ວັນທີ 28 ພຶດສະພາ 2024, ທີ່ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມຜັນຂະຫຍາຍເນື້ອໃນຈິດໃຈຂອງກອງປະຊຸມວຽກງານກວດກາທົ່ວປະເທດປະຈຳປີ 2023, ຄາດໝາຍສູ້ຊົນ ປີ 2024 ແລະ ຕີລາຄາການຈັດຕັ້ງປະຕິບັດວຽກງານກວດກາພັກ-ລັດ ກະຊວງ ອຄ ປີ 2023 ແລະ ທິດທາງແຜນການ ປີ 2024 ໂດຍການເປັນປະທານ ຂອງ ທ່ານ ພຸດທະວັນ ນັນທະວົງ ຄະນະປະຈໍາພັກ, ປະທານຄະນະກວດກາພັກ, ຫົວໜ້າກົມກວດກາ ກະຊວງ ອຄ ມີຄະນະໝ່ວຍພັກບັນດາກົມກອງອ້ອມຂ້າງກະຊວງ, ພະແນກອຸດສາຫະກຳ ແລະ ການຄ້ານະຄອນຫຼວງ, ສະພາການຄ້າ ແລະ ອຸດສາຫະກຳແຫ່ງຊາດລາວ, ບັນດາລັດວິສາຫະກິດ ແລະ ບໍລິສັດ ທີ່ຂຶ້ນກັບກະຊວງ ແລະ ພະນັກງານກ່ຽວຂ້ອງເຂົ້າຮ່ວມ.

ເພື່ອຜັນຂະຫຍາຍຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ກໍ່ຄື ມະຕິກອງປະຊຸມວຽກງານກວດກາທົ່ວປະເທດຄັ້ງທີ IV, ປີ 2023 ເປັນປີທີ II ຂອງການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI  ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX, ກໍ່ຄືການຈັດຕັ້ງປະຕິບັດ 2 ວາລະແຫ່ງຊາດ ບັນດາອົງການຈັດຕັ້ງພັກ-ລັດ ຂອງຂະແໜງອຸດສາຫະກຳ ແລະ ການຄ້າ ສູນກາງຮອດທ້ອງຖິ່ນ ໄດ້ເປັນເຈົ້າການຜັນຂະຫຍາຍ ຈັດຕັ້ງປະຕິບັດເນື້ອໃນຈິດໃຈມະຕິ XI, ແຜນພັດທະນາເສດຖະກິດ-ສັງຄົມແຫ່ງຊາດ, ແຜນພັດທະນາອຸດສາຫະກຳປຸງແຕ່ງ ແລະ ການຄ້າ, 2 ວາລະແຫ່ງຊາດທີ່ຕິດພັນກັບຂະແໜງອຸດສາຫະກຳ ແລະ ການຄ້າ ດ້ວຍຄວາມຮັບຜິດຊອບສູງ ເຮັດໃຫ້ວຽກງານຂອງຂະແໜງການ ອຄ ຢູ່ສູນກາງ ແລະ ທ້ອງຖິ່ນໄດ້ຮັບຜົນສຳເລັດ ທີ່ພົ້ນເດັ່ນໃນຫຼາຍດ້ານ ອັນໄດ້ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ-ສັງຄົມ ແລະ ການຮັກສາສະຖຽນລະພາບທາງດ້ານເສດຖະກິດມະຫາພາກຂອງປະເທດເຮົາ.

ສຳລັບວຽກງານກວດກາ ຂອງພວກເຮົາໃນໜຶ່ງປີຜ່ານມາ ຄະນະພັກ, ຄະນະນຳກໍ່ຄືຄະນະກວດກາແຕ່ລະຂັ້ນຂອງຂະແໜງ ອຄ ໄດ້ພ້ອມກັນຕັ້ງໜ້າບຸກບືນປະຕິບັດວຽກງານຕິດຕາມ, ກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງ ຄົ້ນຄວ້າແກ້ໄຂຄໍາຮ້ອງ-ຄຳສະເໜີ ແລະ ປັບປຸງກົງຈັກການຈັດຕັ້ງຢູ່ຂັ້ນຂອງຕົນ ມີຜົນສຳເລັດຫຼາຍດ້ານ. ກອງປະຊຸມໄດ້ພ້ອມກັນຄົ້ນຄວ້າຍົກໃຫ້ເຫັນເນື້ອໃນຈິດໃຈ ດ້ານດີ, ບົດຮຽນທີ່ຕ້ອງເສີມຂະຫຍາຍ, ຊອກໃຫ້ເຫັນດ້ານອ່ອນຂໍ້ຄົງຄ້າງ, ສາເຫດ ເພື່ອປັບປຸງແກ້ໄຂໃນຕໍ່ໜ້າ ເປັນຕົ້ນແມ່ນວຽກງານຕິດຕາມ, ກວດກາພາຍໃນພັກ, ການຄຸ້ມຄອງບໍລິຫານລັດດ້ວຍກົດໝາຍ, ສະກັດກັ້ນ ແລະ ຕ້ານການສໍ້ລາດບັງຫຼວງ, ພ້ອມນັ້ນ ຕ້ອງຄົ້ນຄວ້າປະກອບຄຳຄິດຄຳເຫັນໃຫ້ເລິກເຊິ່ງ ເພື່ອຄວາມເປັນເອກະພາບຕໍ່ທິດທາງໜ້າທີ່ ແລະ ບັນດາວຽກທີ່ຈະຕ້ອງສູມໃສ່ຈັດຕັ້ງປະຕິບັດໃນປີ 2024 ແນ່ໃສ່ເຮັດໃຫ້ວຽກງານຕິດຕາມ, ກວດກາ  ສະກັດກັ້ນ ແລະ ຕ້ານການສໍ້ລາດບາງຫຼວງທັງຢູ່ສູນກາງ ແລະ ທ້ອງຖິ່ນຂອງຂະແໜງ ອຄ ໄດ້ຮັບການຈັດຕັ້ງປະຕິບັດຢ່າງຕັ້ງໜ້າ ແລະ ມີການຫັນປ່ຽນດີຂຶ້ນ ປະກອບສ່ວນເຮັດໃຫ້ການຄຸ້ມຄອງລັດດ້ວຍກົດໝາຍມີຄວາມສັກສິດ, ການພັດທະນາເສດຖະກິດ-ສັງຄົມ ມີການຂະຫຍາຍຕົວ ບັນລຸຕາມລະດັບຄາດໝາຍທີ່ວາງໄວ້ ການກໍ່ສ້າງພັກໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ ຕິດພັນກັບການບຳລຸງກໍ່ສ້າງພະນັກງານປະເພດຕ່າງໆ ເປັນຕົ້ນພະນັກງານນຳພາ-ຄຸ້ມຄອງແຕ່ລະຂັ້ນ.

