ກົມມາດຕະຖານ ແລະ ວັດແທກ, ກະຊວງອຸດສາຫະກຳ ແລະ ການຄ້າ ໃນນາມຮັບຜິດຊອບອົງການມາດຕະຖານແຫ່ງຊາດ ແລະ ທັງເປັນຄະນະກຳມະການທີ່ປຶກສາດ້ານມາດຕະຖານ ແລະ ຄຸນນະພາບອາຊຽນ (ACCSQ) ໄດ້ເປັນເຈົ້າພາບຈັດກອງປະຊຸມຄະນະກຳມະການໜ່ວຍງານວິຊາການດ້ານການຄຸ້ມຄອງຜະລິດຕະພັນວັດສະດຸການກໍ່ສ້າງ ແລະ ຕຶກອາຄານ ອາຊຽນ ຄັ້ງທີ 10 ຫຼື the 10^th Meeting of Members of the Building and Construction Working Group (BCWG) ຂື້ນໃນລະຫວ່າງວັນທີ 02 – 03 ພຶດສະພາ 2024 ທີ່ ໂຮງແຮມ ລາວພລາຊາ, ນະຄອນຫຼວງວຽງຈັນ.

ໃຫ້ກຽດການເປັນປະທານກ່າວເປີດກອງປະຊຸມໂດຍ ທ່ານ ນາງ ລັດດາວັນ ສີວົງໄຊ ຫົວໜ້າພະແນກມາດຕະຖານ, ກົມມາດຕະຖານ ແລະ ວັດແທກ, ກະຊວງອຸດສາຫະກຳ ແລະ ການຄ້າ, ກອງປະຊຸມໃນຄັ້ງນີ້ ມີບັນດາຄະນະຜູ້ແທນຈາກບັນດາປະເທດສະມາຊິກອາຊຽນ, ກອງເລຂາອາຊຽນ ແລະ ຜູ້ຕາງໜ້າຈາກພາກລັດ ແລະ ເອກະຊົນ ທີ່ກ່ຽວຂ້ອງເຂົ້າຮ່ວມ. ກອງປະຊຸມໄດ້ດໍາເນີນໂດຍການເປັນປະທານຂອງ ທ່ານ ນາງ  Maricel A. Reduca, ຫົວໜ້າ​ຜູ້​ຊ່ຽວຊານ​ດ້ານ​ການ​ຄ້າ ​ແລະ ພັດທະນາ​ອຸດສາຫະກຳ, ສຳນັກງານ​ມາດຕະຖານ​ຟີ​ລິບ​ປິນ, ກົມ​ການ​ຄ້າ ​ແລະ ອຸດສາຫະກຳ ປະເທດ ​ຟີ​ລິບ​ປິນ ແລະ ຮອງປະທານໂດຍ ທ່ານ ນາງ Pattaraporn Krongyuth,  ວິຊາການ​ມາດຕະຖານ​ວິຊາ​ຊີບ​, ສະ​ຖາ​ບັນ​ມາດຕະຖານ​ອຸດສາຫະກຳ​ ປະ​ເທດ​ໄທ. ຈຸດປະສົງຂອງກອງປະຊຸມຈັດຂຶ້ນຄັ້ງນີ້ແມ່ນສືບຕໍ່ຄົ້ນຄວ້າ ແລະ ປຶກສາຫາລືທົບທວນແກ້ໄຂຫຼາຍບັນຫາທີ່ຍັງຄົງຄ້າງໃນກອງປະຊຸມຄັ້ງທີ 9 ທີ່ຜ່ານມາ ແລະ ແຜນການຈັດຕັ້ງປະຕິບັດໃນຕໍ່ໜ້າ.

ໃນກອງປະຊຸມ BCWG ໄດ້ລາຍງານຄວາມຄືບໜ້າການພັດທະນາມາດຕະຖານ ແລະ ການປະເມີນຄວາມສອດຄ່ອງໃນອາຊຽນ ໂດຍຍົກໃຫ້ເຫັນຜົນໄດ້ຮັບຈາກລັດຖະມົນຕີເສດຖະກິດອາວຸໂສ ຂອງກອງປະຊຸມ ຄະນະລັດຖະມົນຕີເສດຖະກິດອາຊຽນ AEM ແລະ ຄະນະກຳມະການທີ່ປຶກສາດ້ານວຽກງານມາດຕະຖານ ແລະ ຄຸນນະພາບອາຊຽນ (ACCSQ). ຊຶ່ງມີຫຼາຍບັນຫາ ແລະ ສິ່ງທ້າທາຍທີ່ໄດ້ປະຕິບັດສຳເລັດ ແລະ ບາງບັນຫາຕ້ອງໄດ້ສືບຕໍ່ແກ້ໄຂຂໍ້ຄົງຄ້າງໃຫ້ເປັນເອກະພາບກັນໃນຄັ້ງຕໍ່ໄປ. ພ້ອມນີ້, ຜູ້ຕາງໜ້າຈາກບັນດາສະມາຊິກອາຊຽນ​ໄດ້​ປຶກສາ​ຫາລື ​ແລະ ຕົກລົງກໍານົດຂົງເຂດມາດຕະຖານທີ່ມີທ່າແຮງສໍາລັບການເຊື່ອມໂຍງກັນໃນສັນຍາຂໍ້ຕົກລົງຮັບຮູ້ຮ່ວມກັນ ສໍາລັບວັດສະດຸກໍ່ສ້າງ ແລະ ຕຶກອາຄານ (MRA BCM) ຊຶ່ງໄດ້ຍົກເອົາຜົນການສຶກສາກ່ຽວກັບມາດຕະຖານລະດັບພາກພື້ນ ແລະ ສາກົນ (ISO) ລວມມີບັນດາຜະລິດຕະພັນດັ່ງຕໍ່ໄປນີ້:​ ຜະລິດຕະພັນແກ້ວ ໃນວຽກງານກໍ່ສ້າງ; ກະເບື້ອງເຊລາມິກ/ກະເບື້ອງຫີນທຳມະຊາດ ແລະ ຫີນທຽມ (Ceramic tiles/natural and artificial stone tiles); ເຫຼັກໂຄງສ້າງ Scaffolding (ຮ້ານນັ່ງໃນການກໍ່ສ້າງ); ເຄື່ອງສຸຂະພັນ ເຊລາມິກ Ceramic sanitary wares; ທໍ່ເຫຼັກ (Steel pipe).

ໃນ ໂອກາດນີ້, ທ່ານ ນາງ ລັດດາວັນ ສີວົງໄຊ ໄດ້ກ່າວສະແດງຄວາມຍິນດີ ຕ້ອນຮັບບັນດາຄະນະຜູ້ແທນຢ່າງອົບອຸ່ນ ແລະ ໄດ້ແຈ້ງໃຫ້ຊາບກ່ຽວກັບສະພາບການພັດທະນາ ແລະ ການຄຸ້ມຄອງມາດຕະຖານດ້ານວັດສະດຸການກໍ່ສ້າງ ແລະ ຕຶກອາຄານ ໃນ ສປປ ລາວ. ພ້ອມທັງສະແດງຄວາມຂອບໃຈຕໍ່ການໃຫ້ການສະໜັບສະໜູນຂອງບັນດາປະເທດສະມາຊິກອາຊຽນ ເຊິ່ງຈະເຮັດໃຫ້ການເປັນເຈົ້າພາບ ແລະ ເປັັນປະທານອາຊຽນ ຂອງ ສປປ ລາວ ປີ 2024 ປະສົບຜົນສໍາເລັດຕາມຄາດໝາຍທີ່ວາງໄວ້.

ຂ່າວ-ພາບ: ໄພວັນ ສູນສະຖິຕິ ແລະ ຂໍ້ມູນຂ່າວສານ ຫອຄ