຸມພາ 2024, ທີ່ຫ້ອງຮັບແຂກໃຫຍ່ ຊັ້ນ 04 ກະຊວງອຸດສາຫະກໍາ ແລະ ການຄ້າ, ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ຫວັງ ໂຢໂປ ຮອງເລຂາພັກແຂວງ, ເຈົ້າແຂວງຢູນນານ ສປ ຈີນ. ໃນໂອກາດເຂົ້າພົບປະປຶກສາຫາລື ກັບ ທ່ານ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ຂອງ ລາວ ມີຜູ້ຕາງໜ້າເຂົ້າຮ່ວມ ຫົວໜ້າກົມ ຮອງຫົວໜ້າກົມ ຫົວໜ້າພະແນກອ້ອມຂ້າງກະຊວງ ເຂົ້າຮ່ວມທັງສອງຝ່າຍ ປະມານ 25 ກວ່າທ່ານ.
ໂອກາດນີ້ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ສະແດງຄວາມຍ້ອງຍໍຊົມເຊີຍຕໍ່ ທ່ານ ຫວັງ ໂຢໂປ ຮອງເລຂາພັກແຂວງ, ເຈົ້າແຂວງຢູນນານ ສປ ຈີນ. ໃນໂອກາດເຂົ້າຢ້ຽມຂໍ່ານັບຄັ້ງນີ້ ເຊິ່ງ ທ່ານ ເຈົ້າແຂວງ ໄດ້ສົນທະນາທົບທວນຄືນກ່ຽວກັບວຽກງານການຮ່ວມມື ການພົວພັນດ້ານການຄ້າ, ການລົງທຶນ ລະຫວ່າງ ສປປ ລາວ-ແຂວງຢູນານ ສປ ຈີນ. ກ່ອນອື່ນຂໍສະແດງຄວາມຊົມເຊີຍຕໍ່ກຸ່ມບໍລິສັດ ກໍ່ສ້າງລົງທຶນຢູນນານ ແມ່ນກໍາລັງແຮງທີ່ສໍາຄັນຂອງການຮ່ວມມືດ້ານເສດຖະກິດການຄ້າລະຫວ່າງລາວ-ຢູນນານ, ຊ່ວຍ ສປປ ລາວ ເຂົ້າໃນການຫັນເປັນອຸດສາຫະກໍາທັນທີ່ທັນສະໄໝ. ປະຈຸບັນນີ້, ສປປ ລາວ ກໍ່ຄື ກະຊວງອຸດສາຫະກຳ ແລະ ການຄ້າ ກຳລັງສຸມໃສ່ກະກຽມຄວາມພ້ອມໃນດ້ານຕ່າງໆເພື່ອກະກຽມເປັນປະທານ ອາຊຽນ ໃນປີ 2024, ດ້ວຍເຫດນີ້ ຈິ່ງສະເໜີມາຍັງທ່ານເພື່ອສະໜັບສະໜູນ ແລະ ຊ່ວຍເຫລືອທາງດ້ານວິຊາການ ເປັນຕົ້ນແມ່ນ ການສ້າງແຜນຍຸດທະສາດພັດທະນາ ແລະ ຄຸ້ມຄອງການຄ້າເອເລັກໂຕຼນິກ, ການສົ່ງເສີມວຽກງານ Circula economy ແລະ ການສະໜັບສະໜູນສ້າງຫ້ອງປະຊຸມທາງໄກ ພ້ອມທັງລະບົບ ແລະ ອຸປະກອນຮັບໃຊ້ຄົບຊຸດ.
