ກະຊວງອຸດສາຫະກຳ ແລະ ການຄ້າ ປິດຊຸດຮຽນທິດສະດີການເມືອງ ຂັ້ນຕົ້ນ 3 ເດືອນ ຊຸດທີ I ປະຈໍາປີ 2024 ຂອງກະຊວງອຸດສາຫະກໍາ ແລະ ການຄ້າ ໃນວັນທີ 19 ກໍລະກົດ 2024. ໃຫ້ກຽດເປັນປະທານຮ່ວມ ຂອງສະຫາຍ ນາງ ຈັນສຸກ ແສງພະຈັກ ຮອງເລຂາຄະນະພັກກະຊວງອຸດສາຫະກຳ ແລະ ການຄ້າ, ສະຫາຍ ນາງ ບຸນມີ ຈຸນລະຈັກ ຮອງເລຂາຄະນະພັກ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ມີບັນດາສະຫາຍ ຄະນະປະຈຳພັກກະຊວງ, ເລຂາໜ່ວຍພັກ, ບັນດາສະຫາຍແຂກສອງພາກສ່ວນກ່ຽວຂ້ອງ ແລະ ນັກສໍາມະນາກອນ ເຂົ້າຮ່ວມ.
ໄດ້ເລີ່ມພິທີເປີດຮຽນ ແຕ່ວັນທີ 22 ເມສາ ເຖິງ ວັນທີ 19 ກໍລະກົດ 2024 ກົມຈັດຕັ້ງ ແລະ ພະນັກງານ ໃນນາມຄະນະຮັບຜິດຊອບຊຸດຮຽນທິດສະດີ ໂດຍການປະສານສົມທົບ ລະຫວ່າງ ສະຖາບັນການເມືອງ ແລະ ການປົກຄອງແຫ່ງຊາດ ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງໜ້າທີ່ການເມືອງ ໃນໄລຍະໃໝ່, ຜ່ານການຮຽນ-ການສອນຕົວຈິງສາມາດຕີລາຄາສະພາບລວມ ດ້ານດີ, ດ້ານອ່ອນຂໍ້ຄົງຄ້າງ, ບົດຮຽນທີ່ຖອດຖອນໄດ້ ເພື່ອເປັນບ່ອນອີງໃນການຈັດຕັ້ງປະຕິບັດໃນຕໍ່ໜ້າ ຄື: ການຮຽນທິດສະດີການເມືອງ ຂັ້ນຕົ້ນ 3 ເດືອນ ຊຸດທີ I ມີນັກສໍາມະນາກອນ 30 ສະຫາຍ, ຍິງ 18 ສະຫາຍ, ໃຊ້ເວລາຮຽນທັງໝົດ 65 ວັນ ເທົ່າກັບ 455 ຊົ່ວໂມງ, ປະກອບມີ 6 ກຸ່ມວິຊາຄື: ກຸ່ມວິຊາ ປັດຊະຍາມາກ-ເລນິນ, ເສດຖະສາດການເມືອງມາກ-ເລນິນ, ລັດທິສັງຄົມນິຍົມວິທະຍາສາດ, ແນວຄິດ ໄກສອນ ພົມວິຫານ, ທິດສະດີລັດ ແລະ ກົດໝາຍ ແລະ ກຸ່ມວິຊາ ປະຫວັດສາດພັກ ແລະ ກໍ່ສ້າງພັກ, ມີ 4 ຫົວຂໍ້ສະເພາະຈາກຄະນະນຳສະຖາບັນການເມືອງ ແລະ ການປົກຄອງແຫ່ງຊາດ ແລະ ທັດສະນະສຶກສາ. ພາຍຫຼັງສໍາເລັດການຮຽນການສອນ ນັກສໍາມະນາກອນໄດ້ຂຽນບົດເກັບກ່ຽວຜົນງານ ພ້ອມທັງປະເມີນຄວາມຮັບຮູ້ ຂອງແຕ່ລະສະຫາຍໄດ້ຄະແນນສະເລ່ຍເກຼດ A ມີຈໍານວນ 7 ສະຫາຍ, ຄິດເປັນ 23, 33 % ແລະ ຄະແນນສະເລ່ຍເກຼດ B+ ມີຈໍານວນ 23 ສະຫາຍ, ຄິດເປັນ 76, 67 % ຖືວ່າຜົນການຮຽນໃນຄັ້ງນີ້ ຜ່ານໝົດທຸກສະຫາຍ.