ຄາດໝາຍສູ້້ຊົນຕ້ອງຍົກລະດັບການເຄື່ອນໄຫວຂອງຄະນະກວດກາພັກ – ລັດແຕ່ລະຂັ້ນໃຫ້ມີຄຸນນະພາບໃໝ່ ພາຍໃຕ້ການນໍາພາ-ຊີ້ນຳທີ່ເປັນເອກະພາບ ແລະ ເຂັ້ມແຂງຂອງຄະນະພັກ, ຄະນະນໍາແຕ່ລະຂັ້ນສ້າງການຫັນປ່ຽນອັນຈະແຈ້ງ ແຂງແຮງໃນການຕີຖອຍ ແລະ ສະກັດກັ້ນປະກົດການຫຍໍ້ທໍ້ພາຍໃນການຈັດຕັ້ງ ແລະ ຖັນແຖວສະມາຊິກພັກ-ພະນັກງານ ໂດຍສະເພາະແມ່ນ ການແກ້ໄຂບັນຫາການສວຍໃຊ້ໜ້າທີ່ ເພື່ອສໍ້ລາດບັງຫຼວງທຸກຮູບແບບ; ຕ້ອງແກ້ໄຂແບບແຜນວິທີເຮັດວຽກ ບໍ່ວ່າຈະເປັນຮູບການ ຫຼື ວິທີການກວດກາທີ່ບໍ່ທັນລະອຽດຮອບດ້ານ, ການກວດກາແກ່ຍາວ, ກຳຂໍ້ມູນຫຼັກຖານບໍ່ຊັດເຈນ, ວິເຄາະວິໄຈບັນຫາບໍ່ເລິກເຊິ່ງ, ລັກສະນະຟ້າວຟັ່ງ, ສະຫຼຸບຕີລາຄາບໍ່ພາວະວິໄສ, ລາຍງານຜົນຂອງການກວດກາໃຫ້ຂັ້ນເທິງຊັກຊ້າ ແລະ ອື່ນໆ. ເພື່ອຮັບປະກັນການຕົກລົງແກ້ໄຂຜົນການກວດກາຂອງຄະນະພັກ, ຄະນະນໍາແຕ່ລະຂັ້ນໃຫ້ທັນການ, ເຂັ້ມງວດ, ສັກສິດຕາມລະບຽບຂອງພັກ ແລະ ກົດໝາຍຂອງລັດ; ສ້າງເງື່ອນໄຂໃຫ້ທຸກການຈັດຕັ້ງ, ສະມາຊິກພັກ-ພະນັກງານ, ສື່ມວນຊົນ ແລະ ປະຊາຊົນເຂົ້າຮ່ວມໃນວຽກງານຕິດຕາມ, ກວດກາໂດຍສ້າງບັນດານິຕິກຳທີ່ຈຳເປັນ ເພື່ອໃຫ້ທຸກພາກສ່ວນໃນສັງຄົມ ມີສ່ວນຮ່ວມໃນການຕິດຕາມ, ກວດກາແກ້ໄຂໃຫ້ໄດ້ບັນຫາປະກົດການຫຍໍ້ທໍ້, ສໍ້ລາດບັງຫຼວງທີ່ເປັນການກົດໜ່ວງຖ່ວງດຶງການພັດທະນາ, ສ້າງຄວາມເສື່ອມເສຍຕໍ່ບົດບາດການນໍາພາຂອງພັກ ແລະ ການຄຸ້ມຄອງຂອງລັດ ແລະ ສູ້ຊົນເຮັດໃຫ້ວຽກງານຕິດຕາມ, ກວດກາມີການຫັນປ່ຽນໃໝ່  ດໍາເນີນການກວດກາປົກກະຕິຢ່າງແຂງແຮງຢູ່ທຸກຂັ້ນ, ທຸກຂະແໜງການຕາມຂອບເຂດສິດຄວາມຮັບຜິດຊອບຂອງຕົນ, ເມື່ອມີປະກົດການລະເມີດ ຕ້ອງດໍາເນີນການກວດກາ-ແກ້ໄຂ ຢ່າງເຂັ້ມງວດທັນການ.

ຂ່າວ-ພສບ: ໄພວັນ ສູນສະຖິຕິ ແລະ ຂໍ້ມູນຂ່າວສານ ຫອຄ