ໃນຄັ້ງວັນທີ 3 ເມສາ 2023, ພວກເຮົາໄດ້ເຮັດໜັງສືສະບັບເລກທີ 0865/ຫອຄ ກ່ຽວກັບການສະເໜີໄປທັດສະນະສຶກສາ ແລະ ຖອດຖອນບົດຮຽນ ຢູ່ ສປ ຈີນ (ວຽກງານຄຸ້ມຄອງການນໍາເຂົ້າ ແລະ ສົ່ງອອກສິນຄ້າ, ການນໍາເຂົ້າ ແລະ ສົ່ງອອກຊົ່ວຄາວ, ການຄ້າຜ່ານແດນ, ການຄ້າຊາຍແດນ, ການຂົນສົ່ງຜ່ານທາງລົດໄຟລາວ-ຈີນ ກັບພະແນກການຄ້າ ແຂວງ ຢູນນານ), ແຕ່ພວກເຮົາບໍ່ໄດ້ຮັບເອກະສານການຕອບຮັບຈາກ ຝ່າຍ ຈີນ. ສະນັ້ນຢາກສະເຫນີຝ່າຍຈີນ ຊ່ວຍສືບຕໍ່ພິຈາລະນາໃຫ້ການສະຫນັບສະຫນູນກິດຈະກຳດັ່ງກ່າວດ້ວຍ.
ສະເຫນີໃຫ້ສອງຝ່າຍຊຸກຍູ້ລັດຖະບານຂອງຕົນ ໃນການຮ່ວມກັນສຶກສາຄວາມເປັນໄປໄດ້ ໃນການສ້າງສັນຍາວ່າດ້ວຍສິນຄ້າຜ່ານແດນລະຫວ່າງ ລາວ-ຈີນ ເພື່ອຄວາມເປັນເອກະພາບໃນການຈັດຕັ້ງປະຕິບັດການຄຸ້ມຄອງສິນຄ້າຜ່ານແດນຂອງສອງປະເທດ ແລະ ເປັນບ່ອນອີງອັນໜັກ ແໜ້ນໃຫ້ແກ່ການຈັດຕັ້ງຜັນຫຍາຍວຽກງານດັ່ງກ່າວໃນໄລຍະຍາວ.
ຄຽງຄູ່ກັນນັ້້ນກໍ່ສືກສາໃນການສ້າງ ອະນຸສັນຍາກ່ຽວກັບການຄຸ້ມຄອງສິນຄ້າຜ່ານແດນຜ່ານທາງລົດໄຟລະຫວ່າງ ລາວ-ຈີນ ສະເພາະ ເພື່ອກໍານົດລະບຽບ, ກົນໄກການຄຸ້ມຄອງ, ຂອບເຂດການຮ່ວມມື ແລະ ອື່ນໆ ແນໃສ່ໃຫ້ເປັນບ່ອນອີງພື້ນຖານການຜ່ານແດນຂອງສິນຄ້າຜ່ານທາງລົດໄຟ. ລວມທັງການເກັບຄ່າທໍານຽມ, ຄ່າບໍລິການ, ການປະກອບເອກະສານ ແລະ ອື່ນໆ ເພື່ອເປັນບ່ອນອີງໃຫ້ພາກລັດ ແລະ ພາກເອກະຊົນທັງພາຍໃນ ແລະ ຕ່າງປະເທດ ຈັດຕັ້ງປະຕິບັດໃຫ້ເປັນເອກະພາບ. ການຄ້າຂາຍຕາມຊາຍແດນ ລາວ-ຈີນ ກໍ່ມີການເຕີມໃຫຍ່ຂະຫຍາຍຕົວຫລາຍສົມຄວນ ແລະ ມີນະໂຍບາຍສົ່ງເສີມການຄ້າຊາຍແດນທີ່ເອື້ອຍອຳນວຍ. ສະນັ້ນ, ຈຶ່ງສະເໜີຂໍການຊ່ວຍເຫຼືອ ແລະ ສະໜັບສະໜູນໃນການຄົ້ນຄ້ວາ ເພື່ອສ້າງແຜນແມ່ບົດພັດທະນາການຄ້າຊາຍແດນ ພ້ອມທັງ ສະເໜີຂໍການສະໜັບສະໜູນເພື່ອໄປຖອດຖອນບົດຮຽນຕໍ່ກັບວຽກງານການຄຸ້ມຄອງ ແລະ ສົ່ງເສີມການຄ້າຊາຍແດນ, ການສ້າງກົນໄກການປະສານງານ ແລະ ຮ່ວມມື ລະຫວ່າງ ລາວ ແລະ ແຂວງ ຢຸນນານ. ການອຳນວຍຄວາມສະດວກການສົ່ງອອກສິນຄ້າກະສິກຳ ໂດຍສະເພາະໂກຕ້າບັນດາສິນຄ້າກະສິກຳ ແລະ ລາຍການສິນຄ້າທີ່ທາງລາວສາມາດສົ່ງອອກໄປຈີນໄດ້ ເຊັ່ນ: ຢາງພາລາ, ຫມາກຖົ່ວ, ຫມາກສາລີ ແລະ ອື່ນໆ.