ປະທານໄດ້ຕີລາຄາສູງ ຕໍ່ຄະນະຮັບຜິດຊອບ ແລະ ນັກສໍາມະນາກອນ ຊຸດຮຽນທິດສະດີການເມືອງ, ພິເສດແມ່ນສະຖາບັນການເມືອງ ແລະ ການປົກຄອງແຫ່ງຊາດ ທີ່ໄດ້ອຸທິດກຳລັງ, ເຫື່ອແຮງ, ສະຕິປັນຍາ ແລະ ເປັນເຈົ້າການຊ່ວຍກະຊວງອຸດສາຫະກຳ ແລະ ການຄ້າ ໃນການກະກຽມ, ສ້າງເງື່ອນໄຂ ແລະ ອຳນວຍຄວາມສະດວກໃນທຸກດ້ານເພື່ອກໍ່ສ້າງ-ບຳລຸງ ສະມາຊິກພັກ-ພະນັກງານຫຼັກແຫຼ່ງຂອງກະຊວງອຸດສາຫະກຳ ແລະ ການຄ້າ, ທິດສະດີການເມືອງຄັ້ງນີ້ສຸດມີຄວາມໝາຍ, ຄວາມສຳຄັນຍິ່ງ ເພາະວ່າ ເປັນການສ້າງພະນັກງານນຳພາ-ຄຸ້ມຄອງຂັ້ນຄະນະພະແນກ ແລະ ວິຊາການຈຳນວນໜຶ່ງເພື່ອສ້າງພະນັກງານສືບທອດ-ປ່ຽນແທນໃນອະນາຄົດ ຂອງກະຊວງອຸດສາຫະກຳ ແລະ ການຄ້າ ເພື່ອຮັບປະກັນລັກສະນະສືບທອດຕໍ່ເນື່ອງ ແລະ ຫັນເປັນໜຸ່ມ ເທື່ອລະກ້າວຮັບປະກັນໂຄງປະກອບບຸກຄະລາກອນໃຫ້ມີ 3 ລຸ້ນ: ລຸ້ນອາວຸໂສ, ລຸ້ນກາງ, ລຸ້ນໜຸ່ມນອກຈາກນີ້ກໍຕ້ອງເອົາໃຈໃສ່ບັນຫາເພດ, ເຜົ່າ ແລະ ແມ່ຍິງເພື່ອສືບທອດປ່ຽນແທນ, ການຍົກລະດັບຄວາມຮູ້ທາງດ້ານທິດສະດີການເມືອງ, ແນວທາງ, ແຜນນະໂຍບາຍຂອງພັກ, ເຊີດຊູທັດສະນະຊົນຊັ້ນຢ່າງຈະແຈ້ງໂດຍສະເພາະບັນດາສະຫາຍໃນຖານະທີ່ເປັນພະນັກງານການນຳລຸ້ນໜຸ່ມແໜ້ນ, ພະນັກງານຫຼັກແຫຼ່ງຂອງກະຊວງອຸດສາຫະກຳ ແລະ ການຄ້າ ທີ່ຈະສືບທອດພາລະກິດຂອງພັກ, ຂອງຊາດ.
ທ່ານໄດ້ເນັ້ນວ່າ: ບັນດາສະຫາຍເປັນເຈົ້າການນຳເອົາບົດຮຽນ, ຄວາມຮູ້ທີ່ໄດ້ຮຽນມາເຂົ້າສູ່ພຶດຕິກຳຕົວຈິງໃຫ້ມີການຫັນປ່ຽນຢ່າງຕັ້ງໜ້າ, ສືບຕໍ່ຝຶກຝົນຫຼໍ່ຫຼອມຕົນເອງ ທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດ ແລະມີແບບແຜນວິທີເຮັດວຽກທີ່ວິທະຍາສາດ, ບັນດາສະຫາຍແມ່ນຜະລິດຕະພັນຊຸດໜຶ່ງທີ່ມີຄຸນນະພາບ, ຮັກສາຊື່ສຽງ, ກຽດສັກສີຂອງຕົນ ກໍຄືຂອງສະຖາບັນການສຶກສາ ແລະ ຍຶດໝັ້ນໃນທາດແທ້ຂອງຊົນຊັ້ນກຳມະກອນຂອງພັກ ຢາງສະ ເໝີຕົ້ນສະເໝີປາຍ; ມີຄວາມເປັນແບບຢ່າງໃນການເຄົາລົບ ແລະ ປະຕິບັດກົດໝາຍ ແລະ ລະບຽບການຕ່າງໆຂອງລັດຢ່າງເປັນເຈົ້າການ, ສະຫາຍລ້ວນແມ່ນສະມາຊິກພັກ-ພະນັກງານ ທີ່ກຳບັນຫາຂອງຂະແໜງອຸດສາຫະກຳ ແລະ ການຄ້າ ໄດ້ຢ່າງເລິກເຊິ່ງສົມຄວນ ແລະ ຈະເປັນຜູ້ສືບທອດປ່ຽນແທນ ໃນສະເພາະໜ້າ ແລະ ຍາວນານ.
ຂ່າວ-ພາບ: ໄພວັນ ສູນສະຖິຕິ ແລະ ຂໍ້ມູນຂ່າວສານ ຫອຄ
