ໃນຕອນເຊົ້າເວລາ 8:30 ໂມງ ຂອງວັນທີ 18 ກໍລະກົດ 2024, ທີ່ຫ້ອງຮັບແຂກໃຫຍ່ ຊັ້ນ 04 ກະຊວງອຸດສາຫະກໍາ ແລະ ການຄ້າ, ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ນາງ ແຮັດເຕີ ວາເຣຍອາວາ (Heather Variava), ເອກອັກຄະລັດຖະທູດ ສ.ອາເມຣິກາ ປະຈໍາ ສປປ ລາວ ໃນໂອກາດເຂົ້າພົບປະປຶກສາຫາລືທົບທວນຄືນດ້ານການຄ້າ-ການລົງທຶນພື້ນຖານໂຄງລ່າງ ຢູ່ ສປປ ລາວ; ເປັນກຽດເຂົ້າຮ່ວມມີບັນດາ ທ່ານຫົວໜ້າ-ຮອງຫົວໜ້າກົມ ກ່ຽວຂ້ອງອ້ອມຂ້າງກະຊວງ ເຂົ້າຮ່ວມທັງສອງຝ່າຍ ປະມານ 18 ທ່ານ.
ໂອກາດນີ້ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ສະແດງຄວາມຍ້ອງຍໍຊົມເຊີຍຕໍ່ ທ່ານ ນາງ ແຮັດເຕີ ວາເຣຍອາວາ (Heather Variava), ເອກອັກຄະລັດຖະທູດ ສ.ອາເມຣິກາ ປະຈໍາ ສປປ ລາວ , ເອກອັກຄະລັດຖະທູດ ສ.ອາເມຣິກາ ປະຈໍາ ສປປ ລາວ ໃນໂອກາດເຂົ້າຢ້ຽມຂໍ່ານັບຄັ້ງນີ້ ເຊິ່ງ ທ່ານ ທູດ ໄດ້ສົນທະນາກ່ຽວກັບວຽກງານທາງດ້ານການຮ່ວມມື ລະຫວ່າງ ສປປ ລາວ- ສ.ອາເມຣິກາ ພົວພັນເສີ່ມສ້າງທີ່ດີໃນໄລຍະຜ່ານມາ ດ້ານວັດທະນາທໍາ, ດ້ານສັງຄົມ ແລະ ດ້ານເສດຖະກິດເປັນຕົ້ນການຊ່ວຍເຫຼືອຫຼາຍດ້ານມີການພົບປະແລກປ່ຽນຄະນະຜູ້ແທນນຳກັນຢ່າງເປັນປະຈຳ ແລະ ຕໍ່ເນື່ອງ ໂດຍສະເພາະແມ່ນການຮ່ວມມື ເພື່ອສົ່ງເສີມໃຫ້ແກ່ວຽກງານການຄ້າ ແລະ ການລົງທຶນ ລະຫວ່າງສອງປະເທດ, ລວມທັງການຊ່ວຍເຫຼືອໃນການຈັດຕັ້ງປະຕິບັດສັນຍາການຄ້າສອງຝ່າຍທີ່ໄດ້ລົງນາມ ໃນປີ 2003 ແລະ ມີຜົນບັງຄັບໃຊ້ໃນປີ 2005 ນັ້ນໃຫ້ປະກົດດອກອອກຜົນ ແລະ ການຊຸກຍູ້ໃຫ້ ສປປ ລາວ ເຂົ້າເປັນສະມາຊິກອົງການການຄ້າໂລກ. ການພົວພັນດ້ານການຄ້າ ລະຫວ່າງ ສປປ ລາວ ແລະ ສ.ອາເມຣິກາ ໃນໄລຍະຜ່ານມາ ແມ່ນຈັດຕັ້ງປະຕິບັດຕາມຂອບຂໍ້ຕົກລົງວ່າດ້ວຍການຄ້າ ແລະ ການລົງທຶນ TIFA ແລະ ສິດທິພິເສດດ້ານການຄ້າປະເທດດ້ອຍພັດທະນາ, ຊຶ່ງໃນປີ 2023 ມູນຄ່າການຄ້າລະຫວ່າງ ສປປ ລາວ ແລະ ສ.ອາເມຣິກາ ສາມາດປະຕິບັດໄດ້ 340 ລ້ານໂດລາສະຫາລັດ (ຈັດເປັນຄູ່ຄ້າອັນດັບທີ 5 ຂອງ ສປປ ລາວ). ໃນນັ້ນ, ມູນຄ່າການນໍາເຂົ້້າປະຕິບັດໄດ້ 226 ລ້ານໂດລາສະຫາລັດ ແລະ ມູນຄ່າການສົ່ງອອກ ປະຕິບັດໄດ້ 114 ລ້ານໂດລາສະຫາລັດ.
-ສິນຄ້າຫຼັກທີ່ ສປປ ລາວ ນໍາເຂົ້້າຈາກ ອາເມຣິກາໃນ ປີ 2023 ປະກອບມີ: ເຍື່ອໄມ້ ແລະ ເສດເຈ້ຍ; ຜະລິດຕະພັນການຢາ (ເພສັດຊະກໍາ); ຊິ້ນສ່ວນອາໄຫຼ່ລົດ (ລວມທັງຢາງ, ແວ່ນ, ໂສ້…); ກາກ ແລະ ສິ່ງເສດເຫຼືອຈາກອຸດສາຫະກຳຜະລິດອາຫານ; ພາຫະນະທາງບົກ (ນອກຈາກລົດຈັກ,ລົດໄຖ); ອຸປະກອນກົນຈັກ (ນອກຈາກເຄື່ອງກົນຈັກພາຫະນະ); ເຫຼັກ ແລະ ເຄື່ອງທີ່ເຮັດດ້ວຍເຫຼັກ, ເຫຼັກກ້າ; ເຄື່ອງໃຊ້ທີ່ເຮັດດ້ວຍພລາສະຕິກ; ແກ້ວປະເສີດ ຫຼື ເຄິ່ງປະເສີດ; ເພັດ ແລະ ສິນຄ້າອື່ນໆ
- ສິນຄ້າຫຼັກທີ່ ສປປ ລາວ ສົ່ງອອກໄປ ອາເມຣິກາ ໃນປີ 2023 ປະກອບມີ: ເກີບ; ເຄື່ອງຊຸບຫົວ (ໝວກ, ຜ້າຄຸມຫົວ); ເຄື່ອງນຸ່ງຫົ່ມ; ແຮ່ອື່ນໆ (ນອກຈາກແຮ່ທອງ, ເຫຼັກ, ກົ່ວ); ຕຽງ, ເສື່ອ, ເບາະ, ໂຄມໄຟ ທີ່ບໍ່ແມ່ນເຄື່ອງເຟີນີເຈີ; ເຄື່ອງມື ແລະ ອຸປະກອນທັດສະນະສາດ; ເຄື່ອງຫຼີ້ນກິລາ; ຜະລິດຕະພັນທາງເຄມີ; ໄຂ່ມຸກ, ແກ້ວປະເສີດ; ເຄື່ອງເຟີນີເຈີ; ຂົນສັດປີກ ແລະ ສິນຄ້າອື່ນໆ.
ຂໍສະແດງຂອບໃຈ ທ່ານເອກອັກຄະລັດຖະທູດ ສ.ອາເມຣິກາ ທີ່ໃຫ້ກຽດມາພົບປະຢ້ຽມຢາມກະຊວງອຸດສາຫະກໍາ ແລະ ການຄ້າ ແລະ ຂໍອວຍພອນໃຫ້ທ່ານພ້ອມດ້ວຍຄອບຄົວຈົງມີຄວາມສຸກ, ປະສົບຜົນສຳເລັດໃນໜ້າທີ່ວຽກງານ ແລະ ສືບຕໍ່ເສີມຂະຫຍາຍການພົວພັນ-ຮ່ວມມືລະຫວ່າງ ສປປ ລາວ ແລະ ສ.ອາເມຣິກາ.
ພາບ-ຂ່າວ: ໄພຄໍາອີ ຫ້ອງການກະຊວງ