ສະເໜີຂໍການສະໜັບສະໜູນຈາກ ແຂວງຢູນນານ ເພື່ອໃຫ້ຄະນະວິຊາການຂອງກະຊວງ ອຄ ໄດ້ໄປຖອດຖອນບົດຮຽນ ໃນວຽກງານຄຸ້ມຄອງການນຳເຂົ້າ ແລະ ສົ່ງອອກ ໂດຍສະເພາະວິທີການເກັບກຳໂຕເລກສະຖິຕິການຄ້າ, ການຄຸ້ມຄອງລາຍຮັບຈາກ ການສົ່ງອອກ, ການຢັ້ງຢືນແຫລ່ງກຳເນີດສິນຄ້າ.
ສະເໜີຂໍການສະໜັບສະໜູນ ໃນວຽກງານການສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ໃນການສ້າງຄວາມເຂັ້ມແຂງ, ປັບປຸງຜະລິດຕະພາບ ແລະ ຄຸນນະພາບໃນຂະບວນການຜະລິດ ໃຫ້ກຸ່ມຜູ້ຜະລິດສິນຄ້າ ເພື່ອໃຫ້ເຂົ້າເຖິງບັນດາແຫລ່ງທຶນ ແລະ ຕະຫລາດ ຂອງ ສປ ຈີນ.
ການຊຸກຍູ້ ແລະ ສົ່ງເສີມການຈັດຕັ້ງປະຕິບັດບົດບັນທຶກຄວາມເຂົ້າໃຈ ວ່າດ້ວຍການຄ້າເອເລັກໂຕນິກ ໂດຍສະເພາະ ການສົ່ງເສີມສິນຄ້າທີ່ມີຄຸນນະພາບສູງ, ການສົ່ງເສີມ SME ແລະ ການພັດທະນາລະບົບ Ecommerce platform, ການພັດທະນາລົດຂົນສົ່ງ ແລະ Logistics, ການແລກປ່ຽນຂໍ້ມູນຂ່າວສານ ດ້ານນິຕິກຳ, ກົດໝາຍ ແລະ ລະບຽບການຕ່າງໆ.
ສະເໜີຂໍທຶນຝຶກອົບຮົມໃຫ້ພະນັກງານໃນທີ່ຮັບຜີດຊອບວຽກງານການແຂ່ງຂັນທາງທຸລະກິດ, ກວດກາການຄ້າ ແລະ ປົກປ້ອງຜູ້ຊົມໃຊ້ໃຫ້ເຂັ້ມແຂງ ແລະ ດ້ານອື່ນໆ.
ທ້າຍນີ້ ທ່ານ ລັດຖະມົນຕີ ຕາງໜ້າໃຫ້ກະຊວງອຸດສາຫະກໍາ ແລະ ການຄ້າ ແລະ ຄະນະນໍາກະຊວງ ອວຍພອນໄຊໃຫ້ທ່ານເຈົ້າແຂວງພ້ອມດ້ວຍຄະນະຈົ່ງມີສຸຂະພາບແຂງແຮງກັບຄືນປະເທດດ້ວຍຄວາມສະຫວັດດີພາບ.
ພາບ-ຂ່າວ: ໄພຄໍາອີ ສູນສະຖິຕິ ແລະ ຂ່າວສານ, ຫ້ອງການກະຊວງ ອຄ.
