ໃນວັນທີ 28 ມິຖຸນາ 2024 ຜ່ານມາ, ທ່ານ ລັດຖະມົນຕີກະຊວງອຸດສາຫະກໍາ ແລະ ການຄ້າ, ພະແນກອຸດສາຫະກໍາ ແລະ ການຄ້າແຂວງຈໍາປາສັກ ພ້ອມດ້ວຍຄະນະ ໄດ້ລົງເຄື່ອນໄຫວພົບປະ ແລະ ເຮັດວຽກຮ່ວມກັບພະແນກອຸດສາຫະກໍາ ແລະ ການຄ້າ ແຂວງຜົ້ງສາລີ ຢູ່ທີ່ຫ້ອງວ່າການປົກຄອງແຂວງຜົ້ງສາລີ ໂດຍການຕ້ອນຮັບຂອງທ່ານ ຄໍາຜອຍ ວັນນະສານ ເຈົ້າແຂວງແຂວງຜົ້ງສາລີ ມີພະນັກງານຂອງພະແນກອຸດສາຫະກໍາ ແລະ ການຄ້າ, ບັນດາຫ້ອງການອຸດສາຫະກໍາ ແລະ ການຄ້າ 7 ເມືອງ ພ້ອມດ້ວຍພະນັກງານກ່ຽວຂ້ອງເຂົ້າຮ່ວມ.

ທ່ານຫົວໜ້າພະແນກອຸດສາຫະກໍາ ແລະ ການຄ້າ  ໄດ້ລາຍງານຫຍໍ້ການຈັດຕັ້ງ ແລະ ເຄື່ອນໄຫວ 6 ເດືອນ ຕົ້ນປີຂອງພະແນກ ຊຶ່ງທ່ານໄດ້ຍົກໃຫ້ເຫັນເຖິງສະພາບພົ້ນເດັ່ນທີ່ຍາດມາໄດ້ຄື: ວຽກງານການເຊື່ອມໂຍງເຊື່ອມຈອດກັບພາພື້ນ ແລະ ສາກົນ ເພື່ອຊອກຫາຕະຫຼາດຈາໜ່າຍສິນຄ້າລາວ ແລະ ສະເໜີກະຊວງອຸດສາຫະກໍາ ແລະ ການຄ້າ ປະສານກັບພາກສ່ວນກ່ຽວຂ້ອງເພື່ອສົ່ງອອກພຶດລະດູແລ້ງຂອງແຂວງຜົ້ງສາລີເຊັ່ນ: ຖົ່ວເບີ, ຖົ່ວຂົນ ແລະ ຖົ່ວແປບ ຊຶ່ງບັນຫາດັ່ງກ່າວໄດ້ຮັບການແກ້ໄຂ ແລະ ໄດ້ສົ່ງອອກປົກກະຕິແລ້ວ, ວຽກງານການພັດທະນາສົ່ງເສີມສົ່ງອອກສິນຄ້າ ຕິດພັນການຜະລິດ ແລະ ການຕະຫລາດ ໄດ້ປະສານກັບກະຊວງ ອຄ ສົ່ງເສີມການປຸງແຕ່ງພຶດອຸດສາຫະກໍາ, ກະຊິກໍາ ແລະ ຫັດຖະກໍາປຸງແຕ່ງເປັນສິນຄ້າ ທີ່ມີທ່າແຮງບົ່ງຊ້ອນຢູ່ແຕ່ລະເມືອງ, ມອບໂຮງງານປຸງແຕ່ງກະສິກໍາ ແລະ ປ່າໄມ້ ຂັ້ນຕົ້ນສາມກິດຈະການ ຕາມການຕົກລົງຂອງກະຊວງ ມອບໃຫ້ພະແນກກະສິກໍາ ແລະ ປ່າໄມ້ ພ້ອມທັງຊຸກຍູ້ຕິດຕາມໃຫ້ບັນດາໂຮງງານອຸດສາຫະກໍາປຸງແຕ່ງປະຕິບັດຕາມລະບຽບການຂອງກະຊວງກ່ຽວຂ້ອງ, ເຜີຍແຜ່ແນະນໍາ ແລະ ບໍລິການໃຫ້ຄໍາປຶກສາຫົວໜ່ວຍຈຸລະວິສາຫະກິດ ວິສາຫະກິດຂະໜາດນ້ອຍ ແລະ ກາງ ເພື່ອເຂົ້າຫາແຫຼ່ງທຶນ  ບ້ວງເງິນກອງທຶນ ແລະ ສົ່ງເສີມຈຸລະວິສາຫະກິດ ວິສາຫະກິດຂະໜາດນ້ອຍ ແລະ ກາງ ແລະ ທຶນສົມທົບກອງທຶນສົ່ງເສີມ MSMEs ໃນການຍົກລະດັບເຄື່ອງຈັກເຕັກໂນໂລຊີ ໃຫ້ກຸ່ມລູກຄ້າເປົ້າໝາຍຈໍານວນ 4 ຄັ້ງມີ 4 ຫົວໜ່ວຍ, ສ້າງຄວາມເຂັ້ມແຂວງ ແລະ ສະພາບແວດລ້ອມເອື້ອອໍານວຍໃຫ້ແກ່ພາກທຸລະກິດ ໄດ້ປະຕິບັດຕາມ 7 ມາດຕະການຍຸດທະສາດ ແລະ 13 ວິທີການ ໃນການຈັດຕັ້ງປະຕິບັດດ້ວຍການອໍານວຍຄວາມສະດວກ ຕາມຂັ້ນຕອນ ຂັ້ນຂອດການນໍາເຂົ້າ-ສົ່ງອອກສິນຄ້າໃຫ້ມີຄວາມສະດວກວ່ອງໄວ ໂດຍສົມທົບກັບພາກສ່ວນກ່ຽວຂ້ອງປະຕິບັດຂັ້ນຕອນປະກອບເອກະສານການນໍາເຂົ້າ ແລະ ສົ່ງອອກສິນຄ້າ ຈາກ 3 ຫາ 4 ມື້ມາເປັນ 1 ຫາ 2 ມື້, ຫຼຸດຂັ້ນຂອດການແຈ້ງຂື້ນທະບຽນວິສາຫະກິດຈາກ 9 ຂັ້ນ ເຫຼືອພຽງ 3 ຂັ້ນ ແລະ ການຂື້ນທະບຽນວິສາຫະກິດຈາກ 2 ຫາ 3 ເດືອນ ມາເປັນ 5 ວັນລັດທະການ. ການຈັດຕັ້ງປະຕິບັດວຽກງານເຄັ່ງຮ້ອນຂອງລັດຖະບານ ໄດ້ຜັນຂະຫຍາຍອອກຂໍ້ຕົກລົງແຕ່ງຕັ້ງຄະນະຮັບຜິດຊອບຈັດຕັ້ງປະຕິບັດວຽກງານດັ່ງກ່າວ ໂດຍມອບໝາຍໃຫ້ຄະນະພະແນກຮັບຜິດລົງເລິກນໍາພາຈັດຕັ້ງປະຕິບັດແຕ່ລະມາດຕະການ ໂດຍກໍານົດເປັນກິດຈະກໍາ, ໂຄງການ ແລະ ສ້າງແຜນດໍາເນີນງານໃນແຕ່ລະໄລຍະພ້ອມທັງນໍາພາຈັດຕັ້ງປະຕິບັດມີຈຸດສຸມ ແລະ ມີຜົນສໍາເລັດຢ່າງພົ້ນເດັ່ນ.

ພ້ອມນີ້ ທ່ານຫົວໜ້າພະແນກອຸດສາຫະກໍາ ແລະ ການຄ້າ ໄດ້ສະເໜີໃຫ້ທ່ານ ລັດຖະມົນຕີ ກະຊວງ ອຄ ຊ່ວຍເຈລະຈາລັດຖະບານ ສປ ຈີນ ເປີດນໍາໃຊ້ດ່ານປ່າຄ່າ ບ້ານຈອມ ໃຫ້ສາມາດດໍາເນີນການຄ້າຊາຍແດນໄດ້ປົກກະຕິ ໃຫ້ທາງກະຊວງ ອຄ ຊ່ວຍຄົ້ນຄວ້ານໍາເອົາລາຍການສິນຄ້າ ຊາ, ໝາກແໜ່ງ, ໝາກເດືອຍ, ພຶດສະໝຸດໄພ ທີ່ຍັງບໍ່ໄດ້ຮັບຮອງລົງນາມໃນອະນຸສັນສອງຝ່າຍ ລາວ-ຈີນ ເພື່ອເຈລະຈາເຂົ້າແຜນຮັບຮອງລົງນາມຕາມລະບຽບການ,  ສະເໜີໃຫ້ກົມມາດຕະຖານ ແລະ ວັດແທກ ຊ່ວຍຄົ້ນຄວ້າສະໜອງອຸປະກອນໃນການວັດແທກທີ່ຈໍາເປັນເປັນຕົ້ນ: ເຄື່ອງກວດຄຸນນະພາບນໍ້າມັນເຊື້ອໄຟ, ແມ່ແບບວັດແທກກົງເຕີນໍ້າປະປາ, ກົງເຕີໄຟຟ້າ 3 ເຟດ ແລະ ບັນຫາອື່ນໆຈໍານວນໜຶ່ງ. ໃນກອງປະຊຸມບັນດາທ່ານທີ່ເຂົ້າຮ່ວມປະຊຸມຈາກສູນກາງ ແລະ ທ້ອງຖິ່ນ ໄດ້ປະກອບຄວາມຄິດເຫັນ ແລກປ່ຽນເຊິ່ງກັນ ແລະ ກັນ ລະຫວ່າງສູນກາງ ແລະ ທ້ອງຖິ່ນ ຕໍກັບປະເດັນທີ່ແຕ່ລະຝ່າຍໃຫ້ຄວາມສົນໃຈ ເປັນຕົ້ນແມ່ນບັນຫາຂໍ້ຍຸ້ງຍາກທີ່ພົບພໍ່ ແລະ ຊອກຫາແນວທາງໃນການຈັດຕັ້ງປະຕິບັດໃນຕໍ່ໜ້າໃຫ້ມີຄວາມເປັນເອກະພາບ ລະຫວ່າງສູນກາງ ແລະ ທ້ອງຖິ່ນ.

ໃນໂອກາດດັ່ງກ່າວໄດ້ເຊັນບັດບັນທຶກການຮ່ວມມືລະຫວ່າງ ກົມມາດຕະຖານ ແລະ ວັດແທກ, ກົມຊັບສິນທາງປັນຍາ ແລະ ກົມການຄ້າຕ່າງປະເທດ ແລະ ພະແນກອຸດສາຫະກໍາ ແລະ ການຄ້າ ແຂວງຜົ້ງສາລື.

ຂ່າວ: ວິທະຍຸ ແລະ ໂທລະພາບແຂວງຜົ້ງສາລີ

ພາບ: ພະແນກ ອຄ ແຂວງຜົ້ງສາລີ