ໃນຕອນເຊົ້າເວລາ 10:30 ໂມງ ຂອງວັນທີ 28 ພຶດສະພາ 2024, ທີ່ຫ້ອງຮັບແຂກໃຫຍ່ ຊັ້ນ 04 ກະຊວງອຸດສາຫະກໍາ ແລະ ການຄ້າ, ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ Liew Chin Tong, ຮອງລັດຖະມົນຕີ ກະຊວງລົງທຶນ, ການຄ້າ ແລະ ອຸດສາຫະກຳ ມະເລເຊຍ ໃນໂອກາດເຂົ້າພົບປະປຶກສາຫາລືທົບທວນຄືນການຮ່ວມມືພົວພັນດ້ານການຄ້າ-ການລົງທຶນຢູ່ ສປປ ລາວ; ມີຜູ້ເຂົ້າຮ່ວມຫົວໜ້າຫ້ອງການ, ຫົວໜ້າກົມ, ຮອງຫົວໜ້າກົມ ຫົວໜ້າພະແນກ ກ່ຽວຂ້ອງອ້ອມຂ້າງກະຊວງ ທັງສອງຝ່າຍເຂົ້າຮ່ວມປະມານ 18 ທ່ານ.
ໂອກາດນີ້ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ສະແດງຄວາມຍ້ອງຍໍຊົມເຊີຍຕໍ່ ທ່ານ Liew Chin Tong, ຮອງລັດຖະມົນຕີ ກະຊວງລົງທຶນ, ການຄ້າ ແລະ ອຸດສາຫະກຳ ມະເລເຊຍ, ໃນໂອກາດໄດ້ເຂົ້າມາພົບປະແລກປ່ຽນບົດຮຽນ ເຊິ່ງ ທ່ານ ຮອງລັດຖະມົນຕີ ມະເລເຊຍ ໄດ້ສົນທະນາກ່ຽວກັບວຽກງານການຮ່ວມມື ລະຫວ່າງ ສປປ ລາວ-ມະເລເຊຍ
ເພື່ອປຶກສາຫາລື ແຜນຮ່ວມມືທີ່ມະເລເຊຍຈະສະໜັບສະໜູນ ສປປ ລາວ ໃນວຽກງານມາດຕະຖານ ໂດຍຜ່ານ ສະຖາບັນຄົ້ນຄວ້າມາດຕະຖານ ແລະ ອຸດສາຫະກຳ ຂອງ ມາເລເຊຍ, (the Standard and Industrial Research Institute of Malaysia/SIRIM Berhad ).
ແຜນການຮ່ວມມື ດ້ານມາດຕະຖານ ພາຍໃຕ້ຂອບການຮ່ວມມື ອາຊຽນ ລະຫວ່າງ ສປປ ລາວ ແລະ ສະຖານບັນ SIRIM Berhad ເປັນຕົ້ນ ຂອບເຂດກິດຈະກຳການຮ່ວມມື ແລະ ຊ່ວຍເຫລືອ, ກົນໄກການຮ່ວມມື, ການສະໜັບສະໜູນດ້ານງົບປະມານ, ການສ້າງຈຸດປະສານງານດ້ານວິຊາການ ແລະ ອື່ນໆ (ແຜນດັ່ງກ່າວທາງມາເລເຊຍ ກຳລັງຮ່າງ ແລະ ບໍ່ທັນໄດ້ຮັບຮ່າງດັ່ງກ່າວ).
- ວຽກງານບາງກິດຈະກຳທີ່ມີຄວາມສົນໃຈຢາກຮ່ວມມືກັບ ສະຖາບັນຂອງ ມະເລເຊຍ ເປັນຕົ້ນ:
- ການສ້າງແຜນຍຸດທະສາດການຮ່ວມມື ເພື່ອສ້າງຄວາມເຂັ້ມແຂງ ແລະ ອຳນວຍຄວາມສະດວກໃຫ້ແກ່ວຽກງານມາດຕະຖານ ແລະ ວັດແທກ;
- ຄົ້ນຄວ້າຄວາມເປັນໄປໄດ້ໃນການສ້າງບົດບັນທຶກຄວາມເຂົ້າໃນ ເພື່ອກຳນົດຂອບການຮ່ວມມື ດ້ານມາດຕະຖານ ແລະ ວັດແທກ ໂດຍສຸມໃສ່ ການຮ່ວມມືດ້ານວິຊາການມາດຕະຖານ, ການສ້າງຄວາມອາດສາມາດ-ຍົກລະດັບວິຊາການ, ການແລກປ່ຽນຂໍ້ມູນຂ່າວສານດ້ານມາດຕະຖານອຸດສາຫະກຳ ແລະ ສ້າງກົນໄກການຮ່ວມມືດ້ານມາດຕະຖານ ລະຫວ່າງ ລາວ ແລະ ມາເລເຊຍ;
- ພັດທະນາລະບົບຖານຂໍ້ມູນດ້ານມາດຕະຖານ-ວັດແທກ ແລະ ຫັນເຂົ້າສູ່ລະບົບ ດີຈີຕອນ, ຝຶກອົບຮົມຍົກລະດັບການຄຸ້ມຄອງ ແລະ ນຳໃຊ້ຖານຂໍ້ມູນ, ທັດສະນະສຶກສາແລກປ່ຽນບົດຮຽນໃນການຄຸ້ມຄອງບໍລິຫານ ແລະ ອື່ນໆ.
- ການຄຸ້ມຄອງການກວດສອບ ແລະ ຢັ້ງຍືນຄຸນນະພາບ ແລະ ມາດຕະຖານສິນຄ້າ;
ສືບຕໍ່ຈັດຕັ້ງປະຕິບັດ ບັນຫາທີ່ໄດ້ເຫັນດີໃນກອງປະຊຸມ AEM ເພື່ອສະໜັບສະໜູນໃນການພັດທະນາວຽກງານອຸດສາຫະກຳ ແລະ ການຄ້າ ເວົ້າລວມ, ເວົ້າສະເພາະ ການພັດທະນາວຽກງານມາດຕະຖານຂອງອຸດສາຫະກຳ ພາຍໃຕ້ຂອບການຮ່ວມມື ອາຊຽນ ແລະ ຊຸກຍູ້ການເປັນປະທານອາຊຽນຂອງ ສປປ ລາວ ໃນປີ 2024.
ທ້າຍນີ້ ທ່ານ ລັດຖະມົນຕີກະໄດ້ສະແດງຄວາມຍິນດີຕໍ່ທ່ານ ຮອງລັດຖະມົນຕີ ມະເລເຊຍ, ໃນຕໍ່ໜ້າຈະໃຫ້ການຮ່ວມມື ລະຫວ່າງ ສປປ ລາວ-ມະເລເຊຍ ໃນວຽກງານຫຼາຍດ້ານ ເພື່ອໃຫ້ເກີດຜົນປະໂຫຍດສູງສຸດໃຫ້ແກ່ສອງປະເທດ.
ຂ່າວ-ພາບ: ໄພຄໍາອີ ຫ້ອງການກະຊວງ ອຄ.
