ວັນທີ 18 ກໍລະກົດ 2024 ທີ່ກະຊວງອຸດສາັະກໍາ ແລະການຄ້າ ທ່ານ ມະໄລທອງ ກົມມະສິດ ລັດຖະມົນ ຕີກະຊວງ ອຄ ຕ້ອນຮັບການເຂົ້າຢ້ຽມອໍາລາຂອງທ່ານ ນ. ອິນາ ມາຈູລໍນິແຕ Ms. Ina MARCIULIONYTE, ເອກອັກຄະລັດຖະທູດ ແຫ່ງສະຫະພາບເອີຣົບ ປະຈໍາ ສປປ ລາວ ມີທ່ານຫົວໜ້າຫ້ອງການ, ຫົວໜ້າກົມ, ຄະນະກົມ ພ້ອມດ້ວຍພະນັກງານທັງສອງພາກສ່ວນກ່ຽວຂ້ອງເຂົ້າຮ່ວມ.
ຈຸດປະສົງແມ່ນເພື່ອເຂົ້າຢ້ຽມຂ່ໍານັບອໍາລາ ໃນໂອກາດສໍາເລັດໜ້າທີ່ການທູດຢູ່ ສປປ ລາວ ແລະ ເພື່ອລາຍງານຄວາມຄືບໜ້າໃຫ້ທ່ານລັດຖະມົນຕີກະຊວງ ອຄ ຊາບກ່ຽວກັບການຈັດຕັ້ງປະຕິບັດໂຄງການໃໝ່ໃນປີ 2025 ແລະ ເພື່ອແຈ້ງໃຫ້ຊາບກ່ຽວກັບ EU Deforestation-free Regulations: (EUDR) ທີ່ເປັນນະໂຍ ບາຍດ້ານການຄ້າ/ສິ່ງແວດລ້ອມ (ກົດໝາຍ ທີ່ກ່ຽວກັບການຫຼຸດການຜະລິດ ແລະ ການບໍລິໂພກສິນຄ້າ ທີ່ໄດ້ຈາກການຕັດໄມ້ທໍາລາຍປ່າ ແລະ ການກໍ່ໃຫ້ເກີດຄວາມເຊື່ອມໂຊມຂອງປ່າ).
ໂອກາດນີ້ ທ່ານ ມະໄລທອງ ກົມມະສິດ ລັດຖະມົນຕີກະຊວງ ອຄ ກໍ່ສະແດງຄວາມຍ້ອງຍໍຊົມເຊີຍ ຕໍ່ຜົນງານ ແລະ ການປະກອບສ່ວນຂອງ ທ່ານທູດ ແລະ ສະຫະພາບເອີຣົບ ຕໍ່ການພັດທະນາເສດຖະກິດ-ສັງຄົມ ສປປ ລາວ ໃນໄລຍະປະຕິບັດໜ້າທີ່ຂອງທ່ານ; ຂອບໃຈຕໍ່ການສະໜັບສະໜູນ ແລະ ການຊ່ວຍເຫຼືອດັ່ງກ່າວຂອງ ສະຫະ ພາບ ເອີຣົບ ທີ່ມີຕໍ່ ສປປ ລາວ ແລະ ຕໍ່ຂະແໜງອຸດສາຫະກໍາ ແລະ ການຄ້າ ຂອງທ່ານ ນ. ອິນາ ມາຈູລໍນິແຕ (Ms. Ina MARCIULIONYTE), ເອກອັກຄະລັດຖະທູດ ແຫ່ງສະຫະພາບເອີຣົບ ປະຈໍາ ສປປ ລາວ
ການຮ່ວມມືດ້ານການຄ້າ ລາວ-ອີຢູ ໃນໄລຍະຜ່ານມາ ແມ່ນຈັດຕັ້ງປະຕິບັດຕາມເງື່ອນໄຂສິດທິພິເສດທາງການຄ້າເຊັ່ນ: EBA (Everything But Arms) ແລະ GSP (Generalized System of Preference) ທີ່ EU ໄດ້ໃຫ້ແກ່ບັນດາປະເທດດ້ອຍພັດທະນາ, ຊຶ່ງໄລຍະ 05 ປີ (2019-2023) ມູນຄ່າການຄ້າສອງຝ່າຍ ລາວ-ອີຍູ ບັນລຸໄດ້ 2,737.2 ລ້ານໂດລາສະຫະລັດ. ໃນນັ້ນ, ມູນຄ່າການສົ່ງອອກບັນລຸໄດ້ 1,961.5 ລ້ານໂດລາສະຫະລັດ ແລະ ມູນຄ່າການນໍາເຂົ້າບັນລຸ 775.7 ລ້ານໂດລາສະຫະລັດ; ສິນຄ້າຫລັກທີ່ ສປປ ລາວ ສົ່ງອອກໄປ ອີຢູ: ເຄື່ອງນຸ່ງຫົ່ມ; ເກີບ; ກາເຟ (ບໍ່ທັນໄດ້ປຸງແຕ່ງ); ເພັດ; ເຂົ້າ; ເຄື່ອງຫຼີ້ນກິລາ; ເຄື່ອງຊຸບຫົວ (ໝວກ, ຜ້າຄຸມຫົວ); ເຄື່ອງສຳລັບການເດີນທາງ; ພລາສະຕິກ ແລະ ເຄື່ອງໃຊ້ທີ່ເຮັດດ້ວຍພລາສະຕິກ ແລະ ອື່ນໆ, ສິນຄ້າຫລັກທີ່ ສປປ ລາວ ນໍາເຂົ້້າຈາກ ອີຢູ: ອຸປະກອນກົນຈັກ (ນອກຈາກເຄື່ອງກົນຈັກພາຫະນະ); ເຫຼົ້າ, ເບຍ, ວາຍ; ເຍື່ອໄມ້ ແລະ ເສດເຈ້ຍ; ເພັດ; ພາຫະນະທາງບົກ (ນອກຈາກລົດຈັກ, ລົດໄຖ); ຜະລິດຕະພັນການຢາ (ເພສັດຊະກໍາ); ແກ້ວປະເສີດ ຫຼື ເຄິ່ງປະເສີດ; ຊິ້ນສ່ວນອາໄຫຼ່ລົດ (ລວມທັງຢາງ, ແວ່ນ, ໂສ້…); ເສັ້ນໄຍສັງເຄາະ; ເຄື່ອງມື ແລະ ອຸປະກອນທັດສະນະສາດ ແລະ ອື່ນໆ.
ການຊ່ວຍເຫຼືອຂອງອີຢູ ແຕ່ປີ 2008 ເປັນຕົ້ນມາ, ສະຫະພາບເອີຣົບ (EU) ໄດ້ໃຫ້ການຮ່ວມມື ແລະ ຊ່ວຍເຫຼືອຂະແໜງອຸດສາຫະກຳ ແລະ ການຄ້າ ທີ່ພົ້ນເດັ່ນແມ່ນ EU ເປັນຜູ້ປະສານງານຕາງໜ້າຝ່າຍຄູ່ຮ່ວມພັດທະນາໃນກອບການເຊື່ອມໂຍງເຂົ້າສາກົນດ້ານການຄ້າ ຫຼື ເອີ້ນວ່າ: Enhanced Integrated Framework Donor Facilitator, ຊຶ່ງເປັນໂຄງການທີ່ສະໜັບສະໜູນດ້ານພັດທະນາການຄ້າໃຫ້ແກ່ບັນດາປະເທດດ້ອຍພັດທະນາໃນທົ່ວໂລກ. ສຳລັບ ສປປ ລາວ ໂຄງການດັ່ງກ່າວ ໄດ້ສ້າງຄວາມເປັນເຈົ້າການຂອງພາກລັດໃນການສ້າງບົດວິໄຈການເຊື່ອມໂຍງເຂົ້າສາກົນດ້ານການຄ້າໃນປີ 2012 (DTIS 2012), ບົດດັ່ງກ່າວ ແມ່ນໄດ້ກຳນົດຂະແໜງການບູລິມະສິດໃນການພັດທະນາການຄ້າ ແລະ ພາກເອກະຊົນ ໂດຍຜັນຂະຫຍາຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຄັ້ງທີ 7 NSEDP ຂອງລັດຖະບານ ແລະ ສອດຄ່ອງກັບກອບການຈັດຕັ້ງປະຕິບັດຖະແຫຼງການວຽງຈັນ ວ່າດ້ວຍຄວາມມີປະສິດທິພາບໃນການນຳໃຊ້ທຶນຊ່ວຍເຫຼືອຈາກຄູ່ຮ່ວມພັດທະນາ (Vientiane Declaration on Aid Effectiveness), ນອກນັ້ນ, EU ຍັງເປັນປະທານຮ່ວມຂອງໜ່ວຍງານຂະແໜງການຄ້າ ແລະ ພາກເອກະຊົນ (Trade and Private Sector Working Group).
ຂໍສະແດງຂອບໃຈ ທ່ານ ນ. ອິນາ ມາຈູລໍນິແຕ Ms. Ina MARCIULIONYTE, ເອກອັກຄະລັດຖະທູດ ແຫ່ງສະຫະພາບເອີຣົບ ປະຈໍາ ສປປ ລາວ ທີ່ໃຫ້ກຽດມາພົບປະຢ້ຽມອໍາລາ ກະຊວງອຸດສາຫະກໍາ ແລະ ການຄ້າອວຍພອນໃຫ້ທ່ານພ້ອມດ້ວຍຄອບຄົວຈົງມີຄວາມສຸກ, ປະສົບຜົນສຳເລັດໃນໜ້າທີ່ວຽກງານ ແລະ ສືບຕໍ່ເສີມຂະ ຫຍາຍການພົວພັນຮ່ວມມືລະຫວ່າງ ສປປ ລາວ ແລະ ສະຫະພາບເອີຣົບ.
ຂ່າວ-ພາບ: ໄພວັນ ສູນສະຖິຕິ ແລະ ຂໍ້ມູນຂ່າວສານ ຫອຄ